آنا الوالده او جور الوكت ذبنــــــــــي
واحس الروح راحت من رحت يبنـــي
***
انصبت وسط القلب مهدك يضي العين
وضلوعي تحرسك من مرام البيـــــــن
وعلى هز المهد يبني اسهرت سنتيـــن
واشباح السهر جانن يبارنـــــــــــــــي
***
تكبر والأمل يبني كبر ويــــــــــــــاك
لدارك من تطبها بلهفه اتلقـــــــــــــاك
تصد عيني على طولك والجبد يرعاك
ما أدري تروح وتنفقد منــــــــــــــــي
***
وين سنين عمري الجانت تباريــــك
وين السهر يبني اللي سهرته اعليك
بسرعة اتروح مني ما جنت أدريـك
فقدتك وانقطع منك بعد ظنــــــــــي
***
تنوح الوالدة الغاب الولد عنهـــــا
شلون اللي ابنها ينفقد منهــــــــــا
ما يبطل بجاها ولا يخف ونهــــــا
وانا خلافك يفت صم الصخر وني
***
عشت ويا النبض وبقلبـــــي ربيتك
مني تنفقد وتروح ما ادريتــــــــــك
أنا لو أدري بسواد عيوني ضـميتك
ولا من بعدك احمل هالغصص ذني

***
يا من جنت شمعه او زاهيــه ابداري
ويا وجه البراءة العاش بأفكــــــاري
احن اعليك يبني ليلي ونهــــــــاري
وحتى الفاجدات اجزعن من حنـــــي

***
من بعدك اقضي بالحزن يومـــــــي
يجيني الليل وأتوسد على همومـــي
كل لحظة أفز مرعوبة من نومــــي
جنك ما متت آنا المتت جنــــــــــي

***
رحت وبقلبي جم لوعة حزن خليـت
ومثل ون الحمام الفرقتك ونيـــــــت
أنا جنت أتمنى تحضر دفنتي يا ريت
وبيدك يا شريك الروح تدفنــــــــــي
***
للشاعر : جابر الكاظمي
من القاء الرادود: الحاج باسم الكربلائي