إعـــــــلان

**Amany Ezzat** **Amany Ezzat** · 06-30-2014, 04:07 AM

حرف اللام

لاجىء

حابس ضناه بين ضلوعه
يابس وحايموت بجوعه
قاعد ما يعملش حاجه
لابس هدوم مش بتوعه
لاجئ قابلته فى غزه
وله عيون مشمئزه
راحت فلسطين وراحت
البيارات لما لاحت
على التلال المدافع
وريحة الحرب فاحت
وفى الصفوف الطويله
جرجر عياله النحيله
شيع جنازة الوطن
لحد لما اندفن
والقاتل الوغد ساقه
قدامه من غير كفن
ميت وقبره الخلا
والغسل سيل الفلا
الرمل يسخن ويبرد
وهو هايم مشرد
مع الطابور اللى رايح
إلى المصير المجرد
وفى الطابور ألف أسره
وخمسميت ألف حسره
حسرة عذارى حزانى
ع الخوخه والبرتقانه
اللى الشباب لم قطفها
والموت خطفهم خوانه
يا ويل كعوبك يا لميا
الرمله لسعتها حاميه
الرمل ساخن بيكوى
خالد بيصرخ ويعوى
مجنون فى أول حياته
" يحرق سماه إيش بسوى "
وتستمر الجنازه
وللجبال اهتزازه
الحرب سحقت أملهم
لما صبح فى خيالهم
زى الرمال بيخوضوها
زى الطحين اللى جالهم
من الإيدين السمينه
اللى رمتهم رهينه
على الرمال كوموهم
تحت السيول نيموهم
وكمموا معين بسيسو
من بعد ماكمموهم
علشان معين المناضل
بيقول يا ويلك يا قاتل
يا معين يا صوت الضحايا
إرعد بصوتك معايا
إرعب عدوى وعدوك
راح ننتصر فى النهاية
خلى اللى حابس دموعه
يبكى بفرحة رجوعه
للبيارات الحبيبه
بعد الرمال الرهيبة
اصرخ فى شعبك وقول له
ساعة خلاصك قريبه
انهض وكافح وطهر
البرتقال راح يزهر

حرف الميم

المجتمع

المجتمع ليام دى مسكين ، عنده برد ،
مزكوم ، وحالته بالقوا ،

فى الاجزاخانه شفته بيجيب الدوا ..
وسأل على مناديل ورق ،
وحشر فى جيبه منها طرد ،
أصله – يا عينى – قبل ما يروح السبق ،
خد دش سخن ، وتنه خارج فى الهوا ..
بقى ده كلام ؟

مع انى ياما قلت له : يا مجتمع ،
شوف صحتك ، وماتفتكرش إنك جدع ،
الجو برد مش تمام ،
بلاش أمور الشيطنه ،
بلاش دلع ،

واوصف له حالة الجو تانى ، وأنصحه ..
يقول لى : سيبك ، جو إيه ؟
بونجور يا بيه ..
ماتقول لمصلحة السياحة ، تصلحه !
آدى يا سيدى المجتمع !

المماليك

زمن المماليك
حاجه رومانتيك

ابطال حواديت
تحت الشبابيك

رايحين جايين
بهدوم كده شيك

بوشوش حمرا
لون عرف الديك

راكبين على خيل
الله يعطيك

يعملوا حركات
يضربوا مزازيك

يلعبوا بالسيف
لعب يسليك

يضحكوا وياك
و يغزوه فيك

غير الخوازيق
بقى و المشايك

و اسياخ النار
اللي تدفيك

حاجه تخليك
تشكر اهاليك

اللي ما ولدوك
زمن المماليك

مدد

بيرم يا تونسى ، بديع أيا خيرى ،
مدد مدد ، يا شيوخنا يا أقطاب ..
احضرنا يا حسين يا شفيق مصرى ،
والنجدة يا عبد السلام يا شهاب ..
والنجدة يابن الليل وابو بثينة ..
يا سعيد يا عبده ، يا مصطفى يا حمام ،
محمود يا رمزى نظيم ، تعال الينا ..
ومدد يا عبد الله النديم يا امام ،

مدد يا عزت صقر ، يا خليل نظير ،
مدد يا شيخ يونس يا قاضى مدد ..
هاتوا الزجل ، شماريخ ، وصواريخ تطير،
لسه الحاجات اياها .. ماليه البلد !

معنى الكلام

معنى الكلام – والسلام – فيه دوشه ع المسكن.
معنى الكلام .. صلوا ع اللى القلب له مسكن
معنى الكلام .. امسكوا فى أصل السبب مسكا
أصل السبب دوله ناميه وراميه فوق خالص ،
والهمه فى القمه واخدة حدها خالص ..
خدوا منى كلمة ، وحكمه من دهب خالص :
"مين فيها خالص ، ومين مش فيها يتمسكن "

معنى الكلام – بالتمام – يا حكم يا محلى ،
نغنغ ، ولعلع ، بتنظيم ريفى ومحلى ،
الكل تنه ف محله ، وتنى فى محلى ،
نتغدى ونحلى ، ونزور بعض فى المسكن !

**Amany Ezzat** **Amany Ezzat** · 06-30-2014, 04:14 AM

حرف النون

ناصية الشارع

بالأسبرين ... والسكاكين
وبالمسدس مقتولين
على أعمدة كل الجرايد مصلوبين
شبان صغار
أزهار فى فجر العمر ما شافتش النهار
متكلبشين فى الزنازين أو مغروزين
فى الطين فى قصر النيل وعايزين غطاسين
ع المشرحة إنسان نحيف
بشنب خفيف أصفر لطيف
خدوده من قيمة يومين مش محلوقين
صوابعه من شرب السجاير محروقين
عينيه على جدار الفراغ متسمرين
وعلى الجبين رفرف سلام الميتين
ما تسألوش كان اسمه إيه
إسمه على المحضر بقى المجنى عليه
إسمه بقى الجثة فى أوراق الدوسيه
ما تسألوش عن قصته كان موته ليه
المسألة صبحت فى إيد المسئولين
على ذمة التحقيق سجين
إنسان حزين
فى قلبه إحساس الغريق
مالهش عون
فى دماغه أكتر من حريق
لابس قميص مربعات وبنطلون
وف رجله صندل من زمان مالهش لون
يبص على آخر الطريق
يلاقيه ما بين رجليه تمام
ثابت عليه الاتهام
وحياته بين الناس حرام
حرام عليه يركب ترام
حرام عليه الأتوبيس
حرام عليه الأرصفة والفوانيس
والمدرسة والسينمات
مكتوب عليه يعيش مابين المحابيس
فى اللومانات
ما تسألوش ده يبقى مين
شفتوه وبتشوفوه كتير فى الجرانين
بلاش سؤال
على كل حال
المسألة صبحت فى إيد المسئولين
على ناصية الشارع أمين
واقف مع حسين واسماعين
وبنيامين
متسرحين ومشمرين
وشوية يوصل مصطفى وعبد السلام
ويبتدى يحمى الكلام
ويغمزوا بعينهم ويمكن يشتموا
ويقولوا لفظ بذئ وهما بيضحكوا
ماتفرحوش لما تشوفوهم من بعيد
نازلين هزار وقزقزه
وماتقلوش ياريت زمان التلمذه
يعود علينا من جديد
بيشتموا
وف كل قلب صراخ يحاول يكتمه
بيضحكوا
وف كل صدر عويل ونار راح تهلكه
وتفرتكه
ماتفرحوش
وفكروا إزاى نحوش
اللى حايشرب له قزازة أسبرين
واللى حايطعن أمه أربع سكاكين
من قبل ما الميت يموت
من قبل ما الأيام تفوت
والمسألة تصبح فى إيد المسئولين

نهاية الاسطوره

أدى نهاية الكبر والمباهاه
والكدب لما يصدقه اللى رماه
لحد ما الصدمة تجى مداهماه
ومحولة الخمرة إلى مقاياه
وممرغاه يندب على قتلاه
بنى إسرائيل العقل منهم تاه
فى متاهة الأساطير يا ولداه
والحقد ضيع رشدهم وطفاه
خلطوا ما بين البطش والمعاناه
واحتاروا : هم غلابا والا عتاه
شعب اتلعن م الرب والا حاباه
والرب رب الكون والا أداه
مخصوص لهم ؟ سبحانه فى علياه
الرد جالهم يعدل الموازين
على أيد جنود من مصر ، بنى آدمين
لا مختارين م المولى ولا ملاعين ..
بس الوطن لابد يحموا حماه

حرف الهاء

الهلال الجديد

هل هلالك شهر مبارك
يشبه ضحكه سهيانه
ضحكه مخبية معبيه
ضحكه مليانه
أسرار خفيانه
آه يانا يا جديد من سرك
آه يانا يانا
غمضت عينيا على هلالى
وندهت لأصغر أطفالى
سيبته دروسه
لجل استفتح شهرى بصورته
وف قورته أبوسه
واستنى الخير من دنيانا
أنا بوسته و فتحت
بصيت له و سرحت
كان راخر برضه ، بيضحك لى
ضحكه سهيانه
مليانه أسرار خفيانه
يا محتار يانا

**Amany Ezzat** **Amany Ezzat** · 06-30-2014, 04:19 AM

حرف الواو

و قال يا بلد

نعم . . بورسعيد الفكرة والبرهان ،
فى لمعة عيونه من ميدان لميدان ،
فى برق انفجار الصخر ، فى مصنع انفتح ،
فى طلقة صاروخ ، أو فى ارتفاع بنيان ..

حى العرب صامد ! ..
علم العرب صاعد ،
بإيدين عرب خلان
وجمال ..
وجمال بيتكلم ،
ويصحى ، ويعلم ،
ويسلم الفتيان ،
وطن ، مالوش غالب ،
مايميلش على جانب ،
ويبادى بالاحسان ..
وطن بلا صحرا ،
وطن بلا فقرا ،
وحياة بلا أحزان ..

وقال : يا بلد ، خلينى واحد من العدد.
قالت له البلد : ما فى سواك ربان.
وقال : يا بلد ، عاهدينى ع الصبر والجلد.
قالت له البلد : كفك يابو الشجعان!

وكيل

و بهيه في المحاكم
شدت واحد وكيل
عند البوفيه كان واقف
بيشرب جنزبيل
و الجنزبيل ده اصله
للصوت مالوش مثيل

مكتوب عليه في مجلد
"مرافعات هابيل"
يشرب منه المحامي
يمسح اجدع زميل
و يفحم النيابه
و يقصف النخيل
و بهيه ماشية جنبه
في كوريدور طويل
تشرح له و هي تبكي
و تبلل مناديل
و تقول له : كتير عليا
يقول لها : قليل
اتنين ريال يا وليه
مبلغ تافه ضئيل
خدي بالك م الفصاحه
و من العلم الاصيل

و الاش لما يحصل
مفعول الجنزبيل
عنها و دخل ع القاضي
دخلة ابو زيد تقيل
خبط الترابيزه و قال له
انا طالب التأجيل

حرف الياء

يا سلام يا دكتور

أظن ، ياملهمانى الفن والأشعار.
وقلبى : بلاصك ، اللى بتطلعى به الفجر ..
من بعد اذنك ، بلاش – النوبه – م الترعة ،
امليه لى من عند ابو البالطو النضيف لابيض ،
وقولى له ، يازينة الجدعان ، صباح الخير ..

حلال عليك المدارس ، والأدب ، والعلم ،
حلال عليك غلب أهلك فيك ، عشان تكبر ،
وتبقى عالم ، حكيم ، تشفى البلد م الداء ..
وتقول: يا " بلهارسة"، ياهارسه القلوب، روحى ،
وتعالوا يا فلاحين ، خدوا بعض بالأحضان.

الفلاحين صفر ، لكن صلبهم جامد ،
شالوا الجبال ، قلقلوها ، وهم لسه صفر ،
اشحال بقى ، لما يجرى الدم فى خدودهم ،
بدال ما يجرى – مع الروح نفسها – فى البول.
وقولى له : يازينة الجدعان ، براوه عليك ،

ندرن علينا ، نهار ما بالسلامه نقوم ،
لنعملوه عيد ، وترقص فيه أمواتنا ! ..
أجدادنا من عهد فرعون ! .. كلهم نادرين ،
م الموت يقوموا ، وييجوا ، ينقطوا الزفة !
يا سلام يا دكتور .. ده يوم زى " الجلاء " ذاته.

يا وحوي

من قبل رمضان بجمعه الهرس دار فى الدار
شالوا الموبيليا وحطوا العفش بالمندار
بالمكنسه دور وبالفرشه سبع تدوار
صبح البلاط زى خد المزمزيل ناعم
والشقه بصت لهيلتون نفسه باستحقار

جابو قمر دين وتين وزبيب وصنيبر
ومكسرات فى شكارات مقفولة بالميبر
فاضل فى شعبان تلات ايام ياشحيبر
راح تعملم ايه فى رمضان ابقوا تعالو لنا
والكل بات فى حسابات تلخم يهود خيبر

رمضان دخل . . كل عام وانتم بخير قالوا
مشاوير كتير مشوروا واتحطوا واتشالوا
علشان كنافة " ميدان الست " واحتالوا
حتى الولد لما راح – واتهربد القفطان
اضطر ينزل معاه البيه يجيبهاله

ومن حوارى " الحسين " راحو اشتروا الطرشى
خيار ولفت وبصل ولمون قديم محشى
فوق البوفيه رصوا برطماناته ولاساعشى
أحمر وبنى وبمبه وعنبرى واصفر
ويومين يا دوبك ده كله يروح ما يرجعشى

السمن نازل يرف . . وكانوا جايبين كوم
والبيت معبأ بريحه قلى طول اليوم
فيشاوى بالليل ومن بدء النهار النوم
ولا شغله ولا مشغلة غير بس " ياوحوى "
والكل فاطرين ياعينى ولم لهم فى الصوم.

دى كانت مجموعة من أروع أزجال صلاح جاهين
أكيد مكاملين ولون جديد من جاهينيات

**Amany Ezzat** **Amany Ezzat** · 07-02-2014, 10:37 PM

أشعار و قصائد

الدرس انتهى

الدرس انتهى لموا الكراريس
بالدم اللى على ورقهم سال
فى قصر الأمم المتحدة
مسابقة لرسوم الأطفال
ايه رأيك فى البقع الحمرا
يا ضمير العالم يا عزيزى
دى لطفلة مصرية وسمرا
كانت من أشطر تلاميذى
دمها راسم زهرة
راسم راية ثورة
راسم وجه مؤامرة
راسم خلق جباره
راسم نار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتهى
لموا الكراريس ..

ايه رأى رجال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفم
دم الطفل الفلاح
راسم شمس الصباح
راسم شجرة تفاح
فى جناين الاصلاح
راسم تمساح
بألف جناح
فى دنيا مليانة بالأشباح
لكنها قلبها مرتاح
وساكتة على فعل الأباليس
الدرس انتهى
لموا الكراريس …

ايه رأيك يا شعب يا عربى
ايه رأيك يا شعب الأحرار
دم الأطفال جايلك يحبى
يقول انتقموا من الأشرار
ويسيل ع الأوراق
يتهجى الأسماء
ويطالب الآباء
بالثأر للأبناء
ويرسم سيف
يهد الزيف
ويلمع لمعة شمس الصيف
فى دنيا فيها النور بقى طيف
وساكتة على فعل الأباليس
الدرس انتهى لموا الكراريس

قصيدة رائعة فى رثاء جمال عبد الناصر

وقف الشريط

1

وقف الشريط فى وضع ثابت

دلوقت نقدر نفحص المنظر
مفيش ولا تفصيلة غابت
وكل شئ بيقول وبيعبر
من غير كلام ولا صوت
أول ما ضغط الموت
بخفة وبجبروت فى يوم أغبر
على زر فى الملكوت
وقف الشريط في وضع ثابت
دلوقت نقدر نفحص المنظر
أنظر تلاقى الراية منشورةْ
متمرغة لكن ما زالت فوق
بتصارع الريح اللى مسعورةْ
وانظر تلاقى جمال
رافعها باستبسال
ونزيف عرق سيال على القورة
وفْ عنفوان النضال
وقف الشريط في وضع ثابت
انظر إليه شوف قبضته السمرة
وعيونه ثورة مكحلة بثورة
وصدره عرض الأرض حاضن مصر
والشام وليبيا وتونس الخضرة
والقصبة وفلسطين والأردن المسكين
والبحر والبساتين والصحرا
وف عز طحن السنين
وقف الشريط في وضع ثابت
انظر وشوف ع المهل بالراحة
الشمس وسط القبه قداحة
والناس بعيد فى الظل مرتاحة
ومصر واقفة صبية فلاحة
على كتفها بلاص
فيه ألف تقب رصاص
والمية منه خلاص
شلالها فى الرمل غاص
صبية حلوة كأنها تفاحة
لكنها من الحزن دابت
وسط السواد ندابة نواحةْ
ولما هل بطلها فى الساحةْ
بالحب والإخلاص
وقف الشريط في وضع ثابت
خلى المكنجى يرجع المشهد
عايز أشوف نفسى زمان وانا شب
داخل فى رهط الثورة متمرد
ومش عاجبنى لا ملك ولا أب
عايز أشوف من تانى واتذكر
ليه ضربة من ضرباتى صابت
و ضربة من ضرباتى خابت
و ضربة وقفت بالشريط فى وضع ثابت
قال المكنجى : رجوع مفيش
عيش طول ما فيك أنفاس تعيش
وبص شوف
ركن الشباب فيه ألف مليون شب

