إعـــــــلان

**هند** **هند** · 06-21-2014, 01:38 PM

اكتبى قائمه بكل ما تحتاجيه وضعيها فى مكان قريب منك
حتى اذا تذكرت اى شئ تكتبيه فورا قبل ان تنسيه

تجهيز و وزن الشنط

الوزن المسموح به للحقائب للفرد الواحد فى الطائره
هو 47 كيلو اذا زاد الوزن عن ذلك تدفع نقود مقابل الزياده
فى مطار القاهره يتم وزن شنط العائله معا وليس فرد فرد
يعنى احنا قدمنا جوزات السفر الاربعه معا
والوزن المسموح به لاربع افراد هو
47x4
فوضعوا شنطنا كلها على الميزان مع بعض
و كانت اقل من الوزن المسموح فمرينا بدون مشاكل

*************

اما اثناء عودتنا من مطار جده فالنظام مختلف
مسموح بنفس الوزن لكل فرد 47 كيلو
ولكن تكون مقسمه فى شنط لا يزيد وزن الواحده عن 24 كيلو
ويتم وزن شنطه شنطه واذا زادت عن 24 كيلو
يطلبون منك افراغها فى كارتونه بتشتريها من المطار
ثم يغلفون الكارتونه بالبلاستيك
و تدفعى تمن التغليف 20 ريال يعنى 40 جنيه
غير حق الكارتونه مش عارفه بكام

*************

ولذلك لا تكدسى الشنط بالملابس
ولكن وزعيها على عدة شنط
اولا حتى لا تكون ثقيله على من سيحملها
ثانيا حتى تتجنبى زياده وزن كل شنطه عن المسموح به
و ثالثا لا تنسى انك محتاجه مساحه فاضيه
فى الشنط عشان الهدايا اللى هترجعى بيها

*************

وعلى ذكر الهديا
بنحب دايما نهادى بسجاد الصلاه
اللى فى مصر نفس اللى فى السعوديه وبنفس السعر
فممكن تحددى العدد اللى محتاجاه
وتشتريه من مصر قبل ما تسافرى
يوفر عليك حمله من هناك لان وزنه ثقيل
واشترى من هناك باقى الهدايا

*****************

مهم جدا تكتبى الاسم والعنوان ورقم التليفون على الشنطه من بره
لان شنط كتير متشابهه وده هيسهل عليك معرفة شنطك
او قد يردها احد اليك اذا ضاعت لا قدر الله
ممكن تكتبى على الشنطه بقلم كوريكتور او اقلام ماركر
على حسب نوع الشنطه ولونها
ولو عايزه تحافظى على الشنطه من غير كتابه
ممكن تلزقى عليها ورقه بالبيانات وتغطى الورقه
بالسيلوتب عشان تتحمل
وتاخدى بكره السيلوتيب معاكى لان اللزق ممكن يفك

*************

فى شنطه يدك او الهاند باج اللى هتاخديها معاكى
وانتى طالعه الطياره
ممنوع تماما وضع اى شئ معدنى
زى المقص القصافه سكينه
اى شئ معدنى سيجبروك على التخلص منه
والحل هو وضع هذه الاشياء فى الحقائب الكبيره
وليس فى شنطه اليد

**************

ممكن تاخدى شنطه كبيره من الشنط البلاستيك
تطويها وتضعيها فى اى شنطه
هتحتاجيها لوضع الملابس المتسخه

تقريبا دى كل الملاحظات الخاصه بتجهيز الشنطه نفسها

**هند** **هند** · 06-21-2014, 01:44 PM

والحديث الان عن محتويات الشنطه

الملابس

حاولى قدر الامكان اختيار ملابس قطنيه وملابس لا تحتاج للكى

وما يحتاج للكى منها خذيه مكوى ورصيه
فى الشنطه بطريقه جيده تحافظ عليه

الملابس البيضاء غالبا تكون شفافه
فمن الافضل ان تحرمى فى ملابسك العاديه
و ممكن تكون الطرحه بيضاء كفايه قوى
لكن لو مصره على الملابس البيضاء فتأكدى ان مش شفافه

الرجال طبعا لهم الازار والمئزر(بشاكير الاحرام البيضاء)
وكذلك الاطفال الذكور يحرمون مثل الكبار بالبشاكير البيضاء

طبعا هتحتاجى (شبشب للحمام والوضوء وغيره)
اللى انا عملته انى اشتريت حذاء بلاستيك
اولا شكله جميل حتى ان معتمره غير مصريه
اوقفتنى فى الحرم لتسألنى
انا شارياه منين عشان تجيب زيه
قلت لها انا جيباه معايا من مصر
ثانيا رخيص
وثالثا ممكن تروحى بيه المسجد او اى مكان
و وقت ما تحبى تتوضى مش هيبوظ من الميه
ورابعا مريح جداااااااااااا
يعنى لم ارتد الحذاء الجلد
غير وانا رايحه من مصر للسعوديه وانا راجعه و بس
وفر عليا كتير قوى من متاعب الاحذيه والكعوب العاليه

**هند** **هند** · 06-21-2014, 02:01 PM

حاجات صغيره كتير ومهمه جدا لازم تكون معاك

قلم لانك هتملى استمارات كتير فى المطار

كتيب لمناسك العمره والادعيه

بكره سيلوتب زى ما ذكرت قبل كده

شنطه وسط للرجل ليضع فيها الموبايل والنقود وقت الاحرام

دبابيس كبيره لبشاكير الاحرام

كميه زياده من دبابيس الطرح

مقص وقصافه

خيط وابره

عند الاحرام ممنوع استخدام اى شئ معطر حتى الصابون
فخذى معك صابونه جلسرين غير معطره
لتستخدميها وقت الاحرام

ممكن تاخدى حبل غسيل وشويه مشابك
احتياطى لو احتاجتى حاجه تتغسل
بتطلعى على سطح الفندق تعلقى الحبل
فى اى حاجه وتنشرى غسيلك
وبينشف بسرعه جدا من الحر

ادوات حلاقه الذقن للرجال
وماكينه حلاقه الشعر

فرشاه اسنان ومعجون
ادوات العنايه والنظافه الشخصيه لكل فرد

الضغط فى الطياره
بيكون مزعج جدا ويؤذى الاذن
ولكن يقال ان مضغ اللبان يساعد فى التقليل من اثر الضغط
فضعى فى حقيبتك بعض اللبان

الموبايل

شاحن لكل موبايل اذا كان كل موبايل له نوع شاحن خاص
وعلى ذكر الموبايل سألت اشغل خاصيه التجوال
ولا اشترى خط سعودى
الكل نصحونى بعدم تشغيل خاصيه الجوال لانها غاليه جدا
الاتصال الدقيقه ب 5 جنيه والاستقبال الدقيقه ب 2 جنيه
فاشتريت خطوط سعوديه ثمن الخط
25 ريال

وسعر الدقيقه تقريبا نصف ريال لاى مكان
فى السعوديه او مصر يعنى جنيه
وسعر الخط بتاخديه كله رصيد
يعنى مش بتحتاجى تشحنيه باى مبلغ تانى
الا ان كنتى رغايه هههههههههههه

**هند** **هند** · 06-21-2014, 02:03 PM

الادويه

لو حد بيحتاج علاج معين طبعا هتاخدى علاجه معاكى
لو عايزه تاخدى انسولين
ابسط فكره هى انك تضعيه فى زجاجه بلاستيك صغيره
تمليها بالماء البارد او ماء بالثلج
الماء هيحافظ عليه مسافة الطريق
ولما توصلى تشيليه فى ثلاجه غرفتك

خدى معاك ادويه زياده زى
فيتامين سى
ادويه مطهره للمعده فى حاة التقاط اى عدوى
ادويه للبرد
زيت ومرهم للوقايه من التسلخات وعلاجها ان حدثت
حاجه للصداع
لصق جروح
مرهم مضاد حيوى

طبعا ممكن ماتخديش حاجه وتشترى من هناك لو احتاجتى
لكن اولا هتشتريه غالى
ثانيا ممكن تلاقى الصيدليات فى مكان بعيد عنك

**هند** **هند** · 06-21-2014, 02:06 PM

الاكل

الناس قدمت لى نصايح مختلفه جدا
هو الاكل متوقف على حسب ميزانيتك
ممكن ما تخديش اى حاجه وتعتمدى على الشراء من هناك
فيه حاجات سعرها قريب من السعر عندنا لكن فرق العمله بيعمل مشكله
مثلا اشتريت من مصر باكيت شاى فتله ب 5 جنيه
ولما خلص واشتريت نفس الباكيت من هناك
ب 6 ريال يعنى ب 12 جنيه
وهكذا
كوب الشاى فى الفندق لو عايزه تريحى نفسك خالص
وحتى ما تعمليش شاى
سعره 5 ريال يعنى 10 جنيه
استخدمنا 3 باكيتات شاء فتله يعنى حوالى 75 كوبايه
لو واخده الشاى معاك من مصر هيكلفوك حوالى 15 جنيه
وبحسبه بسيطه تلاقى لو شربتيهم من الفندق
هيقفوا عليكى ب 750 جنيه

كل حاجه هناك بضعف سعرها فى مصر بسبب فرق العمله
اما اسعار الخضار والفاكهه حاجه تانيه خالص هههههههههه
العنب و المانجو مثلا ب 20 ريال
يعنى كيلو العنب ب 40 جنيه عمار يا مصر والله

الاختيار التانى واللى عملت بيه

انك تاخدى حاجات خفيفه و معلبه تنفعك على الاقل فى الفطار والعشا
جبنه فيتا جبنه نستو تونه لانشون بلوبيف جبنه رومى
اكياس صلصه طحينه سمنه
ممكن تجمدى اكياس فول وتاخديها معاك او فول معلب
فيه ناس بتحمر لحمه وتجمدها اتخدها
او كفته ارز تحمريها بتعيش مش بيجرالها حاجه
حتى لو بره التلاجه

لو كنتى بتحبى المخلل خدى معاك لان صعب تلاقى هناك
ليمون وطماطم وخيار
طبعا معالق وسكينه
اكواب بلاستيك
اطباق فوم واطباق استانلس
مفيده جدا لتسخين الاكل او تقديمه
مربى وعسل بس ياريت تنقليهم لبرطمانت بلاستيك
لان الزجاج ممكن ينكسر
كاتيل لعمل الشاى
هتحتاجى سخان كهربى وده من الحاجات القليله
اللى سعرها هناك ارخص من مصر
فى مصر بيعدى ال 100 جنيه
هنال ب 35 ريال يعنى 70 جنيه
وبعض الفنادق بيكون فيها سخانات
فمفيش داعى تجيبيه معاك من مصر
ان احتجتيه اشتريه من هناك
فيه فنادق كمان فيها اطباق ومعالق وكاتيل
لكن دى حاجه تتوقف على حظك فى الفندق اللى هتنزلى فيه

**هند** **هند** · 06-21-2014, 02:18 PM

ما تنسيش الرحله الى جده ثم المدينه المنوره طويله جدا جدا
وصلنا مطار القاهره الساعه 5 مساء
ووصلنا المدينه المنوره الساعه 7 صباحا
غير المشوار لمطار القاهره نفسه
كل ده معناه انك هتحتاجى اكل للطريق وميه وعصير وترمس شاى

*******************

الماء فى فنادق مكه والمدينه غير صالح للشرب
يستخدم للاستحمام للوضوءللغسيل ولكن ليس للشرب
فإن كان مكان اقامتك قريب من الحرم
ممكن تاخدى زجاجات فاضيه معاك كل يوم
وبعد ما تقضى وقتك فى المسجد
تملى الزجاجات من كولديرات المسجد
وومكن طبعا تشترى زجاجات المياه المعبأه من السوبر ماركت

**هند** **هند** · 06-21-2014, 02:22 PM

واخر نصيحه احب اقولها
خاصه بماء زمزم

الناس اللى كانوا معانا فى الرحله
اشتروا زجاجه ماء زمزم ب 30 ريال وحملوها فى ايديهم
فاجبروهم فى المطار على تغليفها بالبلاستيك ودفع 20 ريال
تبقى زجاجه الماء وقفت عليهم ب 100 جنيه

لكنى اخدت بنصائح اصدقائى
فملأت الزجاجات من ماء زمزم من كولديرات الحرم مجانا طبعا
تركت جزء صغير فارغ فى كل زجاجه حتى لا تنفجر من الضغط فى الطائره
ووضعت كل زجاجه فى كيس بلاستيك وربطها
ووضعتهم فى شنط الملابس
وبذلك احضرت كميه كبيره من ماء زمزم
وفرقت على كل حبايبى ولم ادفع ولا مليم

************

ارجو ان تفيدكم هذه النصائح
واخيرا اتمنى لكم جميعا ان تزورا الحرم حاجين ومعتمرين قريبا ان شاء الله

والسلام عليكم ورحمة الله وبركاته

**نااانو** **نااانو** · 06-21-2014, 03:04 PM

رحلة مبروكة ونصائح جميلة عن تجربتك
بارك الله فيكِ هنودة
وحمدالله على سلامتكم وعقبال المرة القادمة
بس اقولك على سر
مش انا اللى بعمل الحاجات دى وقت السفر
بتتعملى
أدم هو اللى بيجهز الورقة والقلم
ويكتب كل حاجة نحتاجها فى الرحلة
حتى لو لمصيف
بحكم شغله وسفرياته الكثيرة لخارج القاهرة
وحواء هانم
هههههههههههه
شكرا حبيبتى على نصائحك الجميلة

**SaMaR_ BakR** **SaMaR_ BakR** · 06-21-2014, 03:51 PM

كنت فين قبل ما اسافر؟
هههههههههههه
أنا معاكي فى كل اللى قلتيه
مفيد جدا أفادنى انا شخصيا

فيما عدا موضوع الدوا
لو عاوزة تاخدى معاكى من مصر أوك
لكن موضوع اغلى فى السعوديه
ده لأن المادة الفعاله فى منتجات ادوية السعودية اقوى

واسعار بعض الأدوية ارخص هناك
زى مثلا البنادول بانواعه البرد والصداع وفى لآلام العظام كمان
اغلى فى مصر عن السعودية بالضعف تقريبا

رحله عمره سعيده
وعمرة متقبله
وعقبال الحج أن شاءلله

شكرا هنودة
عجبتنى الصور أوى المتضمنه
وخصووصا صورة البيبي فى الشنطة
عسل
شكلها يا قلبي مرعوب تتساب كده
هههههههههه

تسلمى

**هالة** **هالة** · 06-21-2014, 07:21 PM

كل مرة وانتِ طيبة
يا حاجة هنودة
اكيد نصائح مفيدة جدا
لكل مسافر خصوصا
عمرة او حج
تمام كل اللي قولتيه
عن توضيب الشنط وتجهيزها
فقط اضافة صغيرة عن وضع الملابس
في الشنطة دون ان " تتكسر "
لف البنطلونات بالنسبة للرجال
وبرمها يحتفظ بها سليمة
ولا يأخذ حيزا كبيرا
بالنسبة للدواء مثلما قالت
سمورة
المادة الفعالة فيه اقوى
من مثيله في مصر
اما بالنسبة للاكل فعند سفري للحج
وجدت ان الجبن سعرها اقل
اذا اخذتها من مصر
ولا احبذ اخذ لحوم مُجهزة من مصر
فما يوجد هناك يكفي
الا اذا احببنا ان نوفر ونأكل كويس
ههههههههههههههه
فالرحلة سواء كانت عمرة او حج
لا يحتمل وقتها طبخ وعبادة
بعودة حبيبة قلبي
وتسلمي على النصائح
الاكثر من رائعة
بارك الله فيكِ

**منى سامى** **منى سامى** · 06-23-2014, 06:17 AM

هنوده حبيبتى موضوع جميل قوى ومفيد
انا عملت كدا بالظبط
الحمد لله ماعاده العلاج اخدت علاج قليل ما اعرفشى اننا هنعدى بعض هناك
اضطريت اشترى دوا كان غالى جدا
بس الحمد لله عدت على خير وكانت رحلة جميلة جدا بعودة يارب
احنا وكل مشتاق
لكن نصائحك جميلة جدا وربنا سخرلنا ناس بصراحه افادونا جدا
عقبال الحج ياقمر انا وانت وجميع احبابنا

**هند** **هند** · 06-23-2014, 06:11 PM

ناانو
مش انا اللى بعمل الحاجات دى وقت السفر
بتتعملى
أدم هو اللى بيجهز الورقة والقلم
ويكتب كل حاجة نحتاجها فى الرحلة

ادم ده ربنا يخليهولك
عمله نادره هههههه حافظى عليه
وربنا يخليكوا لبعض
وتحضروا شنطه الحج سوا ان شاء الله
شكرا لك حبيبتى

**هند** **هند** · 06-23-2014, 06:21 PM

سمر
كنت فين قبل ما اسافر؟

كنت لسه ما سافرتش
ههههههههههههه
بالنسبه لموضوع الدوا فيه فعلا ادويه ارخص من عندنا
لكن فيه اغلى كمان
ولما كنا فى المدينه كانت الصيدليات بعيده لازم تركبى مواصله
عشان توصلى صحيح مواصله 5 دقايق بالعربيه مثلا بس فين تلاقى العربيه اصلا
لكن فى مكه الصيدليه كانت بجانب الحرم
وكل واحد على حسب حظه فى مكان الفندق اللى هينزل فيه
شكرا لك سموره
وعقبال الحج لك ولاسرتك ان شاء الله

**هند** **هند** · 06-23-2014, 06:33 PM

هاله حبيبتى
حلوه فكره لف البنطلونات
توفر المساحه وتحافظ عليها لو هى مكويه
بالنسبه للاكل كل واحد وميزانيته وظروفه
مثلا عشان معايا كريم وهو متعود ياكل وجبات صغيره
لكن ياكل مرات كتير كان لازم
اخد اكل يناسبه ويلاقيه وقت ما يجوع
مش كل شويه انزل اجيب اكل
كمان طعم الاكل غريب وتوابله غريبه
والرز البسماتى عديم الطعم واللون والرائحه ههههههههه
عمار يا مصر والله العظيم
نورتينى حبيبتى
وربنا يوعدك بزياره الحرمين مره تانيه
مع كل حبايبك

إعـــــــلان

اول مره اسافر بره

اول مره اسافر بره

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك