بسم الله الرحمن الرحيم


السلام عليكم ورحمة الله وبركاته ..


هذا الشي اللي بغيت اقوله ليكم هو سالفة صارت لي قبل فترة وما فكرت في هذا الشي الا بعد فترة قاربت الشهر ....

اول شي حبيت اقول ليكم شي .. اني كنت اسمع أغاني من قبل .. بس الحين .. الحمد لله .. الله هداني وتبت والفضل لله سبحانه وتعالى..
وبديت اسمع أغاني وقصائد في مدح اهل البيت ..


أذكر هذا اليوم كأنه صار لي امس..

اني ساكنة في مدينة حمد .. مرة كنت طالعة من البيت بروح الشغل .. كنت مستانسة .. كنت مشغلة شريط أفراح للرادود حسين السيسي .. قصيدة ( يمتى يا بو صالح تشد المهر)


يمتى يا بو صالح تشد المهر .. بيدك العلم الاخضر وقالوا ظهر..

كنت طربانة حدي .. وكنت مسرعة وانا اسوق السيارة .. وصلت عند دوار 6 بالتحديد .. وكنت امشي في المسار الصح .. تفاجأت ب (سكسويل) طلع عليي مرة وحدة .. وحاولت اني اتفاداه.. ضغطت على (البريك) المكابح مرة وحدة وبقوة .. أقسم بالله اني كنت بموت لو دعمت هذا السكسويل لأني لو دعمته كان انحشرت تحته.. والله العظيم .. حسيت ان الموت ينتظرني ..
وكانت هذي الاغنية للحين تشتغل ..
الحمد لله وألف الحمد لله .. وقفت السيارة من قوة ما ضغطت على البريك .. كنت مرتبكة حدي وعرقت من شدة الخوف وحسيت روحي تبهدلت وانا أسب وألعن في هذا السايق المتهور اللي بغى ينهي حياتي في لحظة .. المهم ..
انتبهت لروحي ان سيارتي بندت عليي وانا في وسط الدوار..
حاولت اشغلها بس ما اشتغلت ..
ما كنت اسمع حزتها الا ..
يمتى يا بو صالح تشد المهر .. بيدك العلم الاخضر وقالوا ظهر..

بغيت استخف .. شلون المسجلة تشتغل والسيارة ما تشتغل ؟؟!!!!!
والأغنية متواصلة !!!!

استجمعت قوتي وحاولت أهدي نفسي .. وبهدوء شغلتها واشتغلت ..
ومشيت في طريقي .. كان كل تفكيري منحصر في شي واحد .. اني فعلا حسيت ان النفس عزيزة على البني آدم .. وحسيت صج ان الله نجاني من هذا الحادث ..
ما فكرت ابدا في شي ثاني ..

وبعدها بفترة .. كنت قاعدة متمللة .. وتذكرت هذي السالفة .. وتذكرت الحادث اللي لولا ستر الله كان رحت فيه ..
ما ادري شلون .. تذكرت هذي الأغنية .. يمتى يا بو صالح تشد المهر ..

تعرفون لشنو توصلت؟؟
عرفت ان الله نجاني من هذا الحادث بفضل امامي المنتظر عجل الله تعالى فرجه الشريف.. ما تتصورون فرحتي وسعادتي ..
حسيت ساعتها بأن اني مقصرة في محبة اهل البيت ومع ذلك الله نجاني بفضل ابو صالح المهدي (عج)..

سبحان الله .. آمنت بالله تعالى ربي .. وبمحمد عليه الصلاة والسلام نبيي .. وبالأئمة المعصومين وبآخرهم الامام المهدي (عج) أئمتي وشفعائي يوم القيامة ..

اللهم كما نجيتني بفضل الامام المهدي (عج) في الدنيا .. نجني به في الاخرة يا رب..

اللهم ارزقنا حب اهل البيت ومن علينا بزيارتهم في الدنيا وارزقنا شفاعتهم في الآخرة .. يالله .. يالله .. يالله..

تحياتي لكم سيف الله