**Amany Ezzat** **Amany Ezzat** · 07-02-2014, 11:10 PM

في ذروة حرب الاستنزاف التي شنتها القوات المصرية
ضد الكيان الإسرائيلى الغاصب
شنت القوات الجوية الإسرائيلية غارة عنيفة على
أحد المنشآت الصناعية الكبيرة في مصر .
كانت الغارة المذكورة تستهدف مصنع أبو زعبل
التابع للشركة الأهلية المصريةللصناعات المعدنية
مما أسفر عن حرق المصنع و استشهاد 70 عامل عربي مصري
وقد كتب الشاعر صلاح جاهين
قصيدته المشهورة أبو زعبل ليعبر عن استشهاد
هؤلاءالعمال الأبرياء من أجل الوطن
وتنبأه بأن أرواحهم لن تذهب هباء وانما فداء لرفعة الوطن
وتحرره من الاستعمار الإسرائيلي

1

عناوين جرانين المستقبل

احنا العمال اللى انقتلوا
قدام المصنع فى ابو زعبل
بنغنى للدنيا ونتلو
عناوين جرانين المستقبل:
"وحدة صف الأحرار"
"جبهة لكل الثوار"
"عبور الجيش لسينا"
"الزحف من الأغوار"
"جيش العدوان يتقهقر"
"الأرض قايدة نار"
"والبحر قايد نار"
"الاستعمار أثبت فشله"
"البيت الأبيض لا يخجل"
"إحنا العمال اللى انقتلوا"
"قدام المصنع فى أبو زعبل"
بنغنى للدنيا ونتلو
عناوين جرانين المستقبل:
"محكمة للمجرمين"
"قائمة بالمتهمين"
"إدانة مستر نيكسون"
"بقتل الاسطى ياسين"
"القاتل استعمارى"
"القتلى وطنيين"
"عمال مدنيين"
"نصارى ومسلمين"
"مرتكبو المذبحة يعتقلوا"
"الحكم عى المتهم الأول"
احنا العمال اللى انقتلوا
قدام المصنع فى ابو زعبل
بنغنى للدنيا ونتلو
عناوين جرانين المستقبل:
"الجو غدا يتحسن"
"معرض لزهور السوسن"
"الخطة الخمسية تنفذ"
"مهرجانات النصر غدا"
"تصفية الصهيونية"
"دولة فلسطين .. تعلن"
"دستور وقوانين .. تعلن"
"حرية الدين .. تعلن"
"قوس تذكارى جارى عمله"
"طالين منه احنا وح نفضل"
احنا العمال اللى انقتلوا
قدام المصنع فى ابو زعبل
بنغنى للدنيا ونتلو
عناوين
جرانين
المستقبل

ذكريات صعبة ومؤلمة لكن تاريخ
ربنا يرحم الجميع

وعلى ذكر الشهداء والاموات
قصيدة بخط يد الراحل العظيم

1

**Amany Ezzat** **Amany Ezzat** · 07-03-2014, 12:01 AM

نادرا ما جمع إنسان فى طيات نفسه كل هذه المواهب
فقد كان جاهين شاعرا لا مثيل له و كأنه يتحدى العالم
بقدرته على التعبير عما بداخله بأى شكل و بأى وسيلة

أغانى صلاح جاهين .. الوطنية و الرومانسية

اغانى وطنية

ح نحارب

ح نحارب
ح نحارب
كل الناس ح تحارب
مش خايفين
م الجايين
بالملايين ح نحارب
ح نحارب
حتى النصر
تحيا مصر
تحيا مصر

الله معك

يا صابر الصبر الجميل الله معك
ما أروعك يا شعبنا وما أشجعك
جرحك فلسطين يِوْجَعك تزداد وجود
وتحول الأحزان بارود فى مصنعك
والله معك .. الله معك .. الله معك

دلوقت فى البساتين أوان عطر الزهور
لهفى عليه هناك مفيش من يعشقه
إحنا ورا الأشواك وسبعين ألف سور
والعطر ما يرضى بسوانا ينشقه
تطلع زهور البرتقان
تشبه عيون فتيان عرب
تبص للأرض بحنان
وتبص للجانى بغضب
يغضب نسيم البحر والأمواج تثور
يا شعب يا منصور تعالى بمدفعك
الله معك .. الله معك .. الله معك

يا أرضنا المسجونة سجنك راح يزول
شعبك على الأبواب مسلح بالأمل
كلمة فلسطين زى دقات الطبول
بتدوِّى وتحمِّس وتدفع للعمل
راجعين بقوة السلاح
راجعين فى بحر من الدِما
راجعين كما رجع الصباح
من بعد ليلة مُعتِمة
راجعين سيول .. من الصحارى للسهول
زى الرسول يا شعب نازل ينفعك
الله معك .. الله معك .. الله معك

يافا .. وشباك انفتح يوم الرجوع
طَلُّوا من الشباك جميع أهل الوطن
إحنا هنا يا شمس يا طير يا ربوع
عُدنا وخَدْنا التار من عار الزمن
ده حلم .. لكن له معاد
شعب العروبة يحققه
وعدوِّنا لو زاد وعاد
قوة سلاحنا تسحقه
الفجر طالع مين يحوشه من الطلوع
ويا شعب يا ممنوع يا ويل من يمنعك
الله معك .. الله معك .. الله معك

الأرض

الفاس بيجرحنى
الأرض قالت آه
رديت وأنا محنى
آه منك انتى آه

الأرض قالت حنّ
طيرّتنى فتافيت
رديت وقلبى يئنّ
وأنا مين يجيب لى مُغيت
منك ومن عشقك
يا اللى عشان رزقك
عمرى فى يوم ما بَوِنّ

عينى عليكى سنين
مَحْنى عليكى أب
عَبِّيت فى بطنى طين
ولغيرى عَبِّيت حب
أنا حالى من حالك
عَتَبك على مالك
يا أرض يا فدادين

خليك جمل يا جدع خليك يا خلى
متباع ومَشْرى بحق رغيف يا تملى
الأرض أبعد عليك ولا السما قل لى
قالوا السما للملايكة وإحنا لينا الأرض
يا ريتها تصبح لنا والهم ده يولى

واسينى واسينى
يا أرض يا عروستى
عمرك ما تنسينى
ولا حضنى ولا بوستى
دانا يوم ما أنول يدك
وأختم على عقدِك
الريح يَرِّسينى

الجنة هى بلادنا

الجنة هى بلادنا
وجهنم هى حدودنا
اللى يخطيها
راح يهلك فيها
ويدوق الموت على إيدنا

اليوم ده بعده مفيش
غير مجد عز وحرية
لو متنا ولادنا تعيش
ونعيش فى الأجيال الجاية

ح نعيش ونشوف مصر سعيدة
نعيش ونشوف دنيا جديدة

وكفاحنا يكون بكرة قصيدة
توصف أيام ثورة مجيدة

يا شباب اليوم ده كفاح
اتسلح وامشى ويانا
وإن كان ما معاكش سلاح
قاتل بإيديك العريانة

دافع عن شمس الحرية
عن شرف الراية المصرية

وشعوب الأمة العربية
انت وهى وحدة قوية

فليحيا كفاح الشعب
فليحيا كفاح المصريين
موت يا استعمار بالرعب
الشعب بيزحف بالملايين

الشعب الثاير أهو جالك
تلاقيه فى يمينك وشمالك

وبفاسه بيهد آمالك
بيقطع لك كل حبالك

يتبع

**Amany Ezzat** **Amany Ezzat** · 07-03-2014, 12:18 AM

المسئولية

- آديك أهه خدت العضوية ،
وصبحت فى اللجنة الأساسية ،
أبو زيد زمانك ، وحصانك :
الكلمة ، والخدمة الوطنية. .

ودى مسئولية

- دى مسئولية عزيزة عليا ،
معزة الروح ، والحرية ،
معزة العسكرى لسلاحه ،
وأكتر ، لكن أنا إيه وحديا ؟
مفيش أنا ، فيه إحنا يا صاحبى
أنا وانت ، وانت ، وهو ، وهيه ،
علينا نعمل الاشتراكية
من كلمة حلوة ، للقمة حلوة ،
وبيت وكسوة ، وناس عايشين،
آدى القضية .
- مفيش محال ، والعزم معانا ،
والعلم بينور دنيانا ،
والفكر بيجسم أحلامنا
قدامنا ، شايفينها ، وشايفانا . .
شايفين رايتنا ف حضن النسمة ،
مرفرفة بستاشر نجمة ،
على مدينة عربية ،
معرفش من أى الأقطار .
. . حرية ، واشتراكية ، ووحدة ،
مكتوب حروفها بمليون وردة ،
على صدر بلدة عربية ،
معرفش من أى الأقطار ،
صناعة كبرى ، ملاعب خضرا ،
تماثيل رخام ، ع الترعة ، وأوبرا ،
فى كل قرية عربية ،
دى ماهيش أمانى ، وكلام أغانى ،
ده بر تانى ، قصادنا ، قريب ،

يا معداوية

ريسنا ملاح ، ومعدينا ،
عامل وفلاح ، من أهالينا ،
ومنا فينا الموج ، والمركب ،
والصحبة ، والريس والزينة ،
نفوت على الصحرا ، تخضر ..
نشقى ، خدود الناس تحمر ..
والمسئولية ما بين أحضاننا ،
مجاديف ، تقربنا من البر ،
أصغر مهمة ، برضك مهمة ،
دى الثورة همة ، وذمة ، ودين ،
وإنسانية ..
أحلف بقرآنى ، وإنجيلى ،
بهدف عظيم ، دايما ينادي لى ،
بالمعركة ، وسهرها ،
بالقاهرة ، وقمرها ..
بالقاهرة اللى ما حد قهرها ..
أحلف بكل بطل فى عمل ،
بالفلاحين ، بالعمل ،
بالفن اللى بيدينا أمل ،
وبالجنود على كل حدود ،
وبالميثاق ، اللى جعلته منارى ودليلى..
أحلف بكل صبى ، وصبية ،
بعيونهم الحلوة العربية ،
بجمال ، وجرح قديم فى جبينه .
أحلف وأعاهد ، أعيش مجاهد ،
والرب شاهد إنى أمين
ع المسئولية .

- نحلف يمين بالله تعالى ،
نحلف بقوتنا الفعالة ،
الاتحاد الاشتراكى العربى .
نختاره مبدأ ، ورسالة ،
ومسئولية

النيل

النيل ،

العملاق الجميل ،

فايت على البلدان ،

نشوان ..

ويميل ،

ينعس تحت النخيل ،

وينادى على أسوان ،

بحنان …

" كليوباترة .. كليوباترة " ..

يا حمام رخام .

وحدى جاى من قلب صحرا ،

وعطشان كلام …

عطشان يا صبية ،

وأنا ميه سلسبيل .

ويفوت ،

لابس لولى ، وياقوت ،

النيل أبو صولجان ،

سلطان . . .

ويروح

الأقصر ، وينوح ، ويبوح

بكلام ما قالوش إنسان ،

ولا جان . . .

" نفرتارى .. نفرتارى " .

يا بنت الإله ،

وحدى جاى وسط البرارى

وعطشان حياة . . .

عطشان يا صبية ،

وأنا ميه سلسبيل .

أسيوط

أم النبق زغنطوط ،

ومنفلوط رمان ،

حران . . .

وهناك ،

ملوى فى الشباك ،

والنيل فايت ، غضبان ،

فيضان . .

" نفرتيتى .. نفرتيتى " ..

فينك من زمان ،

رحتى فين ، وفين مشيتى

ده أنا جاى لك عطشان . .

عطشان يا صبية ،

وأنا ميه سلسبيل .

**Amany Ezzat** **Amany Ezzat** · 07-03-2014, 12:47 AM

الوحدة

إحنا الوحدة وأمتها
إحنا زُراع كرمتها
إحنا كتاب كلمتها
إحنا الأمة العربية

كلنا روح واحدة ما بتفْرق شماليه من جنوبيه
وحده أُمال إيه يا حبيبى
وحده شولكان يا بيا

يا مرفرف على شمالى
يا قلبى قل لى مالى
نسمة هوا الشمالى
هزتنى هزة قوية

تسلم يا حب الأوطان
يا مجمع شمل الخلان
من طنطا وحِمْص وأسوان
والسلوم واللاذقية

كلنا روح واحدة ما بتفرق شمالية من جنوبية
وحده أُمال إيه يا حبيبى
وحده شولكان يا بيَّا

يا ليل يا عينى أوف يابا وأوف يا خى
عرب الشمال والجنوب اتجمعم فى حى
دقة قلوبهم غنا ونظرة عيونهم ضَىّ
اليد فى اليد زى السد فى القوة
متوحدين بالأُخوَّة وياما غيرهم جَىّ

وحدة وإحنا صناعها
وراية واحدة بنرفعها
وقلعة بتحميها سباعها
وتحمى العزة القومية
وحدة وأفراح وأغانى
يهنالِك يا أوطانى
جيشنا الأول والثانى
بحدود الجمهورية

كلنا روح ما بتفرِق شمالية من جنوبية
وحدة أُمال إيه يا حبيبى
وحدة شولكان يا بيا

شولكان باللهجة السورية معناها الحرفى أمّال إيه

أول مايو

من بين إيديك خدت الدواية والقلم

من بين إيديك خدت الورق

والمكتب اللى قصادى وأنا باكتب إليك

صنعة إيديك

كل اللى عينى تشوفه من صنعة إيديك

فستان حبيبتى والهرم

حديد كبارى النيل وأسفلت الطريق

أوتار كمنجات النغم

سيجارتى والأتوبيس وسارية العلم

وكل نجمة فى العلم وكل لون

غزلتهم نسجتهم صبغتهم نور من عينيك

الله عليك

تسلم إيديك يا أبو الايدين الشغالين

يا أبو الايدين الحمالين

يا أبو الايدين البنايين

يا أبو الايدين السقايين الخبازين

الخلاقين من العدم

مايو ابتدا

يا أبو الايدين الورد عرقانين ندى

دورت عجلات الزمان

يا أبو الايدين المغاوير

تنباس إيديك والا يلفوها ف حرير

أنا باقول لأ تمسك القلم

أيامنا الحلوة

هناك قدام عينينا
جايب معاه مصانع

أيامنا الحلوة جاية
السد العالى طالع

جايب معاه مزارع
جايب الاشتراكية
وجاية فى الطريق
وبقى بحق وحقيق
الشغل ف قلبه شُعلة
يملا العيون بريق

يوم ما نسفت الجبال
لتأميم القنال
فى كل قلب قايمة
تحمِّس الرجال

ونور فى كل بيت
ولا محتاجة لياريت
جاهد واسهر ليالى
راح تبلغ ما اشتهيت

أيامنا الحلوة هلت
والحلم ظنونه ولت
السد آهه بيعلى
الشغل لما يحلى

فجرت فجر بكره
وجعلت اليوم ده ذكرى
الثورة ثورة دايمة
حوالين السد هايمة

عاوزين غيطان جديدة
أحلام ماهيش بعيدة
يا اللى تريد المعالى
وابنى لك سد عالى

باحب السلام

باحب السلام
باحبه كأنه وليدى
وباصحى وانام
وغصن الزتون مَلوْ إيدى
وقلبى مُناه
ما يبقى على الأرض شر
باحب الحياة
باحب جميع البشر
باحب السلام وباحبك يا شابة
وباحلم كتير بحياتنا سوا
لكن فيه سحابة على الدنيا هابّة
ما نقدرش منها نشم الهوا
ولو قلنا بكره
ما نعرفش بكره ح يجرى لنا إيه
وياما ح يجرى
ما دام فيه خطر وإحنا ساكتين عليه

تعالوا يا كل الشعوب قرّبوا
تعالوا نقف صف واحد منيع
عشان الربيع
عشان شابة حلوة بيعشقها شاب
عشان يبقى للطفل أب
عشان يبقى للأم طفل رضيع

بالأحضان

بالأحضان بالأحضان بالأحضان

بالأحضان يا بلادنا يا حلوة بالأحضان

فى معادك يتلموا ولادك

يا بلادنا وتعود أعيادك

والغايب ما يطيقش بعادك

يرجع ياخدك بالأحضان

بالأحضان يا حبيبتى يا أمى

يا بلادى يا غنيوة ف دمى

على صدرك أرتاح من همى

وبأمرك أشعلها نيران

ياما لفيت سواح متغرب

وأنا دمى بحبك متشرب

أبعد عنك قلبى يقرب

ويرفرف ع النيل عطشان

ياما شفتك ع البعد عظيمة

يا بلادى يا حرة يا كريمة

وزعيمك خلاكى زعيمة

فى طريق الخير والعمران

اتقويت ورفعت الراس

وبكيت فرحة وشوق وحماس

وبقيت ماشى ف وسط الناس

متباهى بوطنى فرحان

بالأحضان يا مصانع يامزارع

بالأحضان

يا حصاد الثورة يا حلم وعلم

بالأحضان يا جناين يا مداين

بالأحضان

يا اللى انت بترفع راية السلم

نور عينى وحبايبى

وعزاز قوى على قلبى

يا اللى على الجرار وقصاد لهاليب الصلب

يا سواعد عربية

ونفوس حرة أبية

يحميكم وتدوم الهمة ويحيا الشعب

وبالأحضان

بستان الاشتراكية

افتح افتاح
اقفل حول
نقعد نرتاح
لأ ح نكمل

ده السد العالى شهل

على راس بستان الاشتراكية

واقفين بنهندز ع الميه

أمة أبطال عُلما وعمال

ومعانا جمال :

بنغنى غنوة فرايحية

ننده كلنا ندهة فلاح لاخواته ساعة الرى

حاكم أرضنا ملكنا كلنا م السد العالى وجى

ننده كلنا ندهة قوية

افتح

افتح على حوض الورد أبو تمانين مليون شجراية

أول مايو

من بين إيديك خدت الدواية والقلم

من بين إيديك خدت الورق

والمكتب اللى قصادى وأنا باكتب إليك

صنعة إيديك

كل اللى عينى تشوفه من صنعة إيديك

فستان حبيبتى والهرم

حديد كبارى النيل وأسفلت الطريق

أوتار كمنجات النغم

سيجارتى والأتوبيس وسارية العلم

وكل نجمة فى العلم وكل لون

غزلتهم نسجتهم صبغتهم نور من عينيك

الله عليك

تسلم إيديك يا أبو الايدين الشغالين

يا أبو الايدين الحمالين

يا أبو الايدين البنايين

يا أبو الايدين السقايين الخبازين

الخلاقين من العدم

مايو ابتدا

يا أبو الايدين الورد عرقانين ندى

دورت عجلات الزمان

يا أبو الايدين المغاوير

تنباس إيديك والا يلفوها ف حرير

أنا باقول لأ تمسك القلم

**Amany Ezzat** **Amany Ezzat** · 07-03-2014, 12:59 AM

إحنا الشعب

إحنا الشعب إحنا الشعب
اخترناك من قلب الشعب
يا فاتح باب الحرية
يا ريس يا كبير القلب

يا حلاوة الشعب وهوه بيهتف باسم حبيبه
مبروك ع الشعب خلاص السعد هيبقى نصيبه
وإحنا اخترناك
وح نمشى وراك
إحنا الشعب

إحنا حياتك وابتساماتك وانت حياتنا
إحنا بنفرح وأنت بتفرح من فرحتنا
كل ما نكبر قلبك يكبر بمحبتنا
وإحنا اخترناك وح نمشى وراك
إحنا الشعب

يا اللى بتسهر لجل ما تظهر شمس هنانا
إحنا جنودك إيدنا فى ايدك مصر أمانة
بكره وطننا ح يصبح جنة وانت معانا
وإحنا اخترناك وح نمشى وراك
إحنا الشعب

يا اللى واعدنا بأيام عيدنا هل هلالك
بكرة يا بكرة مشتاق نظرة لسحر جمالك
بكرة بطلنا بجهد عملنا يحيى آمالك
وإحنا اخترناك
وح نمشى وراك
إحنا الشعب.

كلام فى السياسة

ما ليش كتير فى السياسة
لكن بافكر
وماليش كتير فى الكلام
لكن باعبَّر
من قلب مليان حماسة
وباقول كلام فى السياسة

باحلم تملى بالسعادة والأمان
باحلم أعيش من غير ما أخاف غدر الزمان
وإن جيت ونلت المنى
يصعب عليا الهنا
من غير ما يتهنوا جميع الناس كمان
ما أسعدش غير ف وطن سعيد من حواليا
سمّوا الشعور ده حب والا اشتراكية
ماليش كتير فى السياسة

أوقات أحس كأنى على مفرق طريق
أحتار ويصبح قلبى فى الأفكار غريق
ولما أشور الجيران
وأشاور الخلان
رأى الصواب يظهر جرئ وله بريق
وأحس رأى حبايبى بينور عينيا
سموا الشعور ده حب والا ديمقراطية
ماليش كتير فى السياسة

بينى وبين أيامى حرب ما تنتهيش
وزى كل الناس باموت علشان أعيش
أتمنى أروح عندهم
جهدى على جهدهم
يصبح وجودنا قوة بعد ما كان مفيش
وأنا إيش أكون وحدى لولاش بلدى عليا
سموا الشعور ده حب والا تعاونية
ما ليش كتير فى السياسة

أنا قلبى مليان حماسة
لكل شئ حُر صادق
ما ليش كتير فى السياسة
لكن باحب المبادئ
وباحب صاحب المبادئ
الاشتراكية
الديمقراطية
التعاونية

محلا الغنا

محلا الغنا بعد الرصاص ما اتكلم

على الجزاير يا سلام وسلم

سلم على المدفع وقول له كفاية

ماتوا الأعادى . . واللى عاش اتعلم

يا جزاير اللهب اطرحى ورد أبيض

خلى الجبال تلبس عروسة وتنهض

أمر البلاد لابن البلاد اتفوض

يا كبريائى وفرحتى وعيونى

جاكى السلام

عزة ومقام

كأن شعبك عمره يوم ما اتألم

محلا الغنا . . بعد الرصاص ما اتكلم

أحب اشوفك يا رايات فى النسمة

بترفرفى ع الذكريات مبتسمة

سبع سنين دم الجزاير فاير

وألف ألف شهيد . . وهى الكلمة

فيه معجزات

زمانها فات

ودى معجزات الشعب لما يصمم

محلا الغنا . . بعد الرصاص ما اتكلم

محلا الغنا والحب والملاغية

وياكى يا جزاير أيا عربية

وياكى يا شموسة فى البدرية

طالعين شعاع فى شعاع دراع فى دراع

نهدم قلاع . . ونحرر " الحرية "

نهزم طغاة . .

نرفع جباة . .

ونقيم حياة . . إنسانها ما يتظلم

محلا الغنا بعد الرصاص ما اتكلم

**Amany Ezzat** **Amany Ezzat** · 07-03-2014, 01:16 AM

مقاومة مقاومة

مقاومة مقاومة مقاومة

إصرار وعناد ومداومة

الحق هو الحق

ما عندناش مساومة

ويا بخت الشهيد

يا بخت الشهيد . . شهيد المقاومة

ح يعيش من جديد

فى كل ضحكة وبسمة

فى كل غنوة عيد

فى الوطن العربى المتحد الحر السعيد

ح يعيش من جديد الشهيد

فى صرخة الوليد من دهشة الحياة

وطرقة الحديد ورفعة الجباه

لفوق لفوق لفوق يا أسماء الشهداء

تل الزعتر وصابرا

وشاتيلا وغيرها بكره

من مذبحة للأخرى

عايشين بلا انتهاء

مقاومة مقاومة مقاومة

ويا بخت الشهيد

أحكم يا شعب

أُحكم يا شعب
اُحكم يا شعب
وخد بنفسك مكانك
الأمر صعب
والنهى صعب
إمسك بِيدَّك ميزانك

أُحكم وقول
يا بلادى كونى سعيدةْ
عيشى فى أيام مجيدةْ

وأحكم وقول
يا بلادى كونى سعيدةْ
عيشى فى أيام مجيدةْ
وأحكم يا شعب
ابن الغيطان
أبو الغيطان
كان حانى عوده على العيدان
رفع قوامه
وقال كلامه
سمعنا صوته فى البرلمان
وأنا أقول وأقول
فى مجلس الأمة قلبى
هو اللى عارف مطالبى
وأحكم يا شعب

إيدين بتزرع وتصنع
وإيدين بتبنى وترفع
رفعت أسامى أسامى
يا نايب الشعب يومك
فى كلمتك كل قومك
أخطب ودافع وحامى
ورِّينا منك عجب
واحكم على شمس بكره
تجمع ولاد العرب
على كلمة واحدة وفكرة
عيوننا طالة عليك
وقلبنا نِفسُه يفرح
وَرِّينا قوة إيديك
وأحكم على الصخر يطرح
وأنا أشوف وأقول
فى مجلس الأمة قلبى
هو اللى عارف مطالبى
وأحكم يا شعب

أغنية للقطن

يا معجبانى يا أبيض يا معجبانى
يا قطن يا اللى مبيض وش الغيطانى
يا معجبانى يا أبيض يسعد صباحك
يا قطن يا اللى مبيض وش فلاحك
وبعودة الأيام يا حبايب فى سلام
وبلدنا عروسة لابسة التوب أبيضانى
يا معجبانى يا أبيض يا معجبانى
سهروا الجدعان ليالى على المراوى
مواويلهم والليالى تسقى التقاوى
كل الغناوى فيها طبيب مداوى
والزرعة لم ييجيها كانى والاّ مانى
فى عينين كل الناس . . يقفوا لك حراس
يا قطن لما تنوّر على العيدانى
يا معجبانى يا أبيض يا معجبانى
الحلوة القطن نوّر ما بين إيديها
والسعد قمر مصوّر قايل عليها
شدت حزامها ورنت بخلخاليها
جَنِت المحصول وغنت أحلى الأغانى
قطن يا قطن يا قطن . . تعالىَ لى بالحضن

ولا أحطك غير فى عبى من فيض حنانى
يا معجبانى يا أبيض يا معجبانى

راية العرب

عجبى على راية العرب فى الريح
فى الأرض ثابتة وفى السما تفاريح
والنجمتين الخضر بيبصوا لنا
وبيقولوا لنا بكل عربى فصيح
الوحدة الوحدة الوحدة
مجد العرب فى الوحدة

الوحدة راية ونجمتينها صبايا
علشان عيونهم ياما راحوا ضحايا
شجعان زمان فرسان حروب الوحدة
من دمهم نبتت وصبحت راية
وكم شهيد وسط الميدان وجريح
هتف وقال بكل عربى فصيح
الوحدة الوحدة الوحدة
مجد العرب فى الوحدة

يا نجمتين يا خُضْر يا عيون بلدى
باحبكم حبى لبنتى وولدى
حبى لأبويا وأمى يا نجوم رايتى
باحبكم حبى لعزى ومجدى
وزى ما العربى كلامه صريح
أنا أقول بكل عربى فصيح
الوحدة الوحدة الوحدة
مجد العرب فى الوحدة
زى الربيع ما لابد يوفى بوعده
لابد يوم كل العرب يتحدوا
ونجمة خضرا بعد نجمة حاييجوا
يتقابلوا فى الراية مكان ما اتواعدوا
ويرفرفوا فى العيد على المراجيح
وهناك يقولوا بكل عربى فصيح
الوحدة الوحدة الوحدة
مجد العرب فى الوحدة
عجبى على راية العرب
عجبى ! !

زفة

محلاك يا مصرى وإنت ع الدفة
والنصرة عاملة فى القنال زفة
يا ولاد بلدنا تعالوا ع الضفة
شاوروا لهم
غنوا لهم
وقولوا لهم
ريسنا قال .. مفيش محال
راح الدخيل وابن البلد كفى

حيوا الرجال السُّمر فوق السفينة
حيوا اللى جاهدوا عشان ما يفرح وادينا
نظرت لنا الدنيا وشافت عملهم
مَدحِتْ بكل لسان على كل مينا

أنا قلبى فاكر لسه مين اللى جارحه
ولولا يوم النصر ما اتلم جرحه
شفت القنال فى إيدين رجال من بلادى
رفرف عليهم قلبى من كتر فرحه

حبايبنا شرق وغرب جايين بلدنا
والورد والياسمين هدية ولادنا
ونسيمنا بالأحضان يقابل راياتهم
وقنالنا يحكي لهم حكاية جهادنا

**Amany Ezzat** **Amany Ezzat** · 07-03-2014, 01:51 AM

ثلاثى رائع اجتمعوا على حب مصر
و عشق الرئيس الراحل جمال عبدالناصر
و قدموا لنا صورة غنائية رائعة
العمالقة صلاح جاهين و كمال الطويل و عبد الحليم حافظ

1

صورة

صورة صورة صورة
كلنا كده عايزين صورة
صورة للشعب الفرحان
تحت الراية المنصورة
يا زمان صورنا
صورنا يا زمان
ح نقرب من بعض كمان
و اللى ح يبعد م الميدان
عمره ما ح يبان فى الصورة
خضرة و ميه و شمس عفية
و قبة سما زرقا مصفية
و نسايم سلم و حرية
و معالم فن و مدنية
و مداين صاحية الفجرية
على أشرف ندهة و أدان
دى بلدنا مصر العربية
صورة منورها الإيمان
صور يا زمان
على مدد الشوف مدنة و مدنة
دى لصلاتنا و دى لجهادنا
مدخنة قايدة قلوب حسادنا
تحتها صلب كأنه عنادنا
و قدامه من أغلى ولادنا
عامل و مهندس عرقان
شبان و الشبان فى بلدنا
فى الصورة فى أهم مكان
صور يا زمان
كلنا هنا فى الصورة زمايل
نوفى اللى ميثاقنا عليه قايل
من أصغر طفلة بجدايل
على زرع ودرس بتتمايل
للفلاح أبو خير و جمايل
للواعظ حافظ القرآن
للجندى الأسد اللى شايل
على كتفه درع الأوطان
و بعيد عن العين
لكين فى الصورة أوضح
ناس تحت حر الجبال
و القلب كله حماس
بتفجر الرمل أنهار من دهب إسود
و ناس بتكسيه بخضرة
و كل لون له ناس
و أساتذة و علما و معامل
و دكاترة من الشعب العامل
و رجال سكر على مكاتبها
تخدم بالروح لما تعامل
و الصورة ما فيهاش الخامل
و الهامل واجبه و نعسان
ما فيهاش الا الثورى الكامل
المصرى العربى الإنسان
صور يا زمان

ثوار

ثوار . . ولآخر مدى ، ثوار ..

مطرح ما نمشى ، يفتح النوار ،

ننهض فى كل صباح ، بحلم جديد ،

ثوار ، نعيدك يا انتصار ، ونزيد ،

وطول ما إيد شعب العرب فى الإيد ،

الثورة قايمة ، والكفاح دوار

من أرضنا هل الايمان ، والدين

عيسى ومحمد ثورتين خالدين ،

والعلم ثورة ، ومن هنا قامت ،

والفن والحرية ، والتمدين

ثوار ، نهزك يا تاريخ ، تنطلق ،

نحكم عليك يا مستحيل تنخلق ،

نؤمر رحابك يا فضا ، تمتلئ ،

والخطوة منا . . تسبق المواعيد .

الشعب قام ، يسأل على حقوقه ،

والثورة زى النبض فى عروقه ،

اللى النهارده يحققه ، ويرضاه ،

هو اللى بكرة ، بهمته ، يفوقه …

ثوار ، مع البطل اللى جابه القدر ،

رفعنا راسنا لفوق لما ظهر ،

بوسنا السما وياه ودوسنا الخطر ،

والعزم ثابت والعزيمة حديد .

تعالوا يا أجيال ، يا رمز الأمل ،

من بعد جيلنا ، واحملوا ما حمل ،

وافتكروا فينا ، واذكرونا بخير ،

مع كل غنوة من أغانى العمل …

هيلا هيلا ، ثورتنا عمل وجهاد !

هيلا هيلا ، هبوا ، واصنعوا الأمجاد !

هيلا هيلا ، وابنوا فوق بنا الأجداد .

أول طريقنا بعيد و آخره بعيد

و طول ما إيد شعب العرب فى الايد

الثورة قايمة و الكفاح دوار

و الله زمان يا سلاحى

و الله زمان يا سلاحى
اشتقت لك فى كفاحى
انطق وقول أنا صاحى
يا حرب والله زمان

والله زمان ع الجنود
زاحفة بترعد رعود
حالفة تروح لم تعود
إلا بنصر الزمان

هموا وضموا الصفوف
شيلوا الحياة ع الكفوف
يا ما العدو راح يشوف
منكم فى نار الميدان
يا مجد يا مجدنا
يا للى اتبنيت عندنا
بشقانا وبكدنا
عمرك ما تبقى هوان

الشعب جبال الشعب بحور
الشعب بيزحف زى النور
زلزال بيشق لهم فى قبور
بركان غضبان بركان بيفور

لجل السلام والأمل والحياة
شيلنا السلاح ورعانا الإله
نناضل نناضل
نناضل بعزم وإيمان

أقسم بوحدة بلادى
وبثورتى وجهادى
ما يعود على الأرض عادى
ما يسود غير الإنسان

**Amany Ezzat** **Amany Ezzat** · 07-03-2014, 02:17 AM

مسك الأختتام لهذا الجزء
أغنية من أجمل الأغانى الوطنية

يا أهلا بالمعارك

يا أهلاً بالمعارك
يا بخت مين يشارك ،
بنارها نستبارك ،
ونطلع منصورين ..
ملايين الشعب ، تدق الكعب ،
تقول : كلنا جاهزين !

خارج ساعة الصبحية ،
والناس رايحين جايين ،
نظرتهم فكرتنى ،
بأيام ستة وخمسين . .

راجع فى المغربية ،
شفت عيون الثوار . .
نظرتهم فكرتنى ،
بالضباط الأحرار . .

شفت اجتماع سياسى ،
كلماته نغم حماسى ،
ولا فيش على قده كراسى ،
من كتر ما فيه ملايين …

وف لحظة نطل . . ويهدا الكل .
ونسمع فرحانيين . .
عبد الناصر، حبيبنا
قايم بيننا يخاطبنا ،
نجاوبه ويجاوبنا . .
قائد ومجندين

"قول ما بدالك
إحنا رجالك
ودراعك اليمين . .

عبد الناصر يقول :

" الله أكبر ، ويوم الأزهر فى وجدانى ،
يا شعب ، قمنا لقهر الصعب من تانى ،
وعود معنديش ، مفيش إلا النضال عندى ،
وشقا ومعارك مريرة كتير يا إخوانى "

" اطلب تلاقى ، تلاتين مليون فدائى ،
فى جميع الميادين "

عبد الناصر يقول :

" على كل باب فى الميثاق ، مصباح يهدينا .
نشوف جهادنا العظيم على فين مودينا .

للأفراح والرفاهية ،
ح نمد طريق ع النيل ،
اسمه فى الاشتراكية ،
التصنيع التقيل ،

بس نضاعف إنتاجنا ،
أضعاف أضعاف أضعاف ،
وندبر مهما احتجنا ،
نتحدى الإسراف ،
وبقرش الادخار ،
نتحدى الاستعمار ،
ونقيم جدار جبار ،
يحمى حياة العاملين ..

آدى نقطة بنقطة
جميع الخطة ،
وبالله نستعين

خطتنا خلاص فى إيدنا ،
وخلاص متشمرين
وحزين يا اللى تعاندنا ،
بتعاند جبارين ..

جبل الجرانيت انشق ، انشال ،
وف بحر النيل انزق ، أمال ،
ما فى حاجة تقول لنا لأ ، إيش حال
يوم تحريرنا فلسطين ..

والتوبة التوبة التوبة ،
نصبر على غدارين ،
وحياة الدم الغالى ،
وحياة عرق الجبين ،

توبة ما عاد فيها مجاملة ، خلاص..
ولا عاد م الثورة الشاملة ، مناص ..
يا ايدينا العامله ازرعى إخلاص
واحصدى والرب يعين ..
احصدى وانقضى
اكشفى وارفضى
خاينين وإنتهازيين

ح نشق طريقنا ،
بنور مبادئنا ،
ولنا النصر المبين
ويا أهلاً بالمعارك

يا بحر الثورة يا هادر
خلى هديرك بنظام
من صوت المكن الداير
عين العدو مش حتنام
وأنت يا شبابنا اتقدم ،
جه دورك فى التاريخ ،
بإيديك لازم تتقدم ،
مصر ف عصر الصواريخ.

وشبابنا نهض يا حبايب ،
قال : جه دورى مانيش هايب
يسلم لى الشعر الشايب
والناس المخلصين .

للمخلصين .. ألف سلام !
للاشتراكيين .. ألف سلام !
الحقيقيين .. ألف سلام !
لجمال وإخوانه .. ألف سلام !
يحيا لأوطانه .. بألف سلام !
وأنا وأنت وهو .. بخير وسلام !

وسلام مننا ، لمنى قلبنا !
الوحدة .. الكبرى ..
ونعيش ، ونضالنا يحققها لنا
ونقول .. كلنا جاهزين ،
ويا أهلاً بالمعارك !
1

**Amany Ezzat** **Amany Ezzat** · 07-03-2014, 03:01 AM

وصلنا للاغانى الرومانسية

يا أبو قلب وحيد

يا أبو قلب وحيد .. أنا زيك تعالى
لنا عمر جديد نهايته بعيد .. تعالى
يا غريب الروح .. إليك الروح رسالة
"تعالى"

أنت من غيرى وأنا من غير حنان
ياما قلبى من شقاه دق البيبان
كل باب مقفول على جنينة هَنا
وأبو قلب وحيد مالوش فيها مكان

فين بلاد الحب فين أرض الهوى
اللى فيها الناس بتتهنى سوا
رد من قلبى كلام قال مش بعيد
يا جريح القلب من إيديك الدوا

يا غريب .. قلبى أنا أرض المعاد
يا صباح الخير على أيامنا الجداد
مد إيدك خد بايدى وابتسم
خد بإيد عمرى وخد عهد الوداد

ولد وبنت

ولد وبنت
ولد وبنت
كل الجنينة
ولد وبنت
يا حب حاسب ده هنا
وردة ولد
ووردة بنت

كان فيه بِنََّية
خرجت شوية
فى المغربية
قابلت وِليِّد
بص لها حوَد
وقال أهيا
سلم عليها
فهمت إيديها
قالت عينيها
خلاص آمنت

خجلانة هيا
ومستحية
لكن هنية
قال كلمة هوه
وف قلبه جوه
ناره القوية
قال يا آمالى
قالت يا غالى
غيرت حالى
ساعة ما بنت

الوقت مسا
وهى لسه
ولا هى حاسة

آدم وحوا
هى وهو
اتنين فى قصة
لكن ساعتها
شافت ساعتها
رجعت لبيتها
وأنا ..؟
حزنت ..

أنا اللى كاتب الغنوة ديا
أنا الوَليِّد
صاحب البِنيَّة
اللى عيونها
قالت آمنت

شوف

شوف ..

لا تقول مقدر ومكتوب

ولا تشتكى مر كاسك

عقلك فى راسك يا حبوب

هو اللى يعرف خلاصك

شوف ..

أيام وعشناها بالعرض

وكله مردود الينا

ما فى خطوة نمشيها فى الأرض

إلا وتمنها علينا

شوف ..

ما حد يعمل عمل خير

إلا ويلقاه بذاته

ولا شر بيمر من غير

ما صاحبه ياخد جزاته

شوف ..

الشر والخير فرستين

طايرين يسابقهم بهمة

روح قل لهم هما الاتنين

الموت فى آخر المتمة.

أغنية هزار

من أخسن " رتسينا " ، واسقينا ،

يا خبيبى يا بارمان . . .

" كرياكو " بيخب " كاتينا " ،

و" استاورو " زعلان . . .

أنا لازم ييجى سكران طينة ،

كلمتو عربى يا أخينا ،

أنا عمرى ما سافرتو " أتينا " ،

ولا رختو اليونان .

أغنية ولد صغير

ح أجرى كأنى فوق حصان
وح أطير كأنى بأجنحة
جميله جدا الغيطان
والفسحة فيها مفرحة

لو كنت رسام كنت جيت
ومعايا شنطة فيها زيت
ورسمت كل غيط وبيت
لو كنت شاعر كنت أقول
عن الجداول والحقول
قصيدة فيها ألف بيت

لو كنت ده أو كنت ده
مش ح أفرح أكتر من كده
ما فيش لزوم أقول يا ريت

والنسمة بتمر بحنان
والشمس حلوة مصحصحة
جميلة جدا الغيطان
والفسحة فيها مفرحة

يتبع

**Amany Ezzat** **Amany Ezzat** · 07-03-2014, 03:14 AM

أغنية البنت أم ضفيرة

آه .. بدك تعمل حيلة وتاخد قلبى؟
آه .. قلبى قليل الحيلة يانا يا غُلبى

دنيا الحب كبيرة
وأنا لسه بضفيرة
وإن حسيت بالحيرة
آه يانا يا غلبى

أمى قالت لى: حسك عينك .. قلبك إوعيله
ضمى على قلبك دراعينك .. لا الحب يجيله
مرت نسمة قوية شوية
فيها قسوة على حنية
أعمل إيه فيك انت وهيا
ده أنا متوصيَّة
لا أكلم حد
هزار ولا جد
وطول السكة أمشى بمَّد
فاهم ؟
آه ...

قلبى اندارى وقال أنا خايف.. أمشى الناحية دى
والناحية دى لمحت شفايف .. تهم وتنادى
تبكى تتنهد وتغنى
وتقول لى كلام أكبر منى
لا فيه ولا كلمة تطمننى
تبعد عنى
لا تتبسِّم
ولا تسلِّم
لا أحبك وأرجع أتألِم
فاهم ؟
آه ...

بدك تعمل حيلة ... وتاخد قلبى ؟

أغنية من الشباك

أنا هنا يا ابن الحلال
لا عايزة جاه ولا كتر مال
باحلم بعش أملاه أنا
سعد وهنا

مليت لك القلة
عطشان تعالى يا جميل ياللا
مليت لك الأبريق
عطشان تعالى والسلامة طريق
أنا ورا الشباك
سهرانة باستناك
علمِّت قلبى هواك
من قبل ما تجينى ولا اتملَّى
وإن جيتنى يا مهنى
ندرن عليا العين والنِنِّى
وإن جيت تدق الباب
ندرن عليا القلب شيلُه حجاب
فرشت لك رمشى
إخطر عليه وامشى
م الشوق ما بانامشى
باستنى . . حتى العمر مستِّنى

فى الغيب أنا شايفاك
قلبى انكشف عنه الحجاب ولقاك
فى الغيب أنا شُفتك
قلبى شاور لى عليك وعرفتك
انت أسمرانى جميل
لك غِيّة فى المواويل
والقلب لك بيميل
من قبل ما يكون لى نصيب وياك
وأنا هنا . .

نجية

من صغر سنى

غاوى ملاغية ،

وغصب عنى بتقول عينيا ،

عاشق يا ليل . .

يا ليل وغاوى سهر ،

يا ليل ، وبالى طويل . .

للصبح ، يا أبو القمر ،

أنا وانت ، والمواويل . .

غازلت نسمة .

يا ليل ، ونجمة ...

وكلمة كلمة قصدى البنية

يا ريتها تسمح ،

وتقول لى : صرح . .

بدال ما ألمح . . أنا أقول : نجية !

مفترق الطرق

ساعات أقوم الصبح قلبى حزين

أطل بره الباب ياخدنى الحنين

اللى لقيته ضاع

واللى اشتريته انباع

واللى قابلته راح وفات الأنين

وأرجع وأقول

لسه الطيور بتفن

والنحلايات بتطن

والطفل ضحكه يرن

مع إن مش كل البشر فرحانين

حبيبى سكر مر طعم الهوى

فرق ما بيننا البين ما عدناش سوا

حرام عليك يا عذاب

نبقى كده أغراب .

ده البعد والله جرح من غير دوا

آدى اللى كان وآدى القدر والمصير

نودع الماضى وحلمه الكبير

نودع الأشباح

نودع الأفراح

راح اللى راح ما عدش فاضل كتير

إيه العمل فى الوقت ده يا صديق

غير إننا عند افتراق الطريق

نبص قدامنا

على شمس أحلامنا

نلقاها بتشق السحاب الغميق

وأرجع وأقول

لسه الطيور بتفن

والنحلايات بتطن

والطفل ضحكة يرن

مع إن مش كل البشر فرحانين .

ليلة إمبارح

ليلة إمبارح ما جاليش نوم
وإحنا لسه ف أول يوم

قبل ما ترمينى فى بحورك
مش كنت تعلمنى العوم

أنا كنت لوحدى وف حالى
شفتك ما اعرفش اللى جرى لى

راحة البال راحت من بالى
قلت لها مع ألف سلامة

والحيرة قلت لها تعالى
لا ملامة عليا لا ملامة

عمرى كوم والحب ده كوم

غابت شمس إمبارح عنى
خدها الليل خباها منى

بس انت يا قمر طمنى
واوعى تخاف من أى غيامة

شباكى منور بيغنى
لا ملامة عليا لا ملامة

عمرى كوم والحب ده كوم
وليلة إمبارح ما جاليش نوم

1

**Amany Ezzat** **Amany Ezzat** · 07-03-2014, 03:24 AM

اتنين

اتنين ولا قبلنا
ولا بعد منا اتنين
فين زى حبى أنا
وزى حبك فين
اتنين ولا قبلنا
ولا بعد منا اتنين
اتنين روحين هيمانين
قلبين وشقايق
تفوت علينا السنين
وكأنها دقايق
لايق علينا الهنا
وكأنه توب عايق
ولا فى القصص والغنا
فيه زينا حبيبين
اتنين ولا قبلنا
ولا بعد منا اتنين
قالوا ما فيش الهوى
لكن إحنا قلنا: فيه
يا ناس شوفونا سوا
راح تعرفوا معانيه
الحب ده سرنا
لكن ولا نخبيه
أهه أهه حبنا
لا نخاف حسد ولا عين
اتنين ولا قبلنا
ولا بعد منا اتنين

اسكندرانى

إسكندرانى إسكندرانى
عيونه حلوة ومحيرانى
أنا هويته لما لقيته
عيونه خضرا وهو أسمرانى
يا زمرد يا فاروز
يا بخت اللى يفوز
فزنا بنظرة عين
ودتنا على فين ؟
ودتنا كرموز
البحر هادى . . والا إيه ؟
باحاول أفهم من عينيه
النني الأخضر
يحكم ويقدر
وأنا اللى ما أقدرش عليه
الاسكندرانى
بحر الحب عميق
كل شوية غريق
أنا خدنى التيار
تعالى لى يا بحار
لو فيك قلب رقيق
لو قلبك أخضر لون عينيك
لا أخاف عليا ولا عليك
وإن كنت قاسى
يا ما ح اقاسى
وأنا اللى روحى بين إيديك
يا اسكندرانى . .
آه يا أطبا
آه م اللى بيَّا
ضيعت قلبى فى اسكندرية
راحت هناوة البال من حياتى
ساعة ما سلَّط عينيه عليا
لما انشبك قلبى . . ومال
ما بقاش فى صدرى على الشمال
بس المحبة
مالهاش أطبا
يشفونى من جرح الجمال
الاسكندرانى

ح نروح فين؟

ح نروح فين ؟
كفاية
فرحنا يومين
كفاية
ياما اتقابلنا
وياما قلنا
يا حبيبى وياما اتهنينا
لا يوم غُلُبنا
م اللى ف قلوبنا
ولا دبنا من دمع عينينا

لكن اللى سهر على طول
إحساس كان حارمنى النوم
فى اللحظة الجميلة يقول
راح يخلص ده كله ف يوم
ومفيش حكاية من غير نهاية

كفاية كفاية
ح نروح فين ؟
مفيش حكاية من غير نهاية
يا هنايا ودنيايا وحبى
ويوم فراقنا
عارف طريقنا
وح يجيلنا مهما ح نخبى
نتفارق يا روحى قوام
وكفاية علينا كلام
أتألم سنين وأيام
أهون لى من اللوام
ومفيش حكاية من غير نهاية
كفاية

النجوم

حضنت عودى باغنِّى
عود الحبيبة فتننى
أَغنى غنوة حزينة
والاَّ ح تبعدها عنى

يا لحن عاشق وحالم
طالع سلالم سلالم
إمتى أطول النجوم

عاشق دواه المحبة
حرام يا شابة ده عاشق
سافروا له ياما أطبا
ورجعوا والسهم راشق

والحلم يلمس فؤادى
يهمس . . يغنى . . ينادى
آه لو أطول النجوم
1

إعـــــــلان

صلاح جاهين اسطورة فى الحب و الحزن

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك