لترطيب أجواء المنتدى .. ولتضكوا قليلاً .. أهديكم هذه القصيدة التي ألقيتها.. في عدة حفلات للزواج الجماعي .. في بعض مناطق البحرين..

طبعاً القصيدة عامية.. وتغلب عليها لهجة قريتي الحبيبة.. وكما تعلمون أن الشعر الشعبي ..ليكون مؤثراً وجميلاً.. فهو لا يقرأ ولكنه يسمع ..لأن القراءة عادة ما تكون صعبة باختلاف اللهجات .. وتبين نقوص في الوزن أو ضبابية في المعنى.. ولكنك عندما تسمعها من كاتبها تزول كل هذه الملابسات..(كنت رافضاً نشرها لهذا السبب ولكن.. نزولاً عند رغبة الأحباء).. ولكني حذفت الأبيات الكثيرة التي لا تناسب المقام هنا.. ولا أدري أن تعكر صفوها ووحدة موضوعها..

و ما بيدنا حيلة إلا لعرضها للقراءة فقط .. العرض الصوتي ممكن ولكني لا احبذه..

حاولوا ان تستمتعوا بالقراءه وموافاتنا بأي إشكال أو خلل أو فكرة غير صحيحة تمر عليكم..

القصيدة :


قلت لأمي أبغي أخطب..قالت إبشر..

هذي والله الساعة لمباركه يوليدى يلزهر..

قلت في قلبي ياويلي الله يستر..

وراح فكري في هواجس أو خيالاته يصور..

شني داعم سكسويل اف يوم عرسي والظهر مني ايتعور..

شني غرقان اف محيط الهادي والدنيه أتمطر..

شني مبطوطه اعيوني أو وجهي مشدب مشنتر...

وشني في الهايوي مسرع وتاير السيارة بنشر..

صرت مفزوع مكدر.. والحلم في عقلي أثر..

قالت أمي يلولد في شنو تفكر..

إنته نام ألحين وباكر..نصطبح والخير نذكر..

وجه صبحنا.. وعلى كل قرية ومدينة قمنا نفتر..

طفنا كرزكان وزرنا حتى لمحرق وعسكر..

ومرة واحدة..قالت أوقف.. لازم يصير لمقدر..

من نصيبك شنها (خاتون) بنت (يوهر)..

ترى بنات الديرة ابسرعة ترى يوليدي تكبر..

إهيَ من عيلة كريمة وخير معشر..

قلت يمه..انا من أكبر شروطي..وما بكثر..

أبغي وحدة عيونها خضرة وراسها أشقر..

وأنا ما أبغي أبنية كل تهدر..

أطمع في وحدة قنوعة أو خلوقة.. وما تعمر..

واااه راح أشحن حياتي فل وعنبر..

وأفرش إلها الأرض مرمر..

قالت إسمع بكرة بتقابله بالسر..

والأبو مو شرط يحضر..

++++++++++++++++++++++++++++

وجيت في اليوم المحدد.. شني عنتر..

عقب ما نظفت جسمي بـ(شام ليدر)..

أوضربت (باليس) وجهي وما نسيت الخشم والشاصي والبمبر..

قلت أتكشخ واغسل أحلى موتر..

وكل شباب الديرة قالوا من بعد قدك يلغبر..

ومن وصلت بيت العروسه.. قامت (الهلهولة) تكثر..

أودخلت برجل يمنى ... وقلت باسم اااه واكبر..

ومن شفتها وقالت الأم +++أني يابتي بتيسر..

قلبي رفرف وهو يتمتم واااه سبحانة الي صور..

قلت ياختي أنا إسمي.. في جوازي شنه (أنور)..

عندي شقة وصالة عودة وسبع احجر..

واشتغل في شركة ( فيصل النوري) للمواتر أوبريتر..

مشترك توني في جمعية عشان أقدر أوفر...

أدري أني شكلي عادي وجهي شنة خبز أسمر..

أنا مؤمن في الزواج الخير كله وبركة لازم بتظهر..

أو سمعت أنه يبيض كل وجه موصوف (جيكر)..

وأدري أنه للشكر والرزق مصدر..

وين ألاقي آدمية ترضى بالحر..

تاكل ايايي عصيدة ترضى حتى العشى (زعتر)..

وأنا جيت اليوم أكمل نص ديني.. وأحفظ الشر..

قلت ألش كل اللي عندي.. دورش اتسألين أكثر...

قالت الدنية غريبة... والحياة مو كلها سكر..

لازم تغير حياتك..وتنقلب معرس مطور..

ولازم شوية تتنازل عن طبايع ما هي محور..

أنت وافقت بشراكة شخص ثاني وانت أجدر..

أني ما حب الجكارة والكدو وخاصة لمبكر..

سكتت فترة..وقالت..الكلام اللي حفضته وينهو كله اتبخر...

أي نعم..شني بوافق.. بشرط واحد ما هو أكثر..

قالت أترجاك ما أَبيك برى البيت تسهر...

وقعد ساكت في مكانه يمخمخ الطاسة ويفكر...

شنه مسبه مسطر..

قال حاضر من عيوني..إلا إن عاد كنت مضطر..

وحددوا موعد (الملجة)... والعشاء كبسة ومحمر..

واشتروا ذاك الذهب من أغلى متجر..

وما رضوا تلبس عروس العز في هاليوم مشمر..

خيطت فستان من دانتيل مشكوك ومخصر..

قالوا بكم البلاوي وظهر المعرس أتكسر..

والمهر ماكان غالي.. لكن الحفلة بحلاوه اتذوقه المر....

إحنا يا بنت الحلال..والشرف تونا على البر..

وعلى مصاريف الزواج هالفقير شيفة بيقدر..

وقبل لا يوصل الشيخ والأوادم تبده تحضر..

لبس بشته وبخره بعود وتعطر..

وطاحت (القحفية) شنها ..للشعر والصلعة فلتر..

وبانت الكشة بآرايل ستلايت لكن مشفر..

وانزهق حف الحواجب والشنب مثلات خنجر..

أو نسف غترته (سبعة) وهو اللي عمره ما تغتر..

وانكتب عقد الزواج بالمبارك الله يسر..

واااه كل شي اف منتدانا فل وسكر..

على أهل الديرة وزع يارفيقي شربة أحمر..

واااه يستاهل المعرس.. أنه نزفه أونفخر...أو معاه الليلة نسهر..

(قال صلوا على محمد.. وعلى أولاد حيدر..

يالله أتبرز يمعرس.. للدلع أشكال وصور..

هذي تبي اتجيب ليها لازم سمبوسه مدور..

هذي تتنسى بلبن عصفور أخضر..

أيه يمعرس لا تغرس وإلا تاخذ كرت أصفر..

وأسألوا في هالسوالف (أبو أحمد) هو أخبر..

أنا با كمل كلامي وخل لعزوبية تحتر..

في الخطوبة إحذر إحذر..

تكتشف أسرار عودة..وينفتح لك عالم الذر..

وسلامتكم،،،،

موفقين