إعـــــــلان

**Amany Ezzat** **Amany Ezzat** · 01-27-2017, 09:38 PM

تتر مسلسل الأصدقاء

ألحان: ياسر عبد الرحمن
غناء: محمد قنديل

المقدمة:ـ

آدي إيدي مِد إيدك ... جرحي جرحك عيدي عيدك

ود دافي .. نبع صافي ... شيء كأنه نيل موافي

من وريدي و من وريدك ... يا صديقي مِد إيدك

يا صديق عمري يا صاحب ذكرياتي ...
إنتَ كنز أيامي تحويشة حياتي

و مراياتي اللي باشوف جوّاها ذاتي ...
و تواجهني بعيبي تكشف سيئاتي

تِقسى بحنان و استزيدك ... يا صديقي مِد إيدك

أصدقاء و الود موصول فوق زمانّا ...
بيه آمنّا و له آمنّا و فيه أمانّا

بيه على الدنيا و ع الدهر استعانّا ...
و إن زمنّا خانّا و في لحظة طعنّا

تستعيعدني و استعيدك ... يا صديقي مِد إيدك

النهاية:ـ

آدي يدّي مد يدك ... قد ودك قلبي ودّك

د انتَ بعد الأهل أهلي .. و اذا يوم قلبك ندهلي

حتلاقيني بقلبي عندك .. يا صديقي مد يدك

يا صديق عمري و أحلامي و عذابي ...
في ليالي فرحتك عامل حسابي

في ليالي وحدتي بتدق بابي ..
و عمر باب قلبي ما صدّك

يا صديقي مد يدك

أصدقاء و الود موصول فوق ظروفنا ..
مهما نبعد مهما طوفنا مهما شفنا

في ساعات شدتنا و قلقنا و خوفنا ...
تستعيدني و استردّك

يا صديقي مد يدك

**Amany Ezzat** **Amany Ezzat** · 01-27-2017, 09:49 PM

كتيبة اعدام
ألحان: عمار الشريعي
غناء: فرقة الأصدقاء

المقدمة:

ملعون في كل كتاب يا عار الخيانة
اللعنة و النار ع اللي خانوا الأمانة
عاشوا على موتنا .. و موتهم حيانا
عليهم اللعنة في ترابنا و سمانا

إتردي يا ابواب البيوت .. و ابعديهم
و إتسدي يا ابواب القلوب .. و اطرديهم
و اتفتحي يا ابواب الجحيم .. و اورديهم
جزاة ما خانونا و باعونا لعدانا

ما تطلعيش يا شمس ع اللي يخونّا
و ما تنطفيش يا نار قلوبنا و عيونّا
و ما ترحميش اللي احنا على قلبه هنّا
و اكوي بنارنا كل نقطة في دمانا

النهاية:ـ

حبيبتي من ضفايرها طل القمر
و بين شفايفها ندى الورد بان
ضحكتها بتهز الشجر و الحجر
و حنانها بيصحّي الحياة في النبات

حبيبتي بتعلّمني أحب الحياة
من حبي فيها حياتي شمس و ربيع
و الحب في الدنيا دي طوق النجاة
لولاه يضيع قلب المحب الوديع

يا حلوة يا بلدنا يا نيل سلسبيل
بحبك انتِ رفعنا راسنا لفوق
لو الزمن ليّل ما يرهبنا ليل
شوقنا في عروقنا يصحّي شمس الشروق

الحلوة قلب كبير يضم الولاد
و زاد و زوادة و ضِلة و سبيل
الموت و الاستشهاد عشانها ميلاد
و كلنا عشّاق ترابها النبيل

**Amany Ezzat** **Amany Ezzat** · 01-27-2017, 09:50 PM

لو كنت أمير
ألحان حمدي رؤوف غناء علي الحجار
-
من أمراء الحواديت
كنت ادى لكل فقير وفقيرة بيت
بيت بجنينة مليانة زهور
وبعشة مليانة كتاكيت
وأعلّق فوقه قمر بنور
ونجوم لولى... فتافيت فتافيت
لوكنت أمير
من أمراء الحواديت
كنت ادى لـ... وزرائى محاريت
علشان يشتغلوا بايديهم ويشوفوا ازاى
الأرض السمرا لما نحرتها كدة رايح جاى
بتطلع غلّة وبن وقطن وضل وشاى
وتطلع غاب نعمل منه الأرغول والناى
لو كنت أمير
من أمراء الحواديت
كنت أدّى لكل الأطفال الحلوين ألعاب
قطر بقضبان..فرشة ألوان.. مية أو زيت
وابنيلهم قصر على المالح من غير أبواب
قصر بقبة لولى وقبة مرجان
وأعلّق عالقبة أجراس
فضة ومرمر ودهب ونحاس
لكن قبل ده كلّه لو كنت أمير
من أمراء الحواديت
كنت ادّى لكل الناس
وردة وكتاب
وردة وكتاب
وكمان قبل ده كلّه
قبل ده كلّه
لو كنت أمير
من أمراء الحواديت
كنت أرفرف زى النسمة وادخل فى الحلق
وأقطّع نص السنة الخلق
نص اللى مابيقولش الحق
علشان يتعلمه
امتى يقولوا أيوة
وامتى لأ
ده لوكنت أمير
من أمراء الحواديت

**Amany Ezzat** **Amany Ezzat** · 01-27-2017, 09:51 PM

مسلسل الشهد والدموع – مقدمة
ألحان عمار الشريعى – غناء على الحجار

تحت نفس الشمس وفوق نفس التراب
كلنا بنجرى ورا نفس السراب
كلنا من أم واحدة.. أب واحد.. دم واحد
بس حاسِّين باغتراب
من حنان الحب هل الغل جانا
من مرارة الغل جلجل صوت رجانا
نبكى من الغل اللي بيعكر حياتنا
ولا من الحب اللى هدهدنا وشجانا
يا زمان الغربة ليلك بيحاصرنا
وفى ضلامه المر طاوينا وعاصرنا
بس طول ما الحب بيرفرف علينا
الجدور حنمدها ونصنع مصيرنا

مسلسل الشهد والدموع – نهاية

نفس الشموس بتبوس على روسنا
نفس التراب يحضن خطاوينا
طب ليه بنجرى ونهرى فى نفوسنا
وليه نعيش ناكل فى بعضينا
آدى الحقوق وآدى اللى طالبينها
والحق تاه فى الباطل البطا
لوقلوبنا تاهت عن محبينها
ونجومنا عالية بعيدة ما تنطال

**Amany Ezzat** **Amany Ezzat** · 01-27-2017, 09:53 PM

تتر مسلسل
ليالى الحلمية
مقدمة
ألحان ميشيل المصرى – غناء محمد الحلو

منين بيجي الشجن.. من اختلاف الزمن
ومنين بيجي الهوى.. من اختلاف الهوى
ومنين بيجي السواد.. من الطمع والعناد
ومنين بيجي الرضا ..من الايمان بالقضا

من انكسار الروح في دوح الوطن
يجي احتضار الشوق في سجن البدن
من اختمار الحلم يجي النهار
يعود غريب الدار لأهل وسكن

ليه يا زمان ما سبتناش أبرياء
وواخدنا ليه في طريق ما منوش رجوع
أقسى همومنا يفجر السخرية
وأصفى ضحكة تتوه في بحر الدموع

منين بيجي الشجن من.. اختلاف الزمن
ومنين بيجي الهوى من.. اختلاف الهوى
ومنين بيجي السواد من.. الطمع والعناد
ومنين بيجي الرضا من.. الايمان بالقضا

ولفين ياخدنا الأنين
لليالي مالهاش عينين
ولفين ياخدنا الحنين
لواحةالحيرانين

نهاية

ما تسرسبيش يا سنيننا من بين ايدينا
ولا تنتهيش ده احنا يا دوب ابتدينا
واللى له أول بكرة حيبان له آخر
وبكرة تفرج مهما ضاقت علينا

ولفين ياخدنا الأنين
لليالي مالهاش عينين
ولفين ياخدناالحنين
لواحة الحيرانين

**Amany Ezzat** **Amany Ezzat** · 01-28-2017, 10:32 PM

تتر مسلسل بوابة الحلواني
الحان بليغ حمدي غناء علي الحجار

بندق ندق بوابة الحياة بالإيدين قومى
قومى .. قومى افتحى لولادك الطيبين قومى .. قومى
اللى بنى بنى مصر كان فى الأصل حلوانى
وعشان كده مصر يا ولاد مصر ياولاد حلوة الحلوات
اللى بنى بنى مصر كان فى الأصل حلوانى
وعشان كده مصر يا ولاد مصر ياولاد حلوة الحلوات
اللى بنى بنى مصر كان فى الأصل حلوانى
وعشان كده مصر يا ولاد مصر ياولاد حلوة الحلوات
وادى وبوادى و بحور و قصور و موانى
توحيد وفكر وصلاة
تراتيل غنا وابتهالات
وكل ده فى مصر يا ولاد مصر ياولاد حلوة الحلوات
اللى بنى بنى مصر كان فى الأصل حلوانى
و عشان كده مصر يا ولاد مصر ياولاد حلوة الحلوات
اللى بنى مصر كان حلوانى يا ولداه حلوانى .. حلوانى
اسمه على بوابتها لا زال ولا زايل .. لا زال ولا زايل
ساعة الهوايل يقوم قايل
يابلداهـ .. يابلداهـ
و ييجى شايل
هيلا هوب شايل .. هيلا هوب شايل .. حمولها و يعدل المايل
و عشان كده مصر يا ولاد حلوة الحلوات
اللى بنى بنى مصر كان فى الأصل حلوانى
و عشان كده مصر يا ولاد مصر ياولاد حلوة الحلوات
بحلم يا صاحبى وأنا وأنا لسه بأحبى
بدنيا تانية و مصر جنة يا صاحبى
و آجى أحقق الحلم
ألقى الموج عالى عالى عالى عالى طاح بى
و نعود سوا نطوى الأنين بالحنين
و نعود سوا نطوى الأنين بالحنين
وعشان كده مصر يا ولاد حلوة الحلوات
اللى بنى بنى مصر كان فى الأصل حلوانى
وعشان كده مصر يا ولاد مصر ياولاد حلوة الحلوات

**Amany Ezzat** **Amany Ezzat** · 01-28-2017, 10:34 PM

تتر مسلسل المرسى و البحار
الحان ياسر عبدالرحمن غناء محمد الحلو

المقدمة

يا مركب العمر يا مشبوح مابين هلبين
تتشد منهم تعيش في الشك ما بين بين
تنفك منهم تتوه مندوه في بحر البين
ولفين نروح .. ياريت كان لي يا هو قلبين
متقولش اصلك وفصلك، قول حليم ستّار
هتغمي بإديك عنيك، تعمى الخطى وتحتار
عقلك في راسك وملزوم كل تختار
عيش في الحقيقة .. ليندار نصلها البتار
وتحشك النار .. وتتسوى على الجنبين
مين وابن مين الحياه ميهمهاش اصلك
اصلك بفعلك تواصل فعله ويوصلك
فعلك ده من عقلك، ان طاوعته رقص لك ..
زمنك ودنياك .. واذا قصقصته نغص لك ..
زمنك ودنياك، فشوف واختار ما بين دربين

النهايه

يا مركب العمر هو العمر كام .. واحد
يا عيشته كله .. يا ضيعه وعليك واحد
متقولش أصلك وفصلك كلنا واحد
من اصل واحد، ورب الكون إله واحد
تقول زماني رماني او زماني اندار
تتوه في ليل الاماني، في موج عالي وغدار
تقول زماني عماني، وداربي طال بي ودار
تضيع في بحر الزمن، وتعيش غريب الدار
تلقى الحياه راحت
وإن كان زمان الزمان، ملا ليل جدودك نور
واتعصّبوا بتاج دهب في قصور من البنور
ما هم كمان ادوا ياما، وكل شئ بالدور
وهم برضه اللي خلّوا، بينا الزمن ده يدور
والعالم ارتاحت

**Amany Ezzat** **Amany Ezzat** · 01-28-2017, 10:40 PM

تتر مسلسل شرف فتح الباب
الحان عمار الشريعي غناء مدحت صالح

مقدمة

شرف الأستاذ شرف فتح الباب جاب ضُرف
ولّا حظه اتنصف .. وأخد حقه وغلب
يمكن لحظة ترف .. يمكن
واتعشم بالطرف .. يمكن
ماحسبهاش وانحرف .. يمكن
في التيار و انجرف
شرف الأستاذ شرف
الدنيا يا ابن الناس مهيش جاه ومال
وراحة البال فين اذا حالها مال
و ابن الحلال عمره ما يمشي في ضلال
والبركة ما تحل إلا على مال حلال
وهييجي يوم تلقى المخبي اتعرف
شرف الأستاذ شرف
ومش المهم تبيع لمين أو بكام
هتبيع تضيع وسط الكرام والِلئام
لا ابن الحلال يتربى من مال حرام
ولا للضلال ان الحرام احترام
ولا كرامة للي باع الشرف
شرف الأستاذ شرف

**Amany Ezzat** **Amany Ezzat** · 01-28-2017, 10:44 PM

اغنية توت توت
الحان عمار الشريعي
غناء عبد المنعم مدبولي و هدى سلطان

توت توت.. توت توت.. توت توت توت
قطر صغنتوت في الليل بيفوت
ويهل علينا في ميعاد مظبوط
***
قطر صغنتوت بس عامل غاغة
في بغبغانات رغاية بغبغة
ياكلوا شكولاتة يندغوا نداغة
أو يتشدقوا بلبان ممطوط
***
آه يا نا يا قليلة الحيلة
ما انتوش جايبنها لبر الليلة
ده أبو سنجة طويلة عامل هليلة
ولبيت العيلة راجع مبسوط
***
من بعد شقاوته وبعد همومه
من بعد ما لف ودار طول يومه
تروماينا أهو واصل لمحطة نومه
وده أول قطر ينام في بيوت
***
تصبحوا على خير يا حبايب روحي
يا دوا جروحي في الليل النوحي
يا 3 قمرات طلوا على سطوحي
يا 3 يمامات على شجرة توت
***
شدوا الملايات واتغطوا وناموا
واللي يغمض هيشوف في منامه
باب جنة أحلامه قدامه
وقصور فضة ومرجان وياقوت

**Amany Ezzat** **Amany Ezzat** · 01-28-2017, 10:46 PM

اغنية يا مهون الاحمال
فيلم الفتى الشرير

الحان احمد الحجار غناء علي الحجار

يا مهون الاحمال
زمانا حاله مال
والدنيا راكبه شمال
واللي معاه المال
بطال وانا عمال
***
يا مهون التحاميل
كتفي بكتف زميل
بس الكتاف بتميل
وانفكت الصواميل
م الجوع وم الاهمال
***
يا مهون الحمول
حكمك بات مشمول
وعملنا معول
بكره اللي جاي مأمول
مش جاي بلا رسمال

**Amany Ezzat** **Amany Ezzat** · 01-28-2017, 10:53 PM

تتر مسلسل اميرة في عابدين
الحان عمار الشريعي غناء هشام عباس

مقدمة

ياللى تقول مكتوب علينا الهوان..
لا الدنيا سيرك.. ولا الزمن بهلون!
شى الله يا طاهرة.. يا رئيسة الديوان
آن الأوان نبقى احنا.. آن الأوان
.... واديكو يا ولاد الأصول شاهدين
(وادى الأميرة.. أميرة فى عابدين)
***
ياللى الزمان.. خدكو لفوق فى صعوده
ورجع وخان.. ضعتوا ف بروقه وردعوده
عودوا لأصولكو.. تانى للأرض عودوا
ده اللى يمد جدوره.. يشتد عوده
كلمة قالولها جدودكم الخالدين
(وآدى الأميرة.. أميرة فى عابدين)
يا قلبى زيح غيم الضلال عن عينيك
وعيش.. وعيد زمن البراءة القديم
وخد اللى ليك.. والعن جدود لاعنيك
واعلا.. على كل الهشيم والرديم
يا قلبى داحنا وبكره.. متواعدين
(وآدى الأميرة.. أميرة فى عابدين)

نهاية

بركة دعا الوالدين.. ليوم الدين..
تِحْمينا من كل العدا اللاّبْدين
وكلنا شاهدين
وقلوبنا مناخدين
(وأميرة.. راجعة أميرة.. فى عابدين)
***
ياللى اكتشفت ان انت عشت فى خداع
وإنّ ماضى العمر.. ع الفاضى.. ضاع
إياك تقول: "ملّيت.. يا دنيا.. وداع"
ليل الجراح راح.. والصباح بعدين
وكلنا شاهدين
***
يا قلبى لسه كل شىء مستطاع
صحصح كده وفتّح عينيك الوساع
وافرد شراع حلمك.. ومد الدراع..
لبكره.. تلقى بكره بين الإيدين
وكلنا شاهدين.

**Amany Ezzat** **Amany Ezzat** · 01-28-2017, 11:02 PM

أغنية أراجوز
فيلم الاراجوز
الحان عمار الشريعي اداء المبدع عمر الشريف

أراجوز .. أراجوز .. إنما فنان
فنان .. أيوه .. إنما أراجوز
و يجوز يا زمان أنا كنت زمان
غاوي الأرجزة طياري .. يجوز
إنما لما الكيف بقى إدمان
باجي أبص لشيء واحد أرى .. جوز
أرى إيه؟ أرى إيه؟ أرى أرى أراجوز
***
فلسان .. كحيان .. أيوه أنا فلسان
إنما برضك .. راجل إنسان
بضرب بالألف لسان ولسان
وباكلها بعرقي .. ومش إحسان
راجل والرجولية لا عضلات
و لا ألابندة وسيما وحركات
الرجولية الحقيقية ثبات
قدام جبونية أي جبان
****
أراجوز أنا و أحمي أرى أرى إيه؟
أحمي قراريط الناس من مين؟
من الناس الأرى أرى إيه أرى إيه؟
من الناس القراميط الملاعين
ماهو أصل أنا مش من الأرى أرى إيه
مش من القراطيس
و لو الحال مال مقعدش أنا على
أرى إيه أرى إيه؟ .. قرافيصي و أطنش ع الأندال
لازم أشك الأندال مهموز
و أدوس ع اللي افترى والعنطوظ
م أنا أرى إيه أرى إيه؟؟ أرى أرى أراجوز
****
أراجوز .. وشجيع .. والدنيا ميدان
فارس .. حارس .. واقف ددبان
و إذا بان للشر نيبان وزبان
باحمي الغلبانة والغلبان
وشجاعتي ماهياش في الطاخ طيخ
دي شجاعة تفكير وتماخيخ
الأرض أضربها تجيب بطيخ
بذكاوتي وأخلي الخلا بستان
****
أراجوز أنا .. والدنيا أرى إيه؟
قرشانة واحنا شبر شبيط
ياما قرمتني وأرى أرى إيه؟
قرصتني ف لباليبي وأنا كبير
فسرحت أنفخ أرى إيه أرى إيه؟
أراغيلها وأغني يا ليلي يا عين
و أتمسخر على أرى إيه أرى إيه؟
أراذلها الفجرة الطماعين
و أضَّحَك كل صبي وعجوز
ع اللي بيتنطط فرقع لوز
مانا أرى أرى إيه؟ أرى أرى أراجوز
****
أراجوز .. وسايقها هبل في جنان
و أنا قلبي .. ملان جدعنة وحنان
وأبان ساهي سهتان سهيان
إنما عقلي للعدل .. ميزان
أنا فلتة .. إنما مش فلتان
وساعات حرنان .. وساعات زنَّان
يمكن علشان وحداني ..
ما ليش أراجوزة تاخدني بالأحضان
****
أراجوز أنا .. وأقدر أرى أرى إيه؟
أراعيكي وأشيلك في عيوني
و إذا مرة زعلتي أرى أرى إيه؟
أراضيكي بعقلي .. وبجنوني
حُطِّي من السما على أرى أرى إيه؟
أراضيّه واسلِّم لِك أمري
وكُلِي معايا في أرى إيه أرى إيه؟
قروانتي يا كروانة عمري
وبَدَل منا كده ملوي الَبَزبوز
أصبح لك جوز معزوز محظوظ
إيه يا ترى إيه؟ أرى أرى أراجوز
أرى إيه؟ أرى إيه؟ أرى أرى أراجوز

**Amany Ezzat** **Amany Ezzat** · 01-28-2017, 11:05 PM

أغنية اراجوز المدارس
فيلم الاراجوز

ده أراجوز المدارس
دا نوارة المجالس
فارس ولا زيي فارس
أواجه لا أوالس
داري بحالنا ودارس
وعلى جروح روحنا دايس
وهيحكي لنا حكاية
عن واد لايص وحايس
واحكي يا بن المدارس
***
الواد عواد ياهوه
همّل في أرض أبوه
والأرض عرض واللي يفوت أرضه يتوه
الأرض الشابة بارت
قام جرفها استدارت
وفلوس تجريفها طارت
وقعد يائس وخانس
واحكي يا بن المدارس
***
ولأن الفقر كافر
خد بعضه وراح مسافر
لبلاد الجاز وعافر
ورجع وخيره وافر
جاب مروحة وراديو
وجهاز تسجيل وفيديو
شهرين وجيوبه فضيوا
وقعد يائس وخانس
واحكي يا بن المدارس
***
يعني معنى الحكاية
اللي يبيع في البداية
يضيع قبل النهاية
ويدوخ دوخة الولايا
ومعنى القصة برضه
اللي يفرط في أرضه
يبقى فرط في عرضه
وافهم يا ابو مخ يابس
واحكي يا بن المدارس
***
ده أراجوز المدارس
دا نوارة المجالس
فارس ولا زيي فارس
أواجه لا أوالس
داري بروحنا ودارس
وعلى جروح روحنا دايس
كده وفهمنا الحكاية
عن واد لايص وحايس
تسلم يا بن المدارس

**Amany Ezzat** **Amany Ezzat** · 02-01-2017, 06:33 PM

أغنية يلا بينا
ألحان ابراهيم رجب غناء محمود عبد العزيز
فيلم الكيت كات

ياللا بينا تعالوا نسيب اليوم فى حالة
وكل واحد مننا يركب حصان خيالة
درجن درجن درجن درجن
هنهرب من النهاردة ونهرب من المكان
ونطير ونطير ..
نطير مع نسمة شاردة ونروح لايام زمان
***
دي إيه؟ دي مدبغة علشان صنع الجلود
ودي إيه؟ دي مصبغة علشان صبغ الجلود
لكن ورا الصباغة والألوان والدباغة
فيه جلد كان جمل، وجلد كان حمل
وأهه كله بيتعمل جزمة وحزام وشنطة
فيه جلد مالهش لون وجلد بألف لون
لو تغسله بصابون يطلع لونه أونطة
سيبك م المدبغة وصباغة المصبغة سيبك
وبص بص شوف، شوف الناس والظروف
يمكن تلقى الديابة لابسة فروة خروف
يمكن تلقى الغلابة في أول الصفوف
درجن درجن

**Amany Ezzat** **Amany Ezzat** · 02-01-2017, 06:36 PM

بتسأل يا حبيبي
ألحان عمار الشريعي غناء عفاف راضي

وبتسأل ياحبيبي بحبك قد ايه..
بحبك يا حبيبي بالعالم واللي فيه
بالشمس والقمر.. والنجمة والسهر..
والنسمة والسفر.. بالبحر والشجر
ده حلم أنا عايشة بيه
***
حبك شمس الليالي.. حبك نسمة صباح
وقلبي في العلالي لهواك فارد جناح..
العالم بين ايديك
لما تغيب عن عنيا يغيب عني الوجود..
ولا تبقي الدنيا دنيا إلا لما تعود
وعمري قد ايه
***
حبك هو الربيع.. حبك زهر المنى
ولولاه قلبي يضيع.. ولولاك ماكنت أنا
وبتسأل ياحبيبي بحبك قد ايه..
بحبك يا حبيبي بالعالم واللي فيه

إعـــــــلان

سيد شعراء العامية الشاعر سيد حجاب

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك