إعـــــــلان

**Amany Ezzat** **Amany Ezzat** · 06-29-2014, 04:51 AM

أول قصيدة حقيقية كتبها كانت
وهو فى السادسة عشرة من عمره
يرثى فيها الشهداء الذين سقطوا
فى مظاهرات الطلبة بالمنصورة عام 1946
قال فيها:
كفكفت دمعى ولم يبق سوى الجَلََد
ليت المراثى تعيد المجد للبلد
صبراً ... فإنا أسود عند غضبتنا
من ذا يطيق بقاءً فى فم الأسد.
ورغم هذا الظهور المبكر لموهبة الشعر

1

بشكل عام كان صلاح جاهين
طالباً مجتهداً رغم اهتماماته العديدة
وعدم رضاؤه عن الأساليب التقليدية فى التعليم
وترحال الأسرة الدائم،
فقد حصل صلاح جاهين
على الابتدائية من أسيوط
وعلى الثقافة من المنصورة،
والتوجيهية من طنطا.
والتحق بكلية الحقوق
لتحقيقا لرغبة والده
و نتيجة عدم رضاؤه عن
الالتحاق بكلية الحقوق تعثر فى دراسته
وترك الكلية و سافر الى غزة
ثم عاد الى القاهرة ثم سافر الى السعودية
وعاد الى القاهرة والتحاق بكلية الفنون الجميلة
بعد ذلك إلا انه لم يكمل الدراسة بها أيضاً.

صلاح جاهين زوج

تزوج صلاح جاهين مرتين،
باحثاً عن الاستقرار والحب
فتزوج للمرة الأولى من "سوسن محمد زكى"
الرسامة بمؤسسة الهلال عام 1955

1

و أنجب منها بهاء و أمينة جاهين
كان صلاح جاهين صريحاً واضحاً فى كل شئ
فأخبر زوجته منذ البداية أن عمله هو أهم شئ فى حياته
تليه هى كما أخبرها أنه سيصارحها عندما يحب أخرى
و هو ما حدث بالفعل فقد اعترف لها بحبه
للسيدة منى قطان زوجته الثانية
و هو ما كان سبب الانفصال بينهما بعد زواج دام 12 عاماً
ورغم الانفصال لم تتأثر علاقته بأبنائه أو أم اولاده
فقد كان يهتم بهم فى المناسبات و كان حريصاً على أن
يحضر لها الهدايا والتورتات فى عيد ميلادها رغم زواجه من أخرى
و فى عام 1976 و بناءاً على رغبة صلاح جاهين
عادت الحياة بينهما مرة أخرى و ذلك لخوفه عليها و على أولاده
و لشعوره بالذنب تجاهها

زواجه الثانى :

تزوج من السيدة منى جان قطان الفلسطينية الأصل
ابنة الصحفية و الأديبة جاكلين خورى
منى قطان كانت تحمل الجنسية اللبنانية و كانت مسيحية
و أنجب منها ابنته سامية

1

**Amany Ezzat** **Amany Ezzat** · 06-29-2014, 08:08 PM

صلاح الأب :
كان صلاح جاهين يهتم كثيراً بأبنائه
فكان دائماً بجوارهم عندما يكون لأى منهم مشكلة
فكان أولاده أصدقاؤه و كان هو صديقاً لهم
فحرص على اللهو و اللعب معهم

بعض الصور مع أولاده

5

**Amany Ezzat** **Amany Ezzat** · 06-29-2014, 08:45 PM

حياته العملية

بدأ صلاح جاهين حياته العملية فى جريدة بنت النيل
ثم جريدة التحرير
أصدر أول دواوينه بعنوان كلمة سلام فى عام 1955
و فى منتصف الخمسينيات
بدأت شهرته كرسام كاريكاتير فى مجلة روز اليوسف
ثم فى مجلة صباح الخير التى شارك فى تأسيسها عام 1957
و اشتهرت شخصياته الكاريكاتيرية مثل قيس و ليلى
قهوة النشاط و الفهامة و درش و غيرها من الشخصيات
لقد كانت رسومه الكاريكاتورية مؤثرة للغاية
لدرجة أنها تسببت أكثر من مرة
فى أزمات سياسية عديدة كان من أبرزها
اختلافه مع الشيخ الغزالى بالكاريكاتير فى عام 1962
فاستباح طلاب الأزهر دمه
و تظاهروا و تجمهروا أمام جريدة الأهرام
كما أجرى معه المدعى العام الاشتراكى
تحقيقاً بسبب كاريكاتيراً انتقد فيه تقريراً
حول نتيجة التحقيق فى شأن تلوث مياه القاهرة
وُضِع اسمه على رأس قائمة المعتقلين أكثر من مرة
نظراً لما يعرف عنه من ميول يسارية و نقداً للنظام
لولا تدخل الرئيس جمال عبد الناصر شخصياً
لحذف اسمه خمس مرات من هذه القائمة
فأصدر ديوانه الأول كلمة سلام عام 1955
ثم ديوانه الثاني موال عشان القنال عام 1957
و فى نفس العام كتب اوبريت الليلة الكبيرة
أحد أروع إبداعاته و التى لحنها له
سيد مكاوى أحد أقرب أصدقاؤه

1

مثلت الفترة الممتدة من 1959 حتى 1967
فترة النضج الشعرى عند صلاح جاهين
و التى بلغت قمتها
بصدور ديوانه الرباعيات عام 1963
ثم ديوانه قصاقيص ورق عام 1965
و خلال تلك الفترة كتب صلاح جاهين
أروع أعماله الوطنية مثل صورة و بالأحضان
و الله زمان يا سلاحى
الذى اتُخذ النشيد الوطنى المصرى
فى عهد الرئيس الراحل جمال عبد الناصر
و غيرها من الأعمال الوطنية
التى بقت راسخة فى ذاكرة الشعب المصرى
كون صلاح جاهين جماعة محبى ضوء القمر عام 1961،
كما قدم العديد من المسرحيات مثل القاهرة فى ألف عام
و كتب الأغانى و الأشعار للعديد من المسرحيات
مثل مسرحية إيزيس و مسرحية الحرافيش
و لم يتوقف إنتاجه عند الأعمال المحلية
بل قام بالترجمة و الإعداد لبعض المسرحيات الأجنبية
مثل الإنسان الطيب و دائرة الطباشير القوقازية
كما قدم الأغانى و الأشعار للعديد من الأعمال الإذاعية
مثل أغانى مسلسل رصاصة فى القلب

من أعماله المتميزة للأطفال

مسرحيات الفيل النونو الغلباوى
و الشاطر حسن و صحصح لما ينجح
و حمار شهاب الدين
و العديد من الأغانى و الصور الغنائية للأطفال
لذلك اختارته وزارة الثقافة عام 1962
ليكون مسئولاً عن كل ما يتصل بتوجيه الطفل و ثقافته

فى مارس 1964 انضم لأسرة جريدة الأهرام
كما نال صلاح جاهين وسام الفنون
فى عيد العلم عام 1965

جاءت هزيمة 1967 لتكون بمثابة
الضربة القاسمة لصلاح جاهين
فأصيب بعدها بالاكتئاب الذى لازمه حتى وفاته
و خلال هذه الفترة توقف عن كتابة الأغاني الوطنية
حيث اعتبر نفسه مشاركاً فى الهزيمة بأغانيه
و أشعاره شديدة التفاؤل و الحماس للثورة
و لزعيمها جمال عبد الناصر،
فلم يكن صلاح جاهين محباً لعبد الناصر فقط
بل كان مبهوراً به
عن حبه لعبد الناصر يقول :
أنا وقعت تحت مغناطيسية
الكاريزما الموجودة فى شخصية عبد الناصر
و لكنى تعلمت أن انظر إليه بموضوعية

و لكنه استعاد توازنه و كتب من وحى حرب الاستنزاف
الدرس انتهى لموا الكراريس
بعد الهجوم الإسرائيلى على مدرسة بحر البقر
و عناوين جرانين المستقبل
إثر الهجوم الإسرائيلى على مصنع أبو زعبل
ثم توقف عن الكتابة فترة طويلة كتب بعدها
المصريين أهمه و كانت آخر أعماله الوطنية

يتبع

**Amany Ezzat** **Amany Ezzat** · 06-29-2014, 09:42 PM

كان صلاح جاهين مدرسة
أهم ما ميزها امتزاج الشاعر برسام الكاريكاتير
في وحدة واحدة و كيان متكامل

أما عن كاريكاتير جاهين
فحدث و لا حرج فقد عكست رسومه هموم الناس
و خاصة البسطاء الذين أحبهم و أحبوه،
و فضل أن يعيش بينهم رغم انتمائه إلى طبقة مرفهة

كان جاهين يرسم في المتوسط نحو
ثلاثين كاريكاتير في الأسبوع
معظم هذه الكاريكاتيرات تناول قضايا
فكرية و اجتماعية و فلسفية و سياسية
على أعلى مستوى و كثير منها يصلح نشره الآن
و كثيرا ما كان يبعث من خلالها برسائل
بين سطور الكاريكاتير تنبه إلى قضية معينة
و كان تأثير جاهين كبيرًا في الرأي العام

بعض من رسومه الكاريكاتورية

5

**Amany Ezzat** **Amany Ezzat** · 06-29-2014, 09:54 PM

جارى اعادة رفع صور الموضوع تابعونا لاحقا 5

كانت زاويته الكاريكاتيرية في الأهرام
أول ما يحرص القراء على مشاهدتها
فيرون فيها حياتهم و مشاكلهم و قضاياهم

1

كاريكاتيرات من زمن فات
لكن جميعها يعبر عن مشاكلنا اليومية الى الأن

**Amany Ezzat** **Amany Ezzat** · 06-29-2014, 10:22 PM

ملك جاهين ناصية الكلمة و الرسم في آن واحد
فكان شعره عظيما يتميز بالعمق في نظرته للكون و الحياة
استطاع بتلقائيته و بساطته التعبير عن كل ما
يشغل البسطاء باسلوب يسهل عليهم استيعابه

أزجال أشعار مسرحيات أغانى أوبريتات غنائية
نحاول الدخول الى عالمه الشعرى
و نبدأ ببعض الأزجال مرتبة أبجديا

حرف الالف

اتكلموا

اتكلموا اتكلموا اتكلموا
محلا الكلام ، ماألزمه وماأعظمه.
فى البدء كانت كلمة الرب الاله ،
خلقت حياه ، والخلق منها اتعلموا
فاتكلموا

فى البدء كانت كلمة الرب الاله
روح بجناحين شطار وصار للكون مداه
آخر مطافها ، جت وحطت ع الشفاه
لما البشر ملكوا الوجود واستحكموا
فاتكلموا

الكلمة أيد ، الكلمة رجل الكلمة باب
الكلمة نجمه كهربيه فى الضباب
الكلمة كوبرى صلب فوق بحر العباب
الجن يا أحباب ما يقدر يهدمه
فاتكلموا

الرمل مرمى تحت قبة السما
مشتاق لقطره من المطر فيها النما
ملايين سنين عمره ماداقها ، انما
فيه كلمة تقدر فى المراوى تعومه
فاتكلموا

فيه كلمة تقدر تزرع البور حور ضليل
وكلمة تقدر تجعل الكوخ بيت جميل
وابو العيال والجلابية الهلاهيل ،
فيه كلمه تعطيه مال وكلمة تهندمه
فاتكلموا

لكم السلام يا ملفوفين حول اللهب
يا غواصين فى القلب ع الكلمه العجب
فى البدء كانت كلمة الرحمن سبب
وما عادش غير الحق كلمة تتممه
فاتكلموا

احنا التلامذه

يا عم حمزه احنا التلامذة
جن و بلاوى مسيحه من غير مؤاخذه
نكبر ما نكبر الله أكبر
طول الزمان ع الامتحان داخلين مبارزه
هل من مبارز هل من مناجز
هل من معارك فى البلد دى لسه عايزه
هل من منادى و نفير جهادى
قال لك : أجل لسه العجل فى رمله غارزه
لسه فى طريقنا للأمال
و الرمله من كل جهه
زقه مع زميلكم جمال
يا عقولنا يا متنبهه
الرمله حلوه ع البلاج
حلوه على باب الفرح
لكن لحد كده و بلاش
أحسن شعورى بينجرح
اسفخص على لون الاصفرار
و الفقر و الخوف و المرض
ما شفته الا و دمى فار
و حلمت بيه زال و انقرض
كابس علينا الشئ ده ليه
هو انجليز و الا تتر
دوكهم خطر قمنا عليه
رياح ما خلتلوش أتر
كان برضه أمشير زى ده
كان برضه فبراير كده
قمنا جموعا حاشده
سلاحنا أنشودة فدا
احنا الجواب و احنا الندا
و احنا التلامذه المنجده
يا عم حمزه ماشفتناش
الدنيا شافت دمنا
حنه على ايدين أمنا
حلفت يكون عيد باسمنا
عيد ابتدا و لا انتهاش
يا عم حمزه

لام الف و همزه
لأ مش عاوزين عيشة وارثين
و لا دنيا جاهزه
ده أبو سد عالى
سهران ليالى
زى التلامذه ف لامتحان
يا عم حمزه.
لام الف : يعنى لا

الهه

ايزيس بتحب بوذا و كيوبيد السبب
باخوس سقاها بوظه شوف قلة الأدب
حتحور و مناف و نبتون و اله بقرون و ديل
طلعوا الأولمب هيلتون و اتعاركوا فى الأوتيل
زيوس اتحدى رع فى بورصة البشر
أبوللو قاللو هع فشر فشر فشر
و الكل نزلوا ركبوا عربيات فارهه
ان خسروا و الا كسبوا
الكل آلهة

الادب

العلم قال
ان العيال يلزم لانتاجهم رجال و يا النسا
و ايه كمان العلم قال
قال لك ضرورى شخص واحد بس علشان كل طفل
و ضرورى باب و ضرورى قفل
و ضرورى حب ان شالله ثانية
ده ف بند حفظ النوع
لكين بقى فى الأدب
قريت نهاية الأرب
و فلاسفه مش من العرب و من العرب
و كلهم قالوا الكتاب
له فن تانى فن معروف من زمان
يا فرنسواز هانم ساجان

**Amany Ezzat** **Amany Ezzat** · 06-29-2014, 10:35 PM

اكتوبر
من غير ما نتفاخر ونتباهى

لا بالرايات اللى رفعناها
ولا بالحصون اللى انتزعناها
ولا بالدروع اللى مزعناها
ولا بالدموع اللى ابتلعناها
على الضنى الغالى وحجبناها
وحياة عيون مصر اللى نهواها
و اكتوبر اللى كما النشور جاها
بلاش نعيد فى ذنوب عملناها
أنا اتعس اللى بدعها وجناها
ومازلت تحت عقابها وجزاها
وحياة ليالى سود صبرناها
واتبددت بالشمس و ضحاها
نكبح جماح الزهو ، مع أنه
من حقنا ، ونحمى النفوس منه
ولو العبور سالونا يوم عنه
قول مجرد خطوة خدناها

الانتصار

فيه لسه ركن ف قلبى عاوز يبتسم
أرض الجزاير لسه تحت الاحتلال
أنا قلت مش ممكن بلادى تنقسم
أرض الجزاير جزء من أرض القنال

و خرجت ثاير رايح الجزاير

ونسيم بلادى معايا طاير بالبشاير للانتصار

مشيت مشيت لون الجراح ما غابش عنى
مشيت مشيت جوه الرياح اهتف واغنى
يا سهرانين الليل عليكم السلام
شدوا الزناد شدوا انتصارنا و قربوه
بكره الليالى تعود و يملاها الغرام
وكل طفل ينام سعيد فى حضن ابوه

يا دم يا احمر ع الزرع الاخضر

أهل الجزاير بدروك علشان تزهر للانتصار

هناك هناك فوق الجبال آخر طريقى
هناك هناك وسط النضال واقف شقيقى
بنظرة مليانة حنان ضم الوطن
ضم السنابل ضم أغصان الزتون
ورفع سلاحه وخط فى جبين الزمن
ميعاد لحرية بلاده راح يكون

وأنا سبت أرضى و فيها وردى

رايح الجزاير بالرصاص أأدى فرضى للانتصار

راح ننتصر ونشوف سلام وايام جديدة
راح ننتصر ونعيش كرام فى بلاد سعيدة
وانا حامشى وامشى وامشى وامشى ف سكتى
واوصل واضم إيديا لألوف الألوف
وانزع من المستعمرين حريتى
وانشد مع الثوار وإحنا فى الصفوف

أنا جاى ثاير ويا الجزاير

ونسيم بلادى معايا طاير بالبشاير للانتصار

امانه يا للي

أمانه ياللى على باب الانتخاب داخل

من قبل مسك القلم ، والخط ، تتماهل.
اسأل ولادك فى سرك بكره عاوزين إيه
الحكم يظهر و تلقى الحل بالساهل
عاوزين أمان يابا عاوزين لاشتراكيه
مدخول كفايه وعدل على الجميع شامل
الأرض فى ايدينا يابا وعندنا الفواريق
عاوزين قلوب ثورويه تدح وتناضل
عاوزين قلوب ثورويه تدح و تناضل
عاوزين ايدين ثورويه تشقلب التربه
تخلى عزبتنا تدى الغله بالكامل
عاوزين عقول ثورويه ف مجلس الامه
رايده اللى رايدينه ، عارفه الحق م الباطل
اختار لنا يابا ، خلق تغير الدنيا
ولاعندناش فرق بين الست والراجل
و لاحد يخدمنا جنب زعيمنا غير يابا
المثقف الثورى و الفلاح و العامل
آدى اللى فيهم

يتبع

**Amany Ezzat** **Amany Ezzat** · 06-29-2014, 10:53 PM

حرف الباء

برافو برافو

من قدم السبت يلقى الحد قدامه

كلمة قالوهافى معنى الجد ومقامه

واحنا اللى شفنا زماننا ومعجزاته نقول

من شاف بنا السد شاف الغد فى ايامه

برافو برافو بسطويسى

برافو برافو فلاديمير

دشنوا الحديد بفودكا

والحجر بلمون عصير

تلتميت مليون براوة

ع الشطارة والذكاوة

والبراعة والحلاوة

ومصر والعمل الكبير

سد جبار ماله زى

والنهاردة العيد يا خى

عيد يبشر باللى جى
واللى جى كتير كتير

عيد لتمجيد الصداقة

والعمل بكل طاقة

لجل تدخل الإضاءة

كل كوخ فلاح فقير

لجل تشتغل المكاين

على كيف كيف الزباين

والرمال تطرح جناين

والايدين تطرح فطير

لجل تخضر الصحارا

ويرقصوا فيها العذارا

وابنى يلعب ع الجيتارة

أم أوتار من حرير

كان كفاح مليان مرارة

كان كفاح مليون جيفارا

ضد عراقيل الحضارة

تحت لهاليب السعير

فتنا يا ولاد فى الحضارة

كل تفجيرة انتصارة

والقلوب فيها الحرارة

طاغية على حر الهجير

والقلوب فيها المعالى

شعلة فى الضلام تلالى

ينقلب كحل الليالى

حنة حمرة ومونوكير

حنة معرف والا دم

المهم بل الأهم

النهاردة السد تم

وابتدا الريف يستنير

غنى يا عصافير وهيصى

واهتفى يا جماهير

برافو برافو بسطويسى

برافو برافو فلاديمير

بعد الفطار

عينى غفلت حبتين ، بعد الفطار
كل عام وانتم بخير رمضان كريم
عينى غفلت ، م التعب طول النهار ،
والمجاهده ، والمناهده ، وسين وجيم ،
لحظه والتانيه ، وبعد اللحظتين ،
جانى احساس إن حد دخل قعد ،
وابتدا يسبح ، وابص بنص عين ،
نص قلبى انسر ، والنص ارتعد .
شفت بيرم .. أيوه بيرم .. أيوه هوه ..
لبده مصرى ، جلابيه مغربى ،
شمله شامى ، سبحه من أرض النبوه .
حد مايعرفش بيرم والنبى ؟..

شفت بيرم ، بالصديرى اسكندرانى ،
شفته ، متلفع بشال من العراق ،
والحزام يمنى ، وعطر الايد سودانى ..
حد ما يعرفش بيرم يا رفاق؟ ..

- ضحكته المره اللى بتنقط عسل .
قلت : خير إنشالله . قال : فين الديوان.
فين " ديوان بيرم " . مابطلتوش كسل ؟ ..
قلت له : معلهش . قال معلهش إيه !
وناتايه عن بلدنا يا ولد ؟ ..
البعيد عن عينها ، يا حسرة عليه ..

يا بلدنا ، يا حلوه ، آه منك بلد !
قلت له: راح نحتفل بك. قاللى : لا
،
احتفالكوا وفروه على نفسكو .
قلت له: ح نشيد بفضلك. قاللى ها ،
فضلى فين ، إذا كنتو ناسيين درسكو ؟

قلت له: علمنا: بيرم قاللى : شوف ،
المياتم فى الأزقه ملطعه ،

أنا مش عايز كراسى صفوف صفوف
أنا .. صفُّولى حروف المطبعة !

بنت و ولد

البنت فارت والولد خنشر ..
يا داهية دقى ! .. ألف بعد الشر ..
ياريتها كانت نزلة شعبيه ،
والا وجع فى البطن .. يتدبر .
الا اللى نابهم ، كان قضا وصابهم ،
مالوش دوا ، ولا طب ، ياسى أنور .
البنت فى الاعدادى – لساها ،
كان إيه لزوم الغصن يتدور ؟ ..

والا الولد ، ده يادوب دخل ثانوى ،
ليه خده ينطر شوك ، بدا – المنظر ؟ ..
مش لما بس يكملوا علومهم ؟ ..
ماكانش يومهم ، يا النهار لاغبر!
لوكان عليا .. لا واد ، ولا بنيه ،
أخلى فيهم " مللى" يتغير ،
غير لما يبقوا أساتذه ، بماهيه ،
وبيت جميل ، مفروش على صغير!

بهاء ابني

عنيا بتزغلل
و عقلي متبرجل

و شركة الطيران
قالت:قوم انزل

مسافر اليابان
و الوقت كالثعبان

دي شنطه و ده باسبور
اه يانا يا غلبان

دماغي مخووته
وطافح الكوته

و خلاص على السلم
و بابوس و بسلم

قاللي بهاء ابني:
احكيلي حدوته

**Amany Ezzat** **Amany Ezzat** · 06-29-2014, 11:04 PM

حرف التاء

تحويل مجرى الاردن

وقفه يابن عم . .
واحنا كم وكم ،
واللى بيجرى بيننا ،
ميه ، والا دم ،
واه يانهر أردن ،
ريحك شايله هم

وقفة جدعنه . .
وقفة فلاحين ،
على راس القنا ،
على قلب اللعين.
وقفة جبارين ،

بدارين تقاوى ،
وقفة كداحين ،
حمالين أساوى ،
نشايين نشاوى ،
بنايين علاوى ،
حفارين مراوى ،
فى الصخر الضنين.

وقفة سهارين ،
تنقال الحكاوى ،
عنهم ، والغناوى ،
أدهم الشرقاوى ،
وبهيه وياسين.

وقفة مؤمنين ،
عارفين ربنا ،
صابرين من سنين ،
ليوم المنى ،
وآخرة المتم ،
وقفة يابن عم ..
وقفة عيد لنا.

والشاطر يخاطر ،
ويقرب هنا ،

تفريقه

أنا بغبغان من "أفريقه".
حافظ نصوص كهنه عتيقه.
بحرين وست جبال عديت ،
قزحت نص الدنيا ، وجيت..
اللى لقيته ف أمريقه

نفس الكلام ..
نفس الكلام ..
نفس الكلام ..

( 1 )

"كلام الرجل الأبيض"
أبيض ، وفنطازيه
ومراتى المظيه
وربنا اصطفانا ،
عشان حمرة قفانا ،
وشيلنا الأمانة ،
اللى تقل الرزية.

( 2 )

" كلام الرجل الأسود "
أسود ، ودمى حامى ،
حامى الحمى يا حامى ،
مافيناش لونكم ولوننا،
الكون ده كله كوننا ،
ماما مدياهولنا …
ومشهده المحامى.

( 3 )

" كلام الرجل المحامى "
محامى كبير قانونجى ،
وفى الكلام برنجى
شايب وشكلى رائع ،
فاهم كل الشرائع ..
لابيض – وده رأى شائع –
أبيض ، والزنجى زنجى

( 4 )

" كلام الولد الأبيض "
والله " الجلاس " ما ادوقه ،
يا الزنجى ينول حقوقه !
تلميذ ، وباستهجى ،
لكن فى الرأى .. حجه ،
العالم بده رجه ،
عشان تمسح فروقه !

( 5 )

" كلام الرجل الأفريقى "
يا ليل .. والبدر .. بمبى ..
يا ليل .. وألم فى جنبى ..
يا ليل .. مقدرش انام بو ..
يا ليل .. و "لومومبا " قام بو ..
يا ليل .. أنا سجنى بامبو ،
وان ماكسرتوش .. ده ذنبى !

عزيزى درش ..
زعلان قوى من "أمريقه" ؟
علشان حكاية التفريقة ؟
عاوز صراحة وحقيقة ؟
الحل يابنى ف "افريقه" !
الأصل لما يزول.
الظل برضه يزول !
سلم على خالتى شفيقة !

**Amany Ezzat** **Amany Ezzat** · 06-30-2014, 03:29 AM

حرف الحاء

حديث تليفزيوني

سيداتى آنساتى سادتى . . .
ده حديث ، عن مشكلات الوحدتى .
ياما قالوا فى السياسة وكرروا ،
ياما ناس فى الوحده باتوا يفكروا ،
كلهم ، قالوا كلام جدا غلط !
ومحدش صح ، غير أنا فقط !
أنا عندى فكره ، لكن مدهشه ،
وكبيره ، ولذيذه ، ومنعشه .
الطريقه يا شعوب يا عربيه ،
انكم ماتلبسوش الجلابيه .
لما كله يبقى لابس بنطلون ،
تبقى وحده من هناك لحد هون !

الحرب مش نزهه

الحرب مش نزهة ومش تفاريح
مش طبل أجوف يملا سمع الريح
الحرب لما تبقى حرب صحيح
معناها موت وألم ودم يسيح
راجل لراجل .. مش بنات قنازيح
على كتفهم مدفع فشنك صفيح
وشمال يمين يستعرضوا المفاضيح
ويرقصوا نهودهم بشكل قبيح

ويصوروهم مأجورين سناكيح
سايقين بطل مصرى ف كرامته جريح
ويقولوا دول أسروه .. كدب صريح !
ده كان فى يونيه اللى ماشافش قتال
ودخلنا فى اكتوبر رجال لرجال
" إرحم يا مصرى " بقم يقولم قال
ويسحسوا الأندال دموع تماسيح .!

حرف الدال

دعايه انتخابيه

آلوه . . آلوه . . يا أمم.
تعالالى لالى يا محترم.
الحمد لله ، انكم
مابتعرفونيش كلكم.

لو كنتو عاوزين أسطوات
أنا أسطى سواق الفيات"
وإن كنتو عاوزين فلاحين
أنا عندى حبة فدادين

والا انتو عايزين ياترى ،
مرشحايه مغندره ،
متبدره ، ومتحمره ،
إذا كان كده ، فأنا ( ..... )

دموع ورا البرقع

أنا لوحدى مفيش حاجه
مجرد إسم متشخبط على ورقه
فى إيد واحد مدير أصله قومسيونجى
يقدمها لتركى والا لخواجه
لا يعرف عربى ولا شفقه
يروح ماضى بقلم باركر بلا فرنجى
أروح مرفود
وأصبح إسم متعلق على اللوحه
تشوفه زمايلى فى الجايه وفى الروحه
يفوت عامل فى إيده نص شقه بفول
يقف ويقول :
يا عالم ربنا موجود
مفيش مهرب من التوفير
وعامنول مارفدوا كتير
ويدخل وحده فى المصنع
ونا أطلع
أنا لوحدى

أنا لوحدى مفيش حاجه
مجرد اسم فى الجلسه بيتنادى
ما بين ميت إسم وزيادة
وجدول جلستى مليان ... والقاضى
مهوش فاضى
يناديلى أقول له يا سعادة البيه
مدير المصنع الدباح قطع عيشى
يقول لى عشان جريمة إيه وينزل أسئلة يسألها ضبيشى
وقدامه قانون عقد العمل ودوسيه
واسمى عليه
ونضارته وحبابى عنيه
ونا مجرد تلات كلمات على الأوراق
أسامينا أنا ووالدى
وإسم اللى اترحم جدى
مايسألنيش ويسأل نفسه باستهزاء
عن الأوراق
وعن اثبات
بمستندات
أقول له مفيش
يقول لى خلاص ما تفلقنيش
ويتمزج محامى الشركة ويهقهق
خلاص القاضى أنهى المشكلة رسمى
ولا اترافع ولا دافع ولا زعق
وفيه أسماء ينادوا عليها غير إسمى
وحيد .. مدحت .. شريف .. سامى
يخشوا الجلسه بمحامى
ونا أخرج
وروحى من الشقا بتعرج
أنا لوحدى

أنا لوحدى مفيش حاجه
مجرد اسم كاتبه ف دفتر الأحوال
جدع ظابط بوليس فرحان
بنجمه يمين ونجمه شمال
يقشر موزه ويأشر
على المحضر
ويبعت عسكرى يجيبنى مع المحضر
وأصبح اسم يتكفن بكل لسان
من السكان
بعيد عن بيتكو يام فلام
خلاص بيبيعوا عفش فلان
وح يطير الجهاز كله
بوريه ونحاس وربطة فرش
وصاحب الملك يفضل له
تلاته جنيه وستين قرش
وتمشى مراتى بعيالها
عشان تاكل فى بيت ابوها

هناك فيه ناس يحبوها
أوصلها
وفى السكة تقول ربك يعدلها
واشوف كل الدموع بتفور وبتلمع
ورا البرقع
أقول لازم نعدلها
وتدخل هيا بعيالها
ونا أرجع
أنا لوحدى

**Amany Ezzat** **Amany Ezzat** · 06-30-2014, 03:34 AM

حرف الراء

راس السنه

ويسكى ، براندى ، نبيت ، كونياك ،

بيره ، فودكا ،

عرقى ، مريسه ، أرمنياك

هنا وهناك ..

صين ، مصر إيطاليا ، أمريكا ..

تشا تشا تشا ، تانجو ، مازوركا ..

أفريقيا بترقص دلوكه وسامبا،

روسيا بترقص بولكا

احنا بنرقص بلدى ودبكه

طراطير وشرايط ورق اصفر وازرق واخضر ،

ووشوش خنازير ، وملايكه ، وجن احمر ..

اللى بيضحك ، وبيسكر ،

واللى بيبكى وبيفكر ،

لكن كله أؤكد لك يا عزيزى – بيستنظر

شئ واحد ، هو الراس الخاصة بعام

مش عارف كام !

إنما يا سلام ..

بقى بعد الطراطير ، والبكا ، والرومبا ،

لو هذا الراس ماظهرش ..

لو هذا العام – اللى احنا بنستناه – ماحضرش ..

علشان

انضربت كذا بومبه !!

رساله الى جندي

يابن عمى ياللى فى الخط الأمامى
لك سلامى ،
وسلام أطفالى ، ومراتى ، وأبويا ،
وامى ، واخوالى وعمامى …
كلهم فى خير ومشتاقين إليك ،
كلهم متلهفين ترجع لنا ،
وكمان من عندنا يسلم عليك ،
كروان الفجر ، والبط اللى سابح فى القنا ،
وإبراهيم وحسين وماتعدش أسامى
يا ابن عمى ،
ياللى عنوانك فى خط النار بعيد ،
شد حيلك ، كلنا وياك هنا ،
مدفعك جبناه حسب وصفك شديد ،
من دمانا صبيناه صلب وحديد، قاسى وعنيد،
صب منه ع الأعادى كرهنا.
خد من الرجعيه تارك ،
خلى كل الدنيا تسمع فرقعة رعد انتصارك ،
والجميع يا نور عيوننا ،
فى انتظارك

حرف الزاي

الزباين

اللى زيك وبيشتغل بالأجره
واللى زيى وله ماهية مسوجره
طول حياتنا نعرق على رغيف عيشنا
والنهارده ما يفيضش حاجه لبكره

طول حياتنا نعرق على رغيف عيشنا
طول ماعشنا ماعمرناش حوشنا
المساكن والأكل ناتفين ريشنا
والملابس جايين لنا بالقدره

بعنا روحنا بالجمله والقطاعى
للشيطان والخواجه والإقطاعى
واشترينا بصحتك ودراعى
يوم زياده برا القبور الغبرة

يوم بيوم بالعرق كتبنا حياتنا
وكتبنا قصة حياة أبهاتنا
وقصة الخلق كلهم إخواتنا
اللى شاربين كاساتنا قطره بقطره

ناس كتير فى البلد دى زيك وزيى
كلنا مولودين فى أحوال تعيى
القرف مشترك فى حيك وحى
فى الحسين والإمام وغمره وشبرا

فى المحله والمنزله وبور سعيد
وبنى سويف وكفر شكر ورشيد
والبلاد البعيد فى آخر الصعيد
والبلاد اللى أرضها لسه صفرا

كنت باشرب عصير قصب من مده
والمعلم واقف قصاد العده
ينشف العود ده يلتفت للعود ده
شفت تفل العيدان تلول خدت عبره

شفت تفل القصب وشفت الزباين
اللى ممصوص واللى جميع عضمه باين
كلنا مهلوكات عدد ومكاين
كلنا ممضوغين على ضبه فاجره !

**Amany Ezzat** **Amany Ezzat** · 06-30-2014, 03:38 AM

حرف السين

سلم التطور

فى البدء خالص ، كنا سردين فى البحور،

لقيناها بايخه ف حقنا.

صرنا سحالى ، بجناحات زى الطيور،

دايرين نلقط رزقنا ،

طحلب ودود ..

ودود وطحلب ، كل يوم ف بقنا ،

شئ مش تمام !

طب نبقى إيه ؟ .. قال لك : قرود !

أصبحنا يا مبارك ، قرود ..

برضك زهقنا ، وقلنا : لأ ، نبقى بشر

وبشر بقينا ، وايه بأه ؟ ،

أهو ليل نهار غلب وشقا ..

أين المفر ؟ !

أنا عندى حل معتبر ..

نبقى غجر !

السيد عبد العاطي البيروقراطي

السيد عبد العاطى البيروقراطى ،
من " بيروقراط" مركز مش فاكر ايه ،
كل بلدهم بهوات سبحان العاطى ،
الكاتب بيه ومدير المصلحة بيه ،

والسيد – عبد العاطى البيروقراطى
راجل دوغرى ، فاهم إيه اللى عليه ..
راجل يعرف امتى ينخنخ ويطاطى
وكمان يعرف امتى يدلدل رجليه.

ييجى المكتب ، بدرى بمواعيد ظباطى ،
والساعة اتنين ولا ورقة تكون فى ايديه.
فنان فى الشغل ، وفنه أرستقراطى ،
الفن فقط للفن ، بتضحكوا ليه ؟
لا تقوللى مصالح شعب ولا كلام واطى ،
الهدف السامى علاوه تلاته جنيه.

والسيد عبد العاطى البيروقراطى
" السد العالى " ف نظره .. اسمه دوسيه !

حرف الشين

الشدايد

الله يجازى الشدايد كل خير يا ولاد

البوتقة الضيقة القايدة بغير وقاد

تحكم ما بين المعادن من ضعاف وشداد

وتقول .. وقالت لنا على كل شئ بحياد

بشراكى يا مصر يا أشرف وطن وبلاد

معدن ولادك شديد البأس كله عناد

لا ينكسر من محن ولا ينتنى فى جهاد

مصقول كأنه المراية يوضح الأبعاد

فى ضيه شاف الشباب : الحق والحقاد

الثورة فى خضمها وكيد خصمها المنكاد

أبو عقل شرير وفكر حقير ورأس فساد

قرصان بحور الحياه لص المياه والزاد

نهض الشباب يد واحدة ونبض قلبه ازداد

ع الكتف مدفع وفى الأحضان دفاتره جداد

قال يا أعادى الليلادى بكرة بعده معاد

بينى وبينكم وبين الغل والأحقاد

أما انتى يا عدوة الانسان فى كل مهاد

انتى " يا أمية " يا لعنة ثمود على عاد

ما ابقاش شباب مصر لو ما كنت أمحيكى

واقطع بقية الطريق بالثورة للأمجاد

**Amany Ezzat** **Amany Ezzat** · 06-30-2014, 03:48 AM

حرف الطاء

طرزان

يوم الخميس،
واللب، والأحلام، فى كيس
طرزان بيغطس فى الهويس.
طرزان جدع،
طرزان شديد،
دراعه أجمد م الحديد.
قزقزت نص اللب، هاه ..
طرزان بيصرخ: عا عا عاه ..
خنق الأسد،
طحن الدماغ، عجن الجسد ..
قرقشت باقى اللب، من غير قزقزه،
طرزان صرخ قال: عاعاعاه..
صرخت أنا كمان وراه.
ولما قال لشيتا: يا امه زغرطى ..
وحط رجله ع التعيس، فوق التراب،
حطيت معاه رجلى ، بدون جزمة وشراب،
ورسمت بعيون الخيال، بدل الأسد،
محمود أفندى حسين .. مدرس الحساب!

حرف العين

العلم

كم ألف مرة يا علم يا مجيد
قدام صفوفنا مشيت خفيف وسعيد
ومشينا خلفك ننشد الأناشيد
ونشبعك بالحب والتأييد
كم ألف مرة كل صبح جديد
قبل الضباب ماينقشع ويبيد
شفناك بتصعد سارية التمجيد
وهتفنا ليك وحييناك بالايد
يا بؤرة الوطنية والتوحيد
يا مصدرالالهام لكل مريد
نموت وتبقى مرتفع وعنيد
على كل شبر ف مصر يا صنديد
ولو فضل فى الدنيا مصرى وحيد
رح يرفعك يا علم يا مصرى أكيد
بكل قلب شجاع وزند حديد
اثبت مكانك فوق علالينا !
فوق كل قمة من جبال سينا !
وعلى العريش رفرف وكون زينة !
واكتب فى كل قصيدة سطر جديد .

عيون البقر

الزجل ده غزل فى عيون البقر،
يا حلاوة عيونه الوساع ! ..
مافيهاش ولا نقطة ضياع،
فيها ليل، بس من غير سهر..
فيها بحر غويط،
فيها صبر عبيط،
زى صبر الشجر!
يا حلاوة عيون البقر
شعرا شبهوا عيون حريمهم بها،
ونا شاعر، وله واحده بيحبها..
إنما يستحيل! ..
سيبنا م الشعرا،
احنا ناس فقرا،
واللى يعشق فتاه، فيها م البقرة.
يبقى لمؤاخذة تور!

حرف الفاء

فنجان قهوه

قمت النهاردة الصبح منحرف المزاج
خانقت دبان وشى وشتمته فى سرى وابتسمت
أنا أصلى لو جاهرت كان حصل انبعاج
فكتمت حلق البير بغطاه الشهير ثم انكتمت
عيل فى سن المدرسة قاللى : يا حاج
وأنا زرت بيت الله لكين ما اسميش كده
ووليه حبلى قالتها تانى .. عقلى وج ..
أنا اسمى مسيو كيت وكيت يا سيدة
لابس مثقف زى توفيق الحكيم
ببيريه وتلفيحة
أفوت بشكل سليم فرنسى صميم
آخد " كافيه " فى " سان ميشيل " فى باريس على الريحة
واسرح واهيم ورا كل تسريحة
ولما فقت من الهيام
لقيتنى واقع يا حرام
فى مقلب الزبالة والدبان أمم
يتوددوا لى بدفء مصرى ويقولولى
قوم يا حاج
ما يقع غير الشاطر يا حاج
وألف ألف سلامة ليك ..
يا عم الحاج .

يتبع

**Amany Ezzat** **Amany Ezzat** · 06-30-2014, 04:03 AM

حرف القاف

القمح

القمح زى الدهب بينادى شرشرتك
وزرعة القطن مستنيه منقرتك
وجاموستك الحلوة يم المسقه وبقرتك
لازم لهم حضن والا اتنين حشيش أخضر
وتجيبهم الدار وتتعشى فى مندرتك

يا عازق الأرض مين غيرك حايرويها
يا زارع الغلة يا منبت تقاويها
مين اللى حايضمها والا يدريها
لو كنت مانتاش هنا لا قدر الله يوم
ومين حايعلف بهايمك والا يسقيها

يابو العيال العيال ع الفرن نعسانين
حاضنين لعبهم جمال باركه وعرايس طين
والصبح يابو العيال حايقوموا فرحانين
لو كنت مانتاش هنا لا قدر الله يوم
كان مين ح يفرح قلوبهم بالمحبة مين

ليام دى ع الجسر بتفوت ناس ماهيش منا
تقلع الزرع وتبهدل فى نسواننا
وتخطف اللقمة من أولادنا وتهيننا
وكل ما يفوتوا تحصل معركة حامية
ونصبح الصبح والشهداء فايتيننا

ليام دى ع الجسر بيفوتوا انجليز أنجاس
سايبين بلادهم وجايين يدبحوا فى الناس
ما يعرفوش السلام وما يعرفوش الناس
بيحرتوا بالسيوف وبيزرعوا فى الدم
صدق اللى قال مجرمين لم عندهم إحساس

لو كنت عايز تعيش فى سلام وحرية
لو كنت عايز تعيش للزرع والميه
لو كنت عايز تعيش وتربى ذريه
قوم طهر البر بالخنجر وبالمدفع
من جنس دوده انجليزى فى أرض مصريه

قصه

كان فيه ولد صغير
عنده اتناشر سنه

عيل مفعوص و قصير
و غاوي فتونه

بيمثل درو في ذهنه
لشخص عظيم الشأن

و يوماتي يحلق دقنه
مع انه مالهش دقن

بالموس و خلاص و يحرت
المجنون البعيد

لحد ما دقنه كبرت
قال لك ده اليوم ده عيد

ووقف قدام مرايته
يتنطط م الفرح

اكمنه حسب روايته
زي باباه انجرح

تع شوفه بقى النهارده
راجل بيه قد الحيط

و صداغه كل فرده
فيها من القطن غيط

يحلف ع النار و الميه
محو حالق جمعتين

و دي قصه فلسفيه
مغزاها في كلمتين

شرم برم , يا حلوللي
هأو او , اش اش

ترالااللي , امان يا لالاللي
حرنكش , طظ فش.

حرف الكاف

كوكتيل

حفلة كوكتيل دبلوماسية
فى منظمة دولية
أصوات دردشة هادية ونشطة
تشبه فقاقيع شمبانيا فرنسية
ريحة السيجار العطرية
بعض الازياء الوطنية
بعض صوانى المزة
بعض الكئوسات رايحة وجاية
السوفيتى بيشرب طبعا فودكا
الصينى بيتصور جنب الويسكى
والأمريكى بياكل كافيار حاف
وصل الضيف الاسرائيلى
ذو الضحكة العسلية
سلم على كل البشرية
واستلم الكاس بحماس فنان
وطلب م الكابتن تلج كمان
وشرب وشرب
كاس الانسان فى كل مكان
كاس الرجالة والنسوان
كاس العواجيز والشبان
كاس اليابان
لبنان
وكمان لبنان
وطلع بالجزمة ع الترابيزة الجانبية
ومشى بالجزمة ع الأكلات الشعبية
ورقع ضحكة وعمل العملة اللى مش هيه
خلى المطرح تواليت
اتكهرب جو الحفلة الرسمية
واتقال لا لا … لا لا .. لا لا …
دى غلطة فى الاتيكيت !

إعـــــــلان

صلاح جاهين اسطورة فى الحب و الحزن

صلاح جاهين اسطورة فى الحب و الحزن

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك