إعـــــــلان

**Amany Ezzat** **Amany Ezzat** · 04-13-2015, 12:46 AM

مدد
باموت يا مصر المتباعة
باموت يا مصر المنهوبة
شمسك تسير عكس الساعة
والعين عالعمى مغصوبة
الصفر خيم على زمنك
وعروق رقابتك مطلوبة
على الحدود قتلوا ولادك
وتقفي ساكته ومرعوبة
مدد يا هيكل .. يا ضميري
مدد يا كامل يا زهيــــري
مدد يا قاضي يا خضيري
مدد يا مكي يا زكريا
يا جورج إسحاق
يا مسيري
يابسطويسي.. يا حرية
مدد يا أجملأعصايري

مدد يا قلب الوطن الحر
مدد يا سيرة عوض المر
مدد يا ندهة كمال خليل
مدد يا حلم ندى القصاص
مدد يا خط رؤوف عياد
شقيان وماشى بكل عناد
مدد يا قمح سكينة فؤاد
مدد يا بنت يا مصرية
يا جميلة يا أخت بهية
مدد يا شعر العامية
مدد يا صاحبى اللي قاسمته
مدد يا علم اتعلمته
من عم عودة وصدقى عزيز
شباب لبس وش العواجيز

مدد يا سورة إخلاصي
مدد يا خويا وتاج راسي
يا معصراوي .. ياحسيني
مدد يا ست نهى الزينى
يا فجر صبّح على عينى
صالح ما بين نفسى وبينى
وقاللى دى الست القاضية
كشفت عن الالوان زيفها
وخلت الورده الزاهية
تعيش على وش خريفها

**Amany Ezzat** **Amany Ezzat** · 04-13-2015, 12:48 AM

مدد يا فادى يااسكندر
على خطى محمد الاشقر
على طريق ابن أبوعيطة
جمع مظاهراتنا مشاعر
ويغير من الهتافات شاعر
يحفظ ديوان لأمين الديب
يلاقى شعب كأنه أديب
عندك فى شعره
بلاد.. تقاسيم
عندك حجازى
وعمرو سليم
والنكته بوزارة تعليم

باموت يا مصر المتباعة
باموت يا مصر المنهوبة
شمسك تسير عكس الساعة
والعين عالعمى مغصوبة
مدد يا وائل ويا عيسى
مصر الشباب عالترويسة
فضحوا الوحوش السعرانة
أكلتنا جامع وكنيسة

مدد يا وائل ويا عيسى
مدد يا غد ويا كفاية
أبو العلا .. ماضى.. معايا
ف طريق ما يعرفش نهاية
إلا بميلاد مصر الحرة
إلا بميلادنا ... ومددنا
وكرامة تفضل لولادنا

مدد يا آية في سورة العصر
مدد يا تمثال نهضة مصر
مدد يا فيلم صلاح الدين
مدد يا حماد .. ويا حمدين
متصدرين باسم الامة
للمجزره وقوانين سكاكين
للمبخره وقوانين زنازين

باموت يا مصر ومخنوقلك
عبدالحميد شتا مشنوقلك

**Amany Ezzat** **Amany Ezzat** · 04-13-2015, 12:50 AM

ميّت عشان فرصته بتضيع
لولاد كلاب وولاد جرابيع
ثابتين على عرش فشلهم
نايمين على وش عسلهم
سرقوا الرغيف والحرية
سرقوا السياسة الخارجيه
ادوا الحرامى بنوك الوز
وادوله مصنع طعمه يلذ
وادوله فندق لجل يهز
وادوا الحديد لاولاد العز
والبورصه محشورة فى جيبهم
والسد لو كنا نسيبهم
بميته وبكهربته
بكره هايدخل فى نصيبهم

مدد يا صوت عبد الناصر
مدد يا شيخ حسن البنا
نفسى فى شىء قبل الجنة
يقوم بأه حزب وطنا
ونقضي ع اللي مسرطنّا
الليل يتوب عن كوابيسه
وأشوف فى مصر رئيس سابق
والجى ميكونش وريثه

مدد يا يحيى حسين يا أمين
بيخصخصوا الهوا والميادين
بيمصمصوا الناس والفدادين
باعوا الطريق الصحراوى
وباعوا احلام الجامعه
وهتكوا عرض الشرقاوى
وعملوا بيصلوا الجمعه
باعوا وباعوا وهايبيعوا
شيخ الوطن ولّلا رضيعه
وباعوا صوت عبد الباسط
وشهر يوليه واسابيعه

**Amany Ezzat** **Amany Ezzat** · 04-13-2015, 12:52 AM

باموت يا مصر المتباعة
باموت يا مصر المنهوبة
شمسك تسير عكس الساعة
والعين عالعمى مغصوبة
هاتى المدد يا منى الشاذلي
لا تخافى يوم ولا تتنازلي
وصوري مصنع غزلي
ف الاعتصام العمالي
انا كنت رب العوم .. مالي؟
مقتول غريق ويا آمالي
آدي الغريق... والقاتل فين؟
مدد يا عبدالغني يا حسين
صورلي مصر المحتارة
صورلي غرقى العبارة
مالهومش حد ينجيهم
غرقوا بحاضرهم وماضيهم
البحر مفيهوش قشاية
والملح نار جوه عيونهم
وعيون بلدهم نسّاية
ومنارة الشط تخونهم
باموت يا مصر الغرقانة
باموت يا مصر المنكوبة
طعم الحياة كله إهانة
وانتي ع النيل مصلوبة

مدد يا بنت الإيه يا آلاء
يا حصة الوطن المشتاق
الأولى في علم التغيير
بشرى.. بألوان الطباشير
راسمه العلم في الصفحة أسير
وبتعلنى بقلب الموجوع
ان الوطن ميادين ونجوع
تعبان من الحرمان والجوع
عين المراقب .. غفلانة
عن العيون الانسانة
بنت الخمستاشر احساس
بنت الخمستاشر تفكير
بنت الخمساتشر غنوة

**Amany Ezzat** **Amany Ezzat** · 04-13-2015, 12:55 AM

على وتر علم التعبير
عين الملاحظ بتلاحظ
ان العقول جوه قوالب
مفيهمش خنساء ولا جاحظ
عين المصحح مبهوتة
من الخطوط المفلوتة
المصحح: يا نهار مقندل مش فايت
مش دى الاجابه المظبوتة
اضبط يا ناظر واتصرف
الناظر: يا نهار مزفّت ومدوحس
مش دى الاجابة العلمية
شيلونى هيلا يا افندية
نوصل لحد المديرية
المدير: أنا مش مدير فى القِصّا دي
وعينيا مش شايفه قصادي
سؤالنا مفيهوش أمريكا
والبنت هى المحقوقة
وضرورى ...قطعا مزقوقة
يا اما حزب الله فى لبنان
يا اما سوريا او طهران
او المقاومه العراقية
قوموا بينا نعملها قضية
ومن الادارة التعليمى الى الادارة الامنية
آدي سين سؤال انطقى يا آلاء
منين عرفتى أساس الداء؟
مين بلغك ان المأمور
بيبوس فى رجلين الأعدا ء؟
مين جندك للشيوعية
ولبّسك اخوانجية؟
آلاء: أنا بنت مصر الحرية
يا ديول ديول الحرامية
سرقتوا فرحتي بشبابي
سرقتوا بهجتي بكتابي
سرقتوا من لغتىالاولى
سطور فى كشكول التعبير
خدوا منى صفر على غباكوا
وألف صفر لكل جبان
ما ذاكرش درسه عن الاوطان
بتتبني بفكر وبإيمان
بتتبني بدفتر مواليد
فيه الشهيد قبل الفنان

يتبع

**Amany Ezzat** **Amany Ezzat** · 04-13-2015, 01:09 AM

مختارلت من ديوان
مسحراتى العرب
مسحراتي العرب
ومعايا مخطوطة
جدي نقلها لي
من ابن بطوطة
بالمللي مظبوطة
امشي على قدمي
من طنجة للغوطة
اوصل لاحلامي
وافرح بإسلامي
وأنا روحي مبسوطة
كان ابن بطوطة
من اهل خطوتنا
اشواقه مخلوطة
بسنين محبتنا
ماشي يسحرنا
ويرد غربتنا
قاللي ما تستغربش
من خطوة الايمان
انا جاي من طنجة
قاصد نسيم وهران
اتوضى في جربة
عشان اختم القران
واصلي في طرابلس
واتباهى بالاوطان
واصوم في مسراطة
واستقبل الغفران
وافطر بتمر رشيد
وف طابا يجي العيد
وهناك يدلك طير
على عكا ام الخير

**Amany Ezzat** **Amany Ezzat** · 04-13-2015, 01:10 AM

ويتم خط السير
الى الجولان والشام
الغوطة تستقبلك
بالحب والاكرام
وملابس الاحرام
اسعى لاعلى مقام
ارض الحجاز تناديك
والكعبة تفرح بيك
تلقى جميع اراضيك
في عيوني محطوطة
بطوطة له بطولات
وفي خطوته كرامات
يتوضى في الانهار
ويصلي في الطرقات
صليت فروضي وراه
ومشيت وراه سنوات
مطرح ما يسقي نبات
اسمع كلامه وابات
ازرع معاه فدادين
وابني معاه عتبات
بطوطة له بطولات
ومغربي العبايات
طيب كانه النهر
زي السحاب والدهر
رافض حدود القهر
والختم والجوازات .....

**Amany Ezzat** **Amany Ezzat** · 04-13-2015, 01:12 AM

مسحراتي العرب ترتيلي
بيصب في نيلي رقة
واحساس وحلاوة
وبنيت وزوقت سبيلي
على ندى احلى تلاوة
لسّاني باسمع في الحصري
بقلبي وبروحي وبصري
تجويد على فن وتغريد
على شوق من الحس المصري
على حنان على مية ورد
على رحمة في عروقي بتسري
لساني بسمع في الحصري
وبعيش على صوته نعيمي
ابدا صلاتي وتسليمي
يصاحبني صوت البهتيمي
يباركني حس المنشاوي
يطربني حس الطبلاوي
صوت عندليب ودعاء كروان
وصفولي حس الشيخ عمران
ساعة ما يتلو من القران
ايات رضا واعجاز وبيان
الماذنة لما ارتفعت
عرفنا ان الشيخ رفعت
بيشد عودها بادانه
وهي دايبة في وجدانه
نور الايات لمس العمران
كل الشهور حاوطت رمضان
الحضرة بدات بالغفران
عبد الصمد يتلو الرحم
والنور وبعديها الفرقان
ياتينا من حلو الترتيل
وكاننا في حضرة جبريل
احمد ندا يقرا الانسان
لروح تطيب من اوجاعي
يهل صوت الشعشاعي
سقيني من نبع الكوثر
التوبة في ضميرنا بتحضر

**Amany Ezzat** **Amany Ezzat** · 04-13-2015, 01:14 AM

ومصطفى من بيت سماعين
صب الندى في روح السامعين
نعلى معاه من دنيا لدين
صوت العرب يا مستمعين
بيذيع تلاوة علي محمود
جدي انتشى واخر العنقود
لما ابتدى بسورة الاخلاص
وقل اعوذ برب الناس
من البسملة بنقول الله
ونعيدها تاني في صدق الله
اسمع شعيشع واتهنى
على فرع منسوب للجنة
الصيف يغرد والبنا
لقينا في الصورة وطننا
وراينا في الروضة مكاننا
الصيفي غرد والبنا
لاعرفت امشي ولا استنى
وبلادي مفتوحة قصادي
سمعت صوت شيخنا القاضي
عبد العظيم زاهر راضي
واحمد نعينع لو يقرا
بالقلب اسمع وانصت له
ومصطفى غلوش راغب
يقرا الايات فابتسمت له
وانا رايح اسّحر في بلادهم
وامد قلبي بمدادهم
الاقي ناس بتقول الله
والاقيني معرفش عددهم
اوصل بصوتي لابعادهم
اقول يا مصر المحروسة
دول الولاد وانا اسعدهم
ولا حد يعزف أرغولك
ولا حد في الحق يطولك
ولا حد بيكي هيتساوى

**Amany Ezzat** **Amany Ezzat** · 04-13-2015, 01:19 AM

على ندى احلى تلاوة
انت الخلود مهما تروحي
لا بتغرقي ولا بتنوحي
الدنيا تحتار من صمتك
وبتهمسيلي وتبوحي
انت الخلود
وانت حياتي ونجاتي
وسفينة نوحي
بسم الله اسمع ترتيلك
المولى يهديني فتوحي
لو الزمان عنك حاشني
وصوتك الحلو وحشني
يقابلني صوت طه الفشني
تطيب على البعد جروحي
النقشبندي بيمشي وحيد
يملا بلاد الله تغريد
تسابيح مدد وغنا وتجويد
على ما تيسر من روحي
من المحيط للخليج
صوتها يونسني
هو اللي أسسني
على سلو قلبي
على أراك عصيّ
على عرفت الهوى
على دليلي احتا
على إبراهيم ناجي
بيغني للأطلال
على لحن سنباطي
شاف الهوى دمعي
وشربت شرباتي

**Amany Ezzat** **Amany Ezzat** · 04-13-2015, 01:24 AM

على صوتها وحضورها
وف ضلها ونورها
سمعت عبد لوهاب
في يوم لقاء السحاب
بينادي ع الأحباب
أهل الهوى ياليل
فاتوا مضاجعهم
وأتجمعوا يا ليل
صحبة وأنا معهم
مع بيرم التونسي
مع بليغ حمدي وأحمد شفيق كامل
الليلة حنغني
مع شعبنا العامل
قرب يا شيخ الغنى
قرب يا زكريا
غني بحُريه-
هات القصيجي معاك
والعود وهات الرضى في حضرة السيدة ثومه
من المحيط للخليج
صوتها يونسني
هو اللي أسسني
على همس رق الحبيب
سلوا كؤوس الطلى في حانة الأقدار
جددت حبك ليه
حيرت قلبي معاك
حكم علينا الهوى
حولنا مجرى النيل
وعشقنا كل جميل
يرقص على غصني
لحن لداود حسني مع كلمة من رامي
ومعنى من شوقي مع نبض عم جاهين
لما يقول راجعين
إلى فلول خالدة
في حضرت السيدة
السيدة ثومه
من المحيط لخليج
صوتها يونسني
هو اللي رباني
على عطر رباني
هو اللي أسسني
على دولة للوحدة والحب غايتها

**Amany Ezzat** **Amany Ezzat** · 04-13-2015, 01:31 AM

يحكي حكايتها
يحكي ضمير زايد
يروي في نخلتها
قلب الملك فيصل
يديها معناها
هواري بومدين
بيعلي رايتها
في دولة الوحدة
كل الشعوب حاضرة
كل القلوب بتطل على وعد ست الكل
على سحر ولد الهدى
على دارت الأيام
والحكمة من حِسها
رباعية للخيّام
برضاك يا خالقي
يحضر حديث الروح
حارة وصحارى ودوح
ثورة وأمل وجروح
وكل عطر يفوح
- وكل قلب يبوح
حاضرين في حفلتها
عايشين في غنوتها
أمة حنين منشد
في حضرة السيدة
السيدة ثومه
كنا نسيج
وبقينا نزيج
من المشاعر
والأهازيج
أسرتنا ثومه بقولة آه
لقينا معنى جميل وبهيج
فأصيلة قالوا الناس الله
وصل صداها لحد مليج
غنوتها ردت فينا الروح
أم القوين سهرت قي أبو تيج
الشعر يملا الدنيا زهور
احساها يملا الشعر أريج
دي أمه واحدة بإذن الحق
جمّع في صوتها محيط وخليج

يتبع

**Amany Ezzat** **Amany Ezzat** · 04-13-2015, 01:35 AM

مسحراتي العرب
بيقرا ويسمع
صحيح البخارى
رواه للمقيم
والنسيم اللي ساري
رواه للبوادي
بصوته الحضاري
لذات المباني
وذات الصواري
رواه للسحاب
اللي ضلل حنيني
رواه للأراضي
اللي باست جبيني
رواه لابن عربي
وإيمانه اليقيني
رواه للأوروبي
ولسانه اللاتيني
وتركي وفارسي
وياباني وصيني
رواه اندونيسي
وماليزي وتتاري
حديث المحبة
رواه البخاري

**Amany Ezzat** **Amany Ezzat** · 04-13-2015, 01:39 AM

مسحراتى العرب
طفل وصبى وعجوز
يشبه نجيب محفوظ
والعقل لما يفوز
على كل ليل مهزوز
وينور القاهرة
الهادرة القادرة
لما فى لحظة تعوز
يملى هوانا المسك
ويدلنا الاربسك
على اول التنوير
طفل وزمانة عسير
بالجبه والقفطان
يتهز فى الازهر
ويرتل القرأن
تتثبت الاركان
القيروان تمتد
فى المغرب الانسان
عود الخليج يشتد
بالبر والاحسان
سيف المدد ينزل
زى اكتمال الحل
طهطاوى حر كريم
طهطاوى حر عزيز
يسأل ..تجاوبة باريس
يستخلص الابريز
وينور التعتيم
ويشوفنا طه حسين
من زاويه الهرامين
يستاهل التكريم
شعر البارودى بارود
وياه عرابى يخوض

**Amany Ezzat** **Amany Ezzat** · 04-13-2015, 01:42 AM

وفى بر شوقى مقيم
اما الاصيل درويش
غنا لنا غنوة تعيش
والتونسى مصرى عزيز
ايديهم فى ايد مختار
بيبدلو الاوطار
وبينحتو الافكار
ويغيرو المفاهيم
قاسم امين الود
غير بنود العهد
البنت مش للوقت
والحرمه مش تحريم
من كل فج مضيىء
يجى الحكيم توفيق
وعلى البساط يا نديم
يجلس جمال حمدان
مسنود على البنيان
مصرى جديد وقديم
ويجلنا تانى جمال
افغانى وعنده سؤال
مسلم وقلبه سليم
عقلة الكبير عقاد
روحى فؤاد حداد
مصرى
نهيم ونغنى
وتغنى ست الكل
وتبوس شفيفى الفل
ايدى الالف والميم

وفى كل علم طبيب
وفى كل فن حبيب
والمنفلوطى اديب
بيغنى زى حليم

إعـــــــلان

الشاعر الكبير جمال بخيت التأريخ شعرا

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك