إعـــــــلان

**SaMaR_ BakR** **SaMaR_ BakR** · 12-21-2015, 12:45 PM

منى سامى
حبيبتى سمورة الجميلة
عجبتنى يوميات النهارده قوى
مت من الضحك ههههههههه
وانا عارفه انك كدا ماسكة نفسك قوى ومش عوزة تعملى تيييييت كتير

والله قلت عيب أوى لما ابقى مراقب عام
وأطرد سوء استماع وسخرية
وتيت بالهبل ههههههه
فحاولت اتهذب قدر المستطاع

ربنا يصلح الحال فعلا
والناس تحاول تحسن من نفسها فى كل المجالات
وأخلاق زمان تعود لأثبات اصالتها وتأصلها فى الشعب المصري
تسلميلي
يارب دايما تضحكى وتنورى موضوعاتى

**SaMaR_ BakR** **SaMaR_ BakR** · 12-21-2015, 12:51 PM

أم البنين
سلمت يداك مدرسة الرسم امتعتنا بمذكراتك
رغم كتابتك العاميه التي اتعبتني
فلم افهم كثيرا مما قرأت ولكنك نقلتي لي صورة
عن زحمة الشوارع بطريقة رائعة
استمتعت بها فلك كل الشكر

حبيبتى أم البنين
منوره الموضوع
سامحيني على اللهجة العاميه
لكن ما ينفعش فى موضوع عنوانه
أنا وسواق الميكروباص
غيرها لهجه لايقه عليه ههههههه
لو تابعتى موضوعات تانيه غير اليوميات
بكتب لغة عربية مفهومه ان شاءلله لغير المصريين

ليا تحفظ فقط على عبارة (مدرسة رسم )
لأنى احب أكتر مدرسة تربية فنية
لأن أعتبر مهمتى ووظيفتى
أكبر من أنى اعلم طلابي يرسموا فقط

تسلميلي حبيبتى
شكرا لوجودك
يارب يومياتى الجاية تكون خفيفة عليكي

**SaMaR_ BakR** **SaMaR_ BakR** · 12-21-2015, 01:23 PM

السلام عليكم أحبائي
تعالوا النهاردة قررت افرسكم معايا
مش قادرة بصراحة اتفرس لوحدى

حوار ممتع وشيق دار بيني وبين معلمة
على درجة خبير فى مادة اللغة الإنجليزية
ومنسق عام فرق الجودة فى المدرسة

أكاد أجزم انى كنت هاتشل بعده

كنت قاعدة مع وكيلة النشاط
فى حجرة التربية الفنية بنتناقش فى خطة النشاط السنوى
المهم الاستاذه دخلت علشان تكلم وكيلة النشاط
مش جايالى مخصوص خالص
وأحتمال تكون مش عارفه دى اوضه ايه اصلا

ويبدو أن فى نهاية الحديث لاقيتى قاعده على الكرسي
فدار الحوار كالتالى :
يا مس سمر حضرتك معانا أن شاءلله فى الجوده
هاتدخلى فريق أيه ؟؟؟

- لا يا استاذه أنا مش فى الجوده خالص
انا تقريبا ما بيكونش عندي وقت افطر
جدولى كبير ومش فاضية خالص

ماهو كلنا مش فاضين بس أنت لازم تدخلى الجوده
دى مالهاش شغل خالص

- تمام طالما مالهاش شغل
حضرتك محتاجانى فى ايه

لأ ماهو ليها استمارات ولازم تتوزع على الفرق يملوها
ويكتبوا بيانات ويعملوا استطلاعات رأى

طيب ماهو انا بقول لحضرتك أنا يوميا عندي 6 حصص
وبحضر لأربع مراحل غير الأعمال الفنية المطلوبة منى للمدرسة والتوجيه
ومش فاضية لأى أعمال كتابية

ماهو بصي كلنا داخلين داخلين
أكتبك فى فريق ايه ؟؟
- كده هى اعتبرت موافقة سيادتى تحصيل حاصل مش أكتر -

أممممم طيب حضرتك فهميني
مطلوب أيه من كل فرقه وأنا اختار الفريق اللى ممكن افيد فيه
أو هافيدك اصلا فى الجوده ولا لأ
- أظن عدانى العيب وأزح -

لأ ماهو أنا مش فاضية افهمك

أنا بتعبير ملؤه الأستغراب ؟؟؟؟؟؟؟؟؟؟؟؟
ايوه يعنى مطلوب منى ايه برضه ؟

تمضي وتكتبي اسمك فى اى فريق

- ايوه وماله أنا فهمت أنى هاكتب اسمي
ايه بقى وظيفه كل فريق من دول
علشان اختار واحد منهم

بصي أصل أنت لو ما مضيتيش هاروح اقول لمستر محمد
هو هايكتب اساميكم وخلاص فاختارى انت احسن

عند هذا الحد كنت خلاص
بدأت اعراض الشلل الرعاش تظهر عليا
بس هى كده داست على الزرار خلاص
مممم هو حضرتك ليه مصره تكتبي اسمى وخلاص ؟؟
أنا بس كنت عاوزة افهم
وأنا كنت هاختار فريق
بس بما انك معتبرانى كيس جوافه أو اباجورة
أسفه جدا مش داخله جودة

يعنى ايه ؟؟؟

يعنى كلامى واضح أنا مش فى الجودة دى خالص

خلاص هو يتصرف معاكوا

-تمام good luck

الأستاذه خرجت من غير ماتقول سلام عليكم حتى
ولاقيت الست اللى انا نسيتها اصلا وكيله النشاط
واقعه على الأرض من الضحك

بصو أنا اختصرت الحوار
كان كله خد وهات فى نفس المعنى
هى مصره ما تفهمنيش حاجه
وانا مصره ماكونش كيس جوافه
الحوار ده أخد ربع ساعه
والله كان زمانها شرحتلى عمل كل فريق
- ده لو كانت عارفه -
وأخترت ومضيت ومشيت وخلصنا
للى بفكر فيه بقى ,,,
هى بتشرح للطلاب أزاى ؟؟؟؟؟؟؟؟؟؟؟

اللى يضحك بقى أن بعدها بكام يوم
لاقيت مدرس بيقولى يا مس سمر
مش حضرتك معانا فى فريق المعلم فى الجوده
طبعا أتقلبت على قفايا من الضحك
وقلتله لأ اكيد سمر تانيه
ههههههههههههههه

ايه رايكم اتشل والا لأ ؟؟؟

**هالة** **هالة** · 12-21-2015, 04:44 PM

اسم الله عليكِ
حبيبة قلبي
قبل ما ارد على كلامك
احمدك يا رب اني هربت بجلدي
بدري بدري وسبت التعليم
للي بيفهموا فيه وتربويين
هههههههههههههه
بصي يا ستي اولا كيس الجوافة
مفيد جدا وكله فيتامين سي
لكن انتي تختاري كيس حاجة ثانية
مانجة مثلا او اقول لك كاجو
علشان لما تاكلي في نفسك
الكاجو طعمه حلو
بداية التعليم من سيء لأسوء
اللي يخلي مدرسة انجليزي
تدرس كمان تربية فنية
علشان مفيش في المدرسة
مدرسات تربية فنية
يخلي الست اللي بتقولي عليها دي
خبير في اللغة الانجليزية
مش عارفة تشرح لك المطلوب
ولا تكونش مش بتفهم عربي
وقالت مش حتعرف تفهمك
ما علينا خلينا في اسلوبها
اللي بيفتقر لكل الجودة

اثتبتي على مبدأك
وارفضي عمل اي شيء
مش مقتنعة به اولا
ومفروض عليكِ ثانيا
اما ثالثا

ما تجيبي كيس الجوافة
نعملوا لنا كام كوباية عصير
ههههههههههههههههه

**منى سامى** **منى سامى** · 12-23-2015, 07:19 AM

والله يا سموره هم يضحك وهم يبكي
بنضحك علي معلمه ليست بمعلمه
وبنحزن علي تعليم لا يعلم
وعلي طلاب علم جهله
حسبنا الله ونعم الوكيل
بس انا كنت هموت واعرف ايه الفرق اللي كانت عوزاكي تختاريها
حب استطلاع يعني
بس عجبني انك اخترتي ما تكؤنيش كيس جوافه
ماهو الواحد برضو يبقي كيس جوافه بمذاجه مش غصبعنه
هههههههه يوميات الجميله خلصت بسرعه بس سابت اثر جوايا
حزن والم علي حال المعلم
بحمد ربنا اني ما درستش اللغه العربيه
كان زماني بهاتي بضمير مع ناس نايمه
منتظرين باقي اليوميات يا اجدع ميس

**نااانو** **نااانو** · 12-23-2015, 12:48 PM

والله ياميس سمر انتى عسل
ربنا معاكى فى هذا الجو الغريب فى مجال العمل
لكن اكيد انتى معلمة تربية فنية
شاطرة جدا وفنانة جدا جدا
هاتقدرى تفيدى من حولك بفنك وموهبتك
بعيد عن الجودة اللى مش عارفة ايه المقصود منها
والميزة فيكى انك بتشاركينا
يومياتك الظريفة باسلوبك الساخر
ربنا معاكى
وعرفينا مين زقك فى اى فريق جودة
ههههههههه

إعـــــــلان

يوميات فنانة فى قاهرة مصر

تعليق

تعليق

تعليق

تعليق

تعليق

تعليق

مواضيع تهمك