إعـــــــلان

**ايهاب بابا** **ايهاب بابا** · 10-29-2014, 12:05 AM

https://www.youtube.com/watch?v=f5WMFcMf5dg

الالوان الجواش ..

الوان ذات وسيط مائى وبيتم تخفيفها بالماء ولكن احذرى!
احذرى الاكثار من الماء مع الالوان الجواش ..
لان طبيعة الوان الجواش انها بتكون تقيلة واللون معتم وقوى ..
لذلك بتخففيها بالقليل جدا من الماء .. لكن لو كترتى الماية
هتلاقيها اتحولت لالوان اكوريل .. يعنى بقت شفافة ..

دى صورة للالوان الجواش
ودى بيجى منها انابيب او برطمانات ..

1

وعشان تستخدمى الوان الجواش انتى محتاجة علبة الوان
سواء انابيب او برطمانات ومحتاجة فرشة ناعمة
او عدة فرش باحجام مختلفة ومحتاجة بالتة
على شكل عيون عميقة الى حد ما
وكوباية عشان تحطى فيها ماية

ودى شكل البالتات المستخدمة وسعرها 75 قرش تقريبا و 1.5ج

اسعار الالوان الجواش .. فيه علبة فيها 6 الوان انابيب بحوالى 6 ج
وفيه علبة 6 الوان برطمانات تقريبا ب12 ج ..

طبعا اختلاف الاسعار على حسب الماركات
ولكن اكتشفت ان مش كل الغالى بيكون حلو ..
يعنى العلبة اللى فى الصورة دى ماركة بيبيو
ودى ماركة فرنسية معروفة كانت جيالى هدية
وسعرها 205 ج ..
واجود انواع الوان الجواش هى الوان تلنز

ومع ذلك انا عندى برطمانات جيباها
ماركة بوستر الصينى والبرطمان ب5 ج ..
وبصراحة البوستر احلى بكتير جدا من البيبيو
والبيبيو معجبتنيش اطلاقا والخامة حسيتها سيئة ..

1

ده عمل فنى بالوان الجواش واكيد الفرق باين بينها وبين الاكوريل ..
ولكن في فرق اكبر بكتير واخطر ان الالوان الجواش
بعد مابتستخدميها وتخلصى رسمتك
ممكن لو وقعت عليها نقطة ماية تلاقى الالوان ساحت !
يعنى احذرى من الالوان الجواش عشان بتسيح بعد الاستخدام
لو وقع عليها ماية !

الالوان الاكريليك ..

1

بالظبط زى الالوان الزيتية من حيث النتيجة ..
لكن الفرق فى حاجتين ان دى مائية ودى زيتية
والالوان الاكريليك بتنشف بسرعة جدا
على عكس الزيتية اللى ممكن تقعد 3 ايام على ماتنشف !

الالوان دى سعرها تقريبا من 15 ج فيما فوق العلبة 12 لون ..

وعشان تستخدميها محتاجة بالتة .زى اللى موجودة فى الصورة
او اللى جنبها اللى على شكل عيون ..
وبرضة محتاجة كوباية ماية وفرشاة ناعمة ..

ودى وسط بين الجواش والاكوريل
يعنى ممكن تخففيها بماية زى الاكوريل
عشان تعطى الدرجات الباهتة الشفافة
وممكن تتقليها عشان تعطى عتمة زى الجواش ..
وفى الحالة الاخيرة اللون بيكون لامع زى الالوان الزيتية

و العلبة اللى فى الصورة كانت ب23 ج ..
ودول انبوبتين كبار الواحدة ب 9 ج ..
وبنرسم بالالوان الاكريليك على توال ..
وده عبارة عن برواز خشب مشدود عليه قماش بفتة
او قماش بتاع المراكب ومدهون (ديريتون او سنيتون)
الديريتون لو هتستخدمى الوان اكريليك لان وسيطه مائى
والسينيتون لو هتستخدمى الوان زيتيه لان وسيطه نفط

وده صورة الديريتون العلبة النص كيلو ب15ج تقريبا

1

**ايهاب بابا** **ايهاب بابا** · 10-29-2014, 12:07 AM

وده صورة التوال من الداخل والخارج

2

وده عمل فنى بالاكريليك ..

1

وده فيديو لتعليم الرسم بالاكريليك

https://www.youtube.com/watch?v=Qe33o8ezVfI

الالوان البلاستيك

1

**ايهاب بابا** **ايهاب بابا** · 10-29-2014, 12:10 AM

اكيد كلنا عرفنها دى اللى بتتباع عند الموان ..
البرطمان ب3.5 .. ودى الوان ذات وسيط مائى

ودى الوان لذيذة اوى وسهلة الاستخدام ..
عاملة زى الوان الجواش ولكن اكتر عتمة ومش بتسيح بالماية ..

ممكن تستخدموها بدل الوان الاكريليك ..
ودى الالوان اللي بيستخدمها الخطاطين
للكتابه على القماش

اللى تحب تجربها تشترى الالوان الاساسية
(الاحمر والاصفر والازرق )
وتشترى علبة لون ابيض بلاستيك
نص كيلو تقريبا بحوالى 5 ج ..
وكمان لون بلاستيك اسود ..

وهتحتاجى فرش ناعمة زى اللى فى الصورة ..

وبالتة زى اللى فى الصورة ..
بس تخلى بالك تغسلى البالتة بعد ماتخلصى على طول
لانك لو سبتيها والالوان نشفت عليها
هيبقى صعب تنظفى البالتة تانى

وخلى بالك لان الالوان دى بتنشف بسرعة ..
وبيتم تخفيفها بالقليل جدا من الماء ..

الاكاسيد ..

دى حاجة غريبة شوية الكتير منكم اكيد مش عارفها
هى بتبقى عبارة عن اكياس ترابيه ملونه صغيرة
بتتباع عند الموان فى منها انواع كتير بس اشهرها اكاسيد جونى ..
ودى لذيذة اوى كنا بنستخدمها فى الكلية وبنعمل بيها شغل مجنون ..

وان شاء الله اعمل موضوع خاص بيها
لانها ممتعة جدا ورخيصة جدا .. الكيس منها تقريبا بربع جنية ..

وهتحتاجى ورق كانسون او فبريانو يكون قوى وتقيل ..
وممكن نحتاج كلور .. عشان اقولكم ازاى نرسم بالكلور

ثانيا:الالوان الزيتية ..

اكيد كتير سمع عنها لان اشهر الاعمال الموجودة بتكون زيتية ..

الالوان متوفرة فى المكتبات الكبرى سعرها تقريبا
من 15 ج العلبة ال12 لون .. فيما فوق
وبتكون على شكل انابيب .. ودى صورتها ..

1

وممكن تشترى انابيب كبيرة سعر الواحد 7.5 ..
ولكن علبة 12 لون مناسبة للمبتدئين ..

كمان بتحتاجى معاها ازازة زيت بذرة الكتان
عشان تخففى به الالوان سعر الازازة
المصرى ب3.5 ج تقريبا والفرنسى ب15 ج

او ممكن تخففيها بتربنتين (ازازة من عند الموان ب1.5 )
وكمان بتسخدميه فى تنظيف الفرش

بتحتاجى بالتة بلاستيك او خشب
ولو انى لا افضل الخشب لانه بيمتص الالوان ..
ومع ذلك البالته الخشب هى الافضل لسهوله تنظيفها
حتى بالكشط بالسكين بعد جفاف الالوان عليها
لكن عوضا عنه ممكن بالتة بلاستيك او طبق بلاسيتيك قديم مسطح
ولو خشب يبقى تدهنيه وش ورنيش الاول عشان مايمتصش الالوان

بتحتاجى فرش ذات شعر متماسك
جميع الاشكال منها المبطط والمدور
وتختارى مقاسات تكون مناسبة لاستخدامك..

سعر الفرشاة بيبدا من جنية فيما فوق على حسب الرقم

السطح اللى بنستخدم عليه الالوان الزيتية بيكون خشب او توال
او حتى ورق مقوى متماسك زى الناصبيان او الكرتون..

خشب ابلاكاش مدهون طبقة من الديريتون او السيريتون ..
(علبة كده من عند الموان النص كيلو ب15ج تقريبا )

بتدهنى بيها الخشب كذا طبقة باستخدام فرشاة كبيرة مقاس 1 بوصة مثلا

.. وبعدين بتدهنى زيت او تربنتين وبعدين بتلونى ..

او توال وهو عبارة عن قماش مشدود على برواز خشب
مدهون طبقة سينيتون او غير مدهون ويمكن الرسم عليه مباشرة دون طلاءه
وبيتباع جاهز فى سمير وعلى او مكتبة الوان فى الفجالة ..

وممكن انتى تعملى البرواز عند النجار وتشدى عليه القماش
وتثبتيه بالدباسة او دبابيس المكتب .. افضل انواع القماش
قماش الخيم او المراكب او قماش قماش التيل
او قماش (الدك) متوفر فى وكالة البلح ..
وممكن قماش دمور تقيل او بفتة
ولكن يتشد كويس جدا ويدهن عدة مرات

سعر التوال فى سمير وعلى من 7 ج
فيما فوق تقريبا على حسب المقاس ..
واللى ب7 ج تقريبا بيكون صغير يعنى 15*20 حاجة كده

ودى اعمال زيتية

2

وده فيديو لتعليم الرسم بالالوان الزيت

https://www.youtube.com/watch?v=yhVWOrTVu-0

**ايهاب بابا** **ايهاب بابا** · 10-29-2014, 12:12 AM

https://www.youtube.com/watch?v=kC8B3q9DgaI

الرصاص والفحم ..

طبعا فى غنى عن التعريف ..
الالوان الرصاص بيكون ليها درجات كتيرة من الافتح للاغمق
وغالبا الدرجات دى بتتوفر فى المكتبات الكبرى وسمير وعلى ..

لكن ممكن من درجة واحدة فقط تطلعى درجات من الغامق والفاتح ..
و اشهر درجة متوفرة هى ال HB

1

الفحم لذيذ وشغله سهل جدا ..
لكن عيبه انه بيوسخ الايد .. لذلك لا يفضل للاطفال
والفحم بيتباع جاهز فى المكتبات وفى منه فحم طبيعى وفحم صناعى
العلبة تقريبا فى حدود 8 ج والنوع التانى ب15 ج تقريبا
ودى صورتهم واللى موجودة دى استيكة فحم .. بحوالى 2.5 ج

1

كتير بيسأل على مثبت الرصاص والفحم
ده عبارة عن اسبراى بيترش بعد مابتخلصى الرسمة
عشان يثبت الرصاص وميطلعش من الورقة او يسيح ..

بصراحة دى حاجة ضرورية لاى حد بيحب يشتغل
بالرصاص او الفحم وعايز يحافظ على رسوماته .
ممكن تركيب مثبت سريع وتركيبه سهل
الفونيا ودى بنجيبها من عند الموان
بتكون قطع تشبه اللبان الحصى او المستكى
نطحنها كويس جدااا ونضيفها على بنزين نقى
ونرج التركيبه ونلمسها بايدينا
نلاحظ درجه لزوجه وكده تكون جاهزه للرش

عموما الجاهز متوفر فى المكتبات
والسعر على حسب الماركة ..
يعنى اللى فى الصورة دى كان ب65 ج تقريبا ..
بس انا كنت جيباه نوع نظيف ويعتبر غالى ..
لكن فى انواع تانية اقل بكتير وبتكون فى حدود 8 او 10 ج ..
متوفر فى مكتبات سمير وعلى وفان جوخ
والمكتبات المتخصصة والفجالة ..
ودى صورته

1

ودى احد الاعمال بالرصاص

1

الموضوع منقول
وتم مراجعه صحه المحتوى فنيا
من اداره منتديات ألهندسة الصناعية

**السويدي** **السويدي** · 10-29-2014, 02:34 AM

شكرا لكِ
ايهاب بابا
على وصف انواع الالوان كمعلومات عامه
وايضا اضافة الاسعار التقريبه
لكل نوع لهذه الفتره الزمنيه
فى انتظار جميل موضوعاتك
ونشكرا الادارة لمراجعة الموضوع
لتوصيل المعلومه الصحيحه والدقيقه
لزوار ألهندسة الصناعية
تسلم الايادى
بارك الله فيك

**عناد الجروح** **عناد الجروح** · 10-29-2014, 02:24 PM

وصف جميل للالوان وتوثيق مميز بالشرح
طرح جميل وقيم
سلمت يُمناكِ أختى الفاضله
بارك الله فيكِ

**هالة** **هالة** · 10-29-2014, 06:03 PM

موضوع جميل ومفيد جدا
احب العمل بالالوان المائية
في تلوين عجينة السيراميك
واستخدم الاكاسيد ايضا
تسلمي الجميلة
ايمان
دمتِ ودام تميزك

**ايهاب بابا** **ايهاب بابا** · 10-29-2014, 06:52 PM

بارك الله فيكم جميعا على المرور الكريم

**ايهاب بابا** **ايهاب بابا** · 10-29-2014, 06:55 PM

اهلا بمرورك اختى الغالية هاله
الالوان المائية احب الالوان لقلبى
بحس بان بها حياة عن باقى الالوان
و لم استخدم الاكاسيد مطلقا
لو عندك تجربة معاها احكيلنا عنها

**هالة** **هالة** · 10-29-2014, 07:10 PM

في عملي اشجار بالسلك والخرز
احتاج لاشكال منوعة للقواعد
فكنت اصب قاعدة بالجبس
بالشكل اللي ارغب فيه
واقوم بتغطيتها بورق الكلينكس
وعندي اكاسيد اذيبها في
غراء شفاف مخفف بالماء
والون بها القاعدة
بيكون لونها رائع
وفي عمل فازة بعجينة الورق
قمت بتلوين الفازة بعد جفافها
بالوان الاكاسيد
ويمكنك متابعة طريقة عمل الفارزة
بعجينة الورق وزجاجة بلاستيك
وتلوينها بألوان الاكاسيد اللون النحاسي تحديدا

404 Error

https://www.ward2u.com/showthread.php?t=21273

**علا الاسلام** **علا الاسلام** · 10-30-2014, 03:34 PM

موضوع جميل جدا ومفيد
عرفنا من خلاله أنواع الألوان المختلفة واستخدامها
جزيل الشكر لك
بارك الله فيك وجعله فى ميزان حسناتك

إعـــــــلان

انواع الالوان مع الوصف والاسعار

انواع الالوان مع الوصف والاسعار

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك