إعـــــــلان

**هالة** **هالة** · 06-05-2013, 12:42 PM

اهلا بك الغالية
ام الفاتح
نورتي ألهندسة الصناعية
بموضوعاتك وحروفك الغالية
بالنسبة للاكسسوارات اكيد لونها
بيتغير مع الوقت ... العرق والجو
اكيد بيأثروا عليها
فيه سلاسل لونها فضي
بيكون سعرها من 2 - 3 جنيه
دي بتفضل محتفظة بلونها شوية
وبالنسبة للذهبي اللون اكيد بيتغير
بسرعة لانها ساعات بتكون الومنيوم مطلي
فيه ورنيش شفاف اسبراي
سعر العبوة تقريبا 7.5 جنيه
ممكن بعد ما تخلصي القطعة
ترشيها وتتركيها تجف براحتها
ولازم اللي بيشتري الاكسسوار
يعرف ان اللون بيتغير مع الوقت
هي مش شارية ذهب
حتى الفضة لونها بيتغير من العرق
ممكن تعملي اكسسوارات باستخدام
سلك النحاس الاصفر بيحتفظ بلونه
فترة ولو غَيَّر ممكن بقشر ليمون
مع الملح تدعكيه يرجع لون افضل
واعملي زرد من سلك النحاس
لان الزرد الذهبي لونه بيتغير بسرعة
اما النحاس فبيحتفظ شوية بلونه
اتمنى اكون افدتك بردي
دمتِ بكل ود
حبيبة قلبي

**ام الفاتح** **ام الفاتح** · 06-05-2013, 06:07 PM

شكرا ليكي جدا مراقبتنا الغالية
واشكر ليكي سرعة ردك عليا
ممكن اسال ايه سمك سلك النحاس
اللي استخدمه في عمل الزرد .
وبالنسبة للمسمار الذهبي كذلك اللي براس
اعمله من السلك النحاس برضه ،
وطب واعمل راسه ازاي .
انا قصدي علي اللي بنهايه
يعني ما ينفعش اشبك فيه حاجه من الطرفين ،
اشبك فيه من طرف واحد بس .
وانا كنت قرات في موضوع استاذ ملك
ان فيه انواع سلك نحاس واحسن حاجة المجلفن
اعرف افرق ازاي بين الانواع دي
وممكن لو سعره واحسن واحد يبيعه
واشكرك جدا مرة اخري

**هالة** **هالة** · 06-05-2013, 07:03 PM

يا هلا بك يا جميلة
بالنسبة لسُمك سلك النحاس
المناسب لعمل الزرد سُمك 1 مللي
مناسب جدا لانه مش لين قوي
و سهل لفه لعمل الزرد
و طبعا حجم الزرد نفسه
بيتغير تبع الحلية اللي حيدخل في عملها
بالنسبة للسلك المجلفن و هو لونه فضي
لا انصح بالعمل به لانه حديد
مُعالج كهربائيا و بمجرد ملامسة الماء
او الرطوبة لونه بيعود حديد و يصدأ
و سعره رخيص جدا حوالي 20 جنيه
لكن سعر كيلو النحاس من عند
الشطاف بحارة اليهود 56 جنيه جميع السماكات
و هناك من يبيعه بأغلى
بالنسبة لشغل الاشجار بالخرز
استخدم سُمك 0.50 يعني نصف مللي
و الاكسسوارات استخدم سُمك 1.2 مللي
مناسب و يتحمل التشكيل
لمتابعة العمل به اضغطي هنا

بالنسبة للمسمار من الممكن طرق
طرف السلك بحيث لا يسمح
بمرور الخرزة منه
او عمل حلقة صغيرة
مثل الخرزة المدلاة في الوسط
في هذه السلسلة
1

**ألوان** **ألوان** · 06-06-2013, 12:02 AM

بصي يا أم الفاتح بالنسبة للنحاس
لمعيه بملمع هتلاقيه ب 10 ج تقريبا
وبالنسبة لقيامة الشغل جربي تروحي ورشة ترشلك الحاجة
بماء الذهب وماء الفضة... طبعا هاتكون اغلى...
والذهب المط اثبت من الذهب العادي
واعتقد كمان بيحطو مثبت

ومع ذلك برضو بيروح لونه مع العرق والكيماويات
(كريمات عطور صابون..الخ)

وبالنسبة للعب حاولي على قد ما تقدري تبعديها عن الاحتكاك
يعني لما تعملي اسورة خليها نازلة منها مش جزء ملامس لليد
جربي تستعملي الجلد او القماش الكوريشة...
عوضا عن السلسلة على الاقل في مكان احتكاكها بالرقبة

**ام الفاتح** **ام الفاتح** · 06-06-2013, 06:41 AM

الحقيقة انا مش عارفة اقول ايه
انتو احرجتوني بذوقكم وردودكم الجميلة عليا والوافية
انا قلت لو حد رد عليا ده كده كويس جدا !!
لكن كده كتير اوي عليا .
بس بما ان انتو رديتو
فانا هسال تاني بقي غلاسة معليش ؟
بس اصلي ما اعرفش حد تاني اساله ويكون فاهم غيركم.
بالنسبة لما يسمي بالذهب الصيني اخباره ايه .
انا جربته في حاجات بسيطة لقيته ثابت
ومش بيغير بسرعة زي السلاسل التانية
فهل ده فعلا صح.
ويا تري فيه منه سلاسل اشكالها متنوعة وكبير
وينفع اضيفله لعب زي السلاسل التانية
لأن بصراحة السلاسل منه اشكالها محدودة
واللي ينفع اشتغل بيه قليل.
فهل فيه منطقة اروحها الاقي فيها السلاسل دي
ويكون فيها تنوع كبير .تنصحوني استخدمها والا لأ
وفيه مكان لبيع الذهب الصيني جمله ؟
لأنها بتبقي غاليه كتير عن السلاسل العادية
وانا مش عايزة ارفع التكلفة عشان ابيع بسعر رخيص .
وهل فيه منه لعب واقفال وميداليات ومسامير والا لأ.
وياريت لو فيه تقولولي على الاسعار
متشكرة ليكو كلكو جدا مرة اخري
وخصوصا استاذة هالة اللي تعبتها معايا اوي .

**ام الفاتح** **ام الفاتح** · 06-06-2013, 06:55 AM

عندي كمان استفسار مهم جدا ؟
ازاي احسب سعر الاكسسوار اللي عملته ؟
لأني بتلخبط في العمليه دي جدا
وبحسب غلط خالص وخسرت في حاجات كتير .
اصل انا بخاف ازود يبقي كتير وحرام عليا
فأنا عايزة احسب صح.
ياريت حد يقولي على طريقة سهلة وبالتفصيل الممل
وكل قطعة احسب شغل ايدي ازاي وربحها ازاي.
بالنسبة بقي للرش بماء الذهب والفضة
ممكن اعرف بيتكلف كام وبيتعمل فين ؟
وانا سمعت ان سلك النحاس في منه الوان
وفيه منه ابيض ؛فالالوان بتروح برضه
هي والابيض والا لأ ،او ازاي احافظ عليها ما تروحش
ممكن استخدم الورنيش الاسبراي والا ما ينفعش .
والا احسن استخدم النحاس الاصفر
اصل انا بحب اللون الابيض اوي في الشغل
بحسه كده راقي وجميل وبيدي احساس الفضه
وانا بحب الفضة جدا.
اشكركم جدا وجزاكم الله خير على المعلومات الجميلة
اللي بتزودوني بيها ويجعله الله في ميزان حسناتكم .

**ام الفاتح** **ام الفاتح** · 06-06-2013, 06:57 AM

على فكرة لسه عندي اسئلة كتير
بس مش راضية اتقل عليكم .
لو زهقتوا قولولي وانا مش هسال تاني وكفايه كده .

**هالة** **هالة** · 06-06-2013, 11:42 AM

مساء الفل عليكِ الغالية
ام الفاتح
مين يزهق من حبايبه
احنا هنا للكل يعني
كل اللي عنده استفسار
حيلاقي الكثير منا يردوا عليه
واكيد بنفيدوا غيرنا من اللي
عنده نفس الاستفسار حيلاقي الاجابة
بالنسبة للذهب الصيني
هو بيجي اكسسوار جاهز
يعني ما شوفتش منه سلاسل
بتتباع لعمل اكسسوار بها
لكن لو حبيتي تسألي
اي حد بيبع الذهب الصيني
ممكن يدلك على اماكن البيع بالجملة
وان كان فيه سلاسل بالمتر منه
وطبعا لو عملتي به اكسسوار
حتحتاجي لزرد واقفال يعني شغلانة
بالنسبة للطلاء بالذهب والفضة
موجود عند ناس كثير
لكن نصيحة انا جربت طلاء الفضة
لسلك النحاس الاصفر هو رخيص
يعني الخاتم بيتكلف 3 جنيه فقط
وده عند طلى في حارة اليهود
والذهب بيتكلف 5 جنيه للخاتم
لكن الاثنين نفس الحكاية
بياخد وقته ويظهر النحاس بعد
فترة قصيرة من الاستعمال
وبالمناسبة هم برضو بيرشوا
قطعة الاكسسوار بالاسبراي بالطلب
نيجوا بقى للسؤال اللي بيحير
كل مصممي الاكسسوار
التسعيير .... بالنسبة لي
انا اخر واحدة تسأليها عن التسعيير
واسألي الحبايب اللي هنا
ههههههههههههههههههه
فيه ناس تقول لك سعر الخامة
وتضربيه في 2 او 3 ويبقى ده
سعر قطعة الاكسسوار
وفيه حد يقول لك
احسبي وقتك اللي اخدته منك القطعة
وحددي لنفسك سعر للساعة
طبعا في الاول والاخر المسألة
مسألة رضا وقناعة
بالنسبة لي اسعاري دايما معقولة
رخيصة كثير بالنسبة لغيري
لاني عندي مبدأ باحسب الخامة
سعرها كام والمواصلات والوقت
واضع شغل ايدي مثلها
واقسم بالتقريب على عدد القطع المُنتجة
مع الاخذ في الاعتبار ان هناك منتج
في السوق صيني برخص التراب
وان فيه حد حيقول لك
انا شوفت كذا ب 2.5 جنيه
لان هناك كثير من الناس
لا يُقدر شغل اليد
وفي الاول والاخر
الرزق على الله
يعني لو بعتي كام قطعة
وجمعتي ثمن الخامة بكل ما تكلفته
فمن الممكن ان تنزلي بسعر الباقي
لانه سيكون خالص لكِ ثمنه
فتح الله لكِ من ابواب خيره
ورزقنا واياكِ القناعة والرضا

**ألوان** **ألوان** · 06-07-2013, 12:41 AM

بالنسبة للدهب الصيني ماعنديش خبرة بصراحة...
اما بالنسبة لل ورش في ورشة لطيفة ما اتعاملتش معها لسة..
اسمها ورشة العمدة في سيدنا الحسين وفيه ورش تانية...

وبالنسبة للتسعير انا واجهت مشكلتك
والله يكرمه زوجي عملي برنامج على الاكسل ادخل فيه القطعة
و تطلعلي التكلفة و نسبة الربح
ان شاء الله اروق بس
وانزلها في موضوع منفصل علشان الكل يستفيد

**ام الفاتح** **ام الفاتح** · 06-07-2013, 10:26 AM

متشكرة جدا مراقبنا العام
الغالية استاذة هالة
علي ردك الجميل والوافي حقيقي متشكرة
وانتظروا مشغولاتي قريبا.

كان في عندي سؤال كمان كده معليش.

انا كنت في سيتي ستارز
وجدت في محلات بتبيع سلاسل وعقود
وسألت قاللي دي فيروز وعقيق وفضة
والسعر بقي ما اقولكيش ؟ 1000و1500 جنيه مصري.
ازاي اعرف افرق بين العقيق الاصلي والتقليد
اللي العقد بتاعه بيبقي 25 جنيه
وكذلك الفيروز غير السعر
لان الواحد بقي يخاف من الغش.

انا عندي عقد عقيق اصلي ونفسي
اغير تصميمه لانه قديم كان بتاع ماما
وادتهولي كنت عايزة اضيفله فضة
فممكن حد يقولي اشتري الفواصل واللعب
الفضة منين وتكون جملة لاني مش عايزة
اتكلف جامد وياريت اللي يعرف يقولي
سعر الجرام جملة هيكون بكام عشان انا
لخمة وبينضحك عليا سهل وشكرا ليكو
جدا .

كمان كنت عايزة اسال انا لو عايزة
اشتري فيروز اصلي او اي حجر تاني
اصلي يكون لونه حلو ويكون سعره
رخيص شويه وجملة عشان فيه ناس
ساعات بتطلب مني الحاجات
(طبعا معظمهم السيدات الكبيرات في السن )
اشتريها منين وسعرها يكون جملة
برضة عشان سعر البيع ما يوصلش
لالف والفين زي اللي انا شفتهم كده
.ومتشكرة ليكو جدا جدا جدا.

**ام الفاتح** **ام الفاتح** · 06-07-2013, 10:40 AM

متشكرة جدا الوان لردك
ويارب يارب تروقي بسرعة جدا
عشان تنزلي لينا البرنامج الرائع ده
واللي فايدته هتعم علي الكل ان شاء الله
شوفي بقي كام واحدة هنا
واولهم مراقبتنا العامة هالة
كانت محتاسة زيي في حساب سعر القطع
هتدعيلك وتدعي لزوجك وان شاء الله ربنا يجعله في ميزان حسناتكم .
بس ياريت بالشرح الواضح والبسيط وبالتفصيل الممل
ايه ده شحات وعايز عيش فينو هههههه
معليش بقي مانتو زي عيلتي واصحابي
ربنا يخليكو ليا يارب .يلا بقي ما تتاخريش علينا
انا مستنيه موضوعك بفارغ الصبر

**هالة** **هالة** · 06-07-2013, 12:07 PM

اهلا بك الغالية
ام الفاتح
تسلمي يا جميلة وزي ما قولت لك
مين يزهق من احبابه؟؟
طبعا واكيد كلنا شوق
لرؤية اكسسواراتك
يلا بسرعة ما تتأخريش علينا

بالنسبة للعقيق اللي بيتباع في الموسكي
العقد بداية ب 12 جنيه على فكرة
مش ب 25 جنيه
ده حجر ملون زيه زي الفيروز
اللي العقد ب 5 جنيه كسر
او حبات خرز او قطعة كبيرة
كل ده عجينة بلون الاحجار
ومُصنعة مش اصلي يعني
جرام الفيروز الاصلي يتراوح ما بين
3 - 15 جنيه
تبعا لشكل القطعة سواء فص
او قطعة خام غير مصقولة
بالنسبة للعقيق الاصلي سعر الجرام
يبدأ من 4 جنيهات
من الممكن ان تجدي الاحجار الكريمة
في منطقة الصالحية وحارة المعز
هناك تُباع بالجرام
في محلات معروف عنها
بيع الاحجار الكريمة والنصف كريمة
بالنسبة للفواصل والحليات الفضة
فهي تباع في محلات بخان الخليلي
ولكن اسعارها غالية لطبيعة المكان السياحية

**ام الفاتح** **ام الفاتح** · 06-07-2013, 03:41 PM

شكرا ليكي جدا مراقبتنا العامة
الغالية هالة
واشكر ليكي ذوقك وسرعة ردك عليا
واشكر ليكي ردودك الوافية
انا مبسوطة فعلا اني معاكو
ان شاء الله مش هتأخر عليكو
بس ادعو لي النور ما يقطعش
وانا برفع الصور

**سمسم هانم** **سمسم هانم** · 06-23-2013, 08:02 PM

حبيبتى ماشاء الله الاخوات كفوا ووفوا
لكن بنصحك انه لو هتشتغلى اكسيسورى
وحابه انه ميغيريش لون اشترى السلاسل من النحاس
واشترى اللعب الدهبى الماكسد مش الدهبى الصريح
لانها بتتحمل جدا وبالنسبه للسلسله النحاس مابتغيرش لون
اى حاجه من النحاس مابتغيرش لون لانها منتج طبيعى
لكن ممكن لونها يطفى فى الحاله دى ممكن تلميعيها
اما بماده الميرور ودى بتبدا من 4 جنيه لحد الكميه الى انتى عاوزاها
او طريقه تانيه ممكن تحطى شويه عصير ليمون على السلسله
وبعد كده تاخديها تغسليها بشويه ميه
هتلاقيها لمعت ونورت ورجعت جديده اهم حاجه فى الطريقه دى
انه تكونى ضامنه انه السلسله من النحاس
وانه اللعب كمان من النحاس والزرد وانه المنتج كله من النحاس
لانه مضمون 100% انه مايغيرش او يعمل اى مشاكل من النوع ده نهائى
اما عن الفضى فى انواع مابتغيرش دى بتسألى عنها الراجل
اللى بتشترى منه تقوليله عاوزه الفضى اللى مش بتغير
افتكر بتكون مطليه روم او استانلس بتغير لون بصعوبه شديده
واى حاجه حابه تسألى انا ممكن اساعدك

إعـــــــلان

تغير الوان الاكسسوارات خاصة السلاسل و حلولها

تغير الوان الاكسسوارات خاصة السلاسل و حلولها

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك