كل عام و انتم بخير

دى قصة ليها مخزن واضح اتمنى تعجبكم

القرود كان عندها فرح راح القرد ابو العروسة عزم كل حيوانات الغابة ما عدا الأسد
الأسد لما عرف زعل جدا و كشر عن انيابه و راح يعاتب القرد

القرد لما شاف الأسد خاف جدا و قاله انا حقولك الحقيقة :-
من عادة القرود فى الأفراح التباهى امام نسايبهم
يعنى ممكن أهزأ نمر او اضرب فيل على قفاه أو أضرب فهد شلوت بغرض التباهى
و الحيوانات مش بتزعل علشان عارفه ده طبعنا و ان الضرب كده و كده
و علشان كده مش رضيت اعزمك علشان مش حتستحمل النوع ده من التعامل

كلام القرد اثر فى الأسد و قال للقرد
لا يا سيدى برضه تعزمنى و انا حأستحمل

المهم مطولش عليكم قولوا طول
الأسد حضر العزومة

و القرد كل شوية يهزأ فيل
يلسع نمر على قفاه
يسكع تمساح بالشلوت

و اخيرا بص القرد للأسد و قاله انت قاعد مش بتعمل حاجه ليه ؟؟
قوم فرق الحاجة الساقعة على المعازيم و راح راقعه قلم بس سخن

المهم الأسد فرد ايده و طلع مخالبه
بس فى آخر لحظة مرضيش يضرب القرد علشان هو وعده انه يستحمل

القرد مش يكتفى لحد كده ؟؟
بعد الأسد ما وزع الحجات السقعه راح القرد باصص له و قايل خدوا الأسد الفقر ده من وشى و ارموه بره و كتفوه

المهم الأسد قال لنفسه عديها و متبوظش الفرح

يبقى الأسد متكتف و الفرح و الطبل و الزمر شغال

يبقى القرد مش يسكت ؟؟
راح قايل انتوا مكتفين الأسد فى الظل ؟؟
حطوه فى الشمس تلسع نافوخه

يبقى الأسد لا حول له و لا قوة شالوه متكتف من الظل للشمس

عدت نص ساعة
ساعة
ساعتين

الأسد حس ان نفوخه ساح من الشمس و انه اتهزأ و القرود و كل الحيوانات بتاكل و بتشرب و ناسيينه برا الفرح

المهم مطولش عليكم
الأسد قعد ينادى و يزعق و يجعر للحيوانات فى الفرح و الكل عمل مش واخد باله و عملوا مش سامعينه

الأسد لقى نمر بيجرى علشان يلحق الفرح
الأسد نادى على النمر و طلب ان النمر يفكه

النمر قال لنفسه سيب الأسد يتربى علشان يحس بالمظلومين و ميفتريش
و راح قايل للأسد إن مخالبه بتوجعه و مش حيقدر يفكه

و نفس الكلام ده حصل مع الفهد و الفيل و الديب و كل واحد بحجة شكل

المهم مطولشى عليكم
عدى كلب من قدام الأسد
و لوحده بص للأسد و قاله يا نهار مش فايت
مين عمل فيك كده يا جلالة الأسد

رد الأسد و قاله القرد
الكلب قاله لا كده ميصحش
و لوحده راح فاكك الأسد و مستناش الأسد يطلب منه

الأسد كان ناوى يخش الفرح و يطربقه على القرود و يجيب عاليه واطيه
لكنه قال فى نفسه ملوش لزوم اعمل عقلى بعقل شوية المجانين دول

لكن تانى يوم الصبح الأسد لم كل حاجاته و جهز شنطته و خد بعضه و حيترك الغابة

العقلاء من الغابة حاولوا يمنعوه بس الأسد رفض بشده
فسألوه عن سبب رغبته فى هجرة الغابة

فقال الأسد
البلد إللى يربطك فيها قرد و ميفككش غير كلب متستاهلش الأسد يعيش فيها

و توته توته فرغت الحدوته

ايه رأيكم عجبتكم؟؟
حلوه ؟؟
بعرف أألف قصص ؟؟؟