إعـــــــلان

**Amany Ezzat** **Amany Ezzat** · 07-15-2014, 01:03 AM

جارى اعادة رفع صور الموضوع تابعونا لاحقا 1

بداية علاقته بالمطرب الراحل محمد رشدى
كما يرويها الخال :
أغنية (تحت الشجرة يا وهيبة)
عندما قدمتها للأستاذ الشجاعي مدير الاذاعة وقتها
لم يبد ارتياحاً لكلماتها وسألني:
من الذي في رأيك يمكن أن يغنيها ؟
فأجبته على الفور قائلاً هو شخص واحد فقط
الذي غنى أدهم الشرقاوي فقال لي الشجاعي
ولكن هذا المطرب تعرض لحادث
ولا يستطيع الغناء الآن فقلت له:
الحادثة كسرت ذراعه وساقه ولكن هل كسرت صوته؟
فقال لي إذاً ابحث عنه و طالما أنك مُصر عليه
وقد كان

تحت الشجر يا وهيبه

تحت الشجر يا وهيبه .. ياما كلنا برتقال ..
كحلة عينيك يا وهيبه .. جارحه قلوب الجدعان ..
الليل بينعس على البيوت وعلى الغيطان ..
والبدر يهمس بالسنابل والعيدان ..
يا عيونك النايمين ومش سألين ..
وعيون ولاد كل البلد صاحيين ..
تحت الشجر واقفه بتدعك بايديها الدوأنه ولا ده قلبي ..
قلبي فرح جوا الفرح لما رأيت رمشك سرح ..
كحلة عينيك يا وهيبه .. جارحه قلوب الجدعان ..
يا عايئه يا انتي يا نجمة الصبحيه ..
خلخال برنه يرقص الجلابيه ..
والعقد غالا الكهرمانيه ..
والطرحه بالترتر ملاليه .. ملاليه
تحت الشجر واقفه بتدعك بايديها الدوأنه ولا ده قلبي ..
قلبي فرح جوا الفرح لما رأيت رمشك سرح ..
كحلة عينيك يا وهيبه .. جارحه قلوب الجدعان
تحت الشجر .. طل القمر يالالالي ..
شافني حزين ميل عليا وقالي ..
عيني الجميل منك بقى اتهنى ..
تحت الشجر راح تضحك الجنه ..
تحت الشجر واقفه بتدعك بايديها الوأنه ولا ده قلبي ..
قلبي فرح جوا الفرح لما رأيت رمشك سرح ..
كحلة عينيك يا وهيبه .. جارحه قلوب الجدعان ..
تحت الشجر يا وهيبه .. ياما كلنا برتقال ..
كحلة عينيك يا وهيبه .. جارحه قلوب الجدعان ..

يا عدوية..

1

صياد ورحت اصطاد صادوني
طرحوا شباكهم رموش العين.. صابوني
يا عدوية..
اه يا ليل يا قمر والمنجه طابت ع الشجر..
اسقيني يا شابه.. وناوليني حبة ميه..
اسم النبي حارسك.. اسمك ايه ردي عليا..
عدوية..
اه يا عدوية..
اوعوا تحلوا المراكب.. والله يا ناس ما راكب..
ولا حاطط رجلي في الميه.. الا ومعايا عدوية..
عدوية..
اسمك عدوية يا صبية.. ورموشك شط..
وانا طول عمري غريب في الميه.. بتشال واتحط..
يا ام الخدود العنابي.. يا أم العيون السنجابي
يا مركبي وبحرك داري.. يا حجاب حشيلوا في غيابي..
مدي ايديك خديني.. خديني..
ولفلفيني السنين.. خديني ..
والله صورتك بتنفع تزين الجرانين..
اوعوا تحلوا المراكب.. والله يا ناس ما راكب..
ولا حاطط رجلي في الميه.. الا ومعايا عدوية..
عدوية..
في ايديا المزامير.. وف قلبي المسامير..
الدنيا غربتني.. ونا الشاب الأمير..
رمشك خطفني من اصحابي.. وانا واد صياد ..
لفيت بلاد وبلاد.. وبلاد
اتاريكي ساكنه الناحية دي.. يا سلام يا ولاد..
مين كان يقول البصه دي تصطاد صياد..
اوعوا تحلوا المراكب.. والله يا ناس ما راكب..
ولا حاطط رجلي في الميه.. الا ومعايا عدوية..
عدوية..
دوار.. يا ناسيني الشوق دوار..
يا ممشيني كذا مشوار..
في الموج نحتار.. ليل ويا نهار..
عدويه.. اهي.. ضحكتها نهار..
عدويه اهي.. شمس واسرار..
اوعوا تحلوا المراكب.. والله يا ناس ما راكب..
ولا حاطط رجلي في الميه.. الا ومعايا عدوية..
عدوية..

1

**Amany Ezzat** **Amany Ezzat** · 07-15-2014, 01:07 AM

الشحرورة صباح

ساعات ساعات
ساعات ساعات
أحب عمرى وأ
س عشق الحاجات
وساعات ساعات
ساعات ساعات
أحب عمرى وأعشق الحاجات
أحب كل الناس وأتملى احساس
أحب كل الناس وأتملى احساس
وأحس جوايا بميت نغم
ميت نغم يملو السكات
ساعات ساعات ..
وساعات ساعات
ساعات ساعات
أحب عمرى وأعشق الحاجات
آه آه
وساعات ساعات..
أحس أد ايه وحيدة
وأد ايه الكلمة فى لسانى ماهيش جديدة
أحس أد ايه وحيدة
وأد ايه الكلمة فى لسانى ماهيش جديدة
وأد ايه مانيش سعيدة
مانيش سعيدة
وان النجوم
النجوم بعيدة
وتقيلة خطوة الزمن
تقيلة دقة الساعات
ساعات ساعات ..
وساعات ساعات
ساعات ساعات
أحب عمرى وأعشق الحاجات
آه آه
وساعات ساعات..
أضحك وألعب زى عصفورة ربيع
زى النسيم
زى النسيم ما يعدى وفى لحظة يضيع
أضيع
أفرح أوى ..
وأضحك أوى أوى..
وأحب عمرى وأعشق اليوم اللى فات
ساعات ساعات ..
وساعات ساعات
ساعات ساعات
أحب عمرى وأعشق الحاجات
آه آه
وساعات ساعات..
غريبة..
وغريبة
نفس اللى بيفرحنى ما يفرحنى
وغريبة
نفس اللى بيريحنى ما يريحنى
وأحس ان عمرى فات
من غير ما أحب عمرى وأعشق الحاجات
وأحس ان عمرى فات
من غير ما أحب عمرى وأعشق الحاجات
كدا ساعات
وكدا ساعات
آه
وغريبة غريبة
دقة الزمن..
وغريبة غريبة
لعبة الساعات..
غريبة غريبة..
لعبة الساعات
ساعات ساعات..
وساعات ساعات
ساعات ساعات
أحب عمرى وأعشق الحاجات
آه آه
أحب كل الناس وأتملى احساس
وأحس جوايا بميت نغم
ميت نغم يملو السكات
ساعات ساعات ..
ساعات ساعات
ساعات ساعات
أحب عمرى وأعشق الحاجات
آه آه
1

**Amany Ezzat** **Amany Ezzat** · 07-15-2014, 01:10 AM

الرائعة شادية

أسمراني اللون

آه يا اسمراني اللون.. حبيبي يا اسمراني
يا عيوني نسياني عيون.. حبيبي الاسمراني

آه تحت الرمش عتاب وحنين وعذاب وعيون ما تنام
آه دوقت معاك طعم الايام دلوقتي تغيب يا سلام
جوني سألوني جاوبتهم عني دموع عيني
علشانك امشيها بلاد.. حبيبي يا اسمراني
من غير ولا مية ولا زاد.. يا حبيبي يا اسمراني

آه يالي عيونك شمعة وضحكة وبحر ونسمة صيف
آه انت رسيت وانا وسط الشوق حيران من غير مجاديف
جوني سألوني جاوبتهم عني دموع عيني
يا طير يا مسافر لبعيد.. روح قول للاسمراني
ليه سافر ونسي المواعيد.. يا حبيبي يا اسمراني

ليه وانت تحب الشوق أكتر مني وقلبك عطشان
ليه وانت قايلي إن غيبت يغيب م الدنيا أحلى مكان
جوني سألوني جاوبتهم عني دموع عيني
قالوا.. قلت دوايا عيون.. حبيبي الاسمراني
بتغرقني ف سحر اللون.. يا حبيبي يا اسمراني

يا عيني يا عيني ع الولد

الواد كما أي عيل في عيال ناس البلد
جسمه برضك قليل زي عيال البلد
يغوى صوت السواقي لما تملى البلد
زي عيال البلد
والقلب أخضر مزهزه لا مكر ولا حسد
زي عيال البلد

الواد أبو قلب لين صبح غير الولد
ضاع منه قلبه وبيضوي وسط صريخ البلد
الحلم اللي حلمته في الصبح بيتفرذ
يصبح ذنب البلد
بيصبح هم البلد
والضحك اللي ضحكته أهه دمعه البلد
صرخة حزن ونكد
صرخة بنت وولد
يا ابو العيون عسلية

ولا قدك ميه يابو العين العسليه
إن شا الله تاخدنى لشط الجنه الدهبيه
وإن رحت معاك وطاوعت هواك
حهرب على أول مركب حتعدى عليا

يا بو عين قدارة ولما بشوفها بتدارى
عايز تسرقنى من قلبى فاكرها شطارة
ما تطمنيش.. بصة عينك.. عسلية عسلها يشبه طعم السنارة
وإن رحت معاك وطاوعت هواك
حهرب على أول مركب حتعدى عليا

يا بو عين عسليه عينيك ما فيهاش حيرة العاشقين
فيها مكر وسحر وشيء مش عارفه جاى منين
شيء بيحايلنى أجرى وراه خطوة وأعود تانى
أهرب وأرجع لك وأهرب مش عارفه أهرب على فين
وإن رحت معاك وطاوعت هواك
حهرب على أول مركب حتعدى عليا

بتغنى عليا وبتلعب بيا.. بعد شوية حترمينى
يابو عين عسلية ولا قدك ميه.. شاطر بس تودينى
حتمشى معاك فى جنينة الحب تلات أيام
وتفوتنى هناك أشواك البعد تكوينى
وإن رحت معاك وطاوعت هواك
حهرب على أول مركب حتعدى عليا

قالى الوداع

قالّي الوداع.. الوداع قالّي
حط إيده ف إيدي وقالّي: الوداع.. قالّي
بصيت عليه ف الليل ماشي
والدمعة حايرة ما نازلاشي
شايفاه بيبعد بعيد.. بعيد
بالفرحة والمواعيد.. بعيد
بالذكريات والعيد
مشي حبيبي ما خلاشي
وقالّي: الوداع.. قالّي

مشي حبيبي، وليه يمشي؟
خايفة البكا يدوب رمشي
دنا كنت بحلم بشي
أخضر يضلل علّي
مش ليلة ما فيهاش ضي
يجي اللي عمره ما ظلمشي
يقولي: الوداع.. قالّي

دي نجوم دي ولاّ دموع ولاّ
الدنيا بيا بتتسلى
ببكي على الحلم راح
زي النسيم والرياح
وساب مكانه الجراح
أخد النسايم والضلة
وسابلي الوداع.. قالّي

آه يا وداع الحبايب
آه مستني فين.. كنت غايب
وأديني راجعة لمكاني
دبلان في قلبي بستاني
راح القمر والأغاني
إديت وما خادتش نايب
إلا الوداع.. قالّي

1

**Amany Ezzat** **Amany Ezzat** · 07-15-2014, 01:16 AM

نجاة

عيون القلب

عيون القلب سهرانة ما بتنامش
وانا صاحية ولا نايمة ما بقدرش
يبات الليل.. يبات سهران على رمشي
وانا رمشى ما داق النوم
وهو عيونة تشبع نوم
روح يا نوم من عين حبيبى
***
حبيبى آه من حبيبى، عليه أحلى ابتسامة
لما بتضحك عيونة بقول يالا السلامة
لما يسلم عليا ولا يقولى كلام
عايزة ورا كل كلمة أقولة يا سلام
دا قالى فى يوم يا حبيبتى خدى القمر
ورحت معاه وما ادانى إلا السهر
***
تقولى كلام وافرح بيه اسيب النوم وافكر فيه
انت تقول وتمشى وانا اسهر ما انامش
ياللى ما بتسهرش ليلة يا حبيبى
سهرنى حبيبى حبك يا حبيبى
بكتب على الليالى اسمك يا حبيبى
***
حبيتك يا حبيبى من غير ما اسأل سؤال
وهسهر يا حبيبى مهما طال المطال
انا بس الى محيرنى وما خلانيش أنام
ازاى انا بقدر اسهر وازاى تقدر تنام؟
واقولة حبيبى كل ما فيك حبيبى وحلو
صوتك حلو قلبك حلو
وحتى لما تتعبنى واسهرلك سهرك حلو

مسير الشمس

مسيرالشمس من تاني
تنور فوق سنين عمري
وتصبح غنوة تنساني من تاني
وترجع فرحتي ف صدري
وهايجيني الربيع الأخضر
شباب نشوان بيتمخطر
مسير الشمس يا غالي

وبكرة وردتي تطرح
ف يوم ما تعود مع النسمة
حبيبي بكرة راح أفرح
وأتعجب على القسمة
مسير الحب هايجيبك
تشيل الفرحة لحبيبك
وهايجيني الربيع الأخضر
شباب نشوان بيتمخطر
مسير الشمس يا غالي

سنة سنتين تغيب عني
لكن تهرب من الشوق فين
وأنا لو ناري تتعبني
راح أتحمل سنة وإتنين
لحد ماترجع الأيام
عليها شمس مش بتنام
وهايجيني الربيع الأخضر
شباب نشوان بيتمخطر
مسير الشمس يا غالي

1

يتبع

**Amany Ezzat** **Amany Ezzat** · 07-15-2014, 01:23 AM

فايزة احمد

مال عليا مال

مال عليا مال
مال عليا مال .. فرع من الرمان ..
قلبى الاخضر .. شمعة ورقصت .. فوق الشمعدان ..
مال عليا مال ..
هل كأنه هلال ..
وانا قاعدة حيرانة لوحدى ..
وف عينيا سؤال ..
مال على توبى .. قولت اه يا توبى ..
قالى سلامة توبك ده انتى .. وردة ف البستان ..

مال عليا مال .. نجماية وموال ..
كلمنى عن بيتنا الطيب.. واللقمة الحلال ..
مال على ايدى .. قولت اه يا ايدى ..
قالى سلامة إيدك ده انتى .. قلة العطشان ..

مال عليا مال .. مال عليا وقال ..
قولت انا عايزة .. حبك انت ..
اعمل ايه بالمال ..
مال على عينى .. قولت يا عينى ..
قالى سلامة عينك ياللى .. نورتى المكان ..
مال عليا مال .. فرع من الرمان ..
قلبى الاخضر .. شمعة ورقصت .. فوق الشمعدان ..

مادام معاى

ما دام معاي اللي بحبه وبريده.. ما دام معاي
وبنقسم اللقمة ونضحك وبنشرب شاي
ما يهمنيش مهما إن قالوا
ما هو دول عوازلي وعزاله
بيقولوا داير على حاله
مع انه كان في الساعة دي قاعد معاي

بيقولوا ياما أنا عارفة أنا
أنا عارفة خلي يعشقني أنا
لو خطى بره بيته سنة
ينده عليا وانده عليه
في ليالي الشوق يسمع نداي

قالوا البنات قالوا وعادوا
وفي الميعاد كان على بابه هالل علي
ضحكتله وقلتله شايف بيغيروا ازاي

بالى معاك

بالي معاك بالي يابو الهوا العالي ياالاسمر
طول مانت في العالي ياالاسمر طول مانت في العالي
مش رح تشوف حالي ياالاسمر طول مانت في العالي ياالاسمر

يا معدي ع السكه لا لوم ولا ضحكه
من يوم على بيتنا عديت وورتنا
كيف النجوم الليل تسهر طول مانت في العالي
مش رح تشوف حالي ياالاسمر طول مانت في العالي

صوتك قمر وناس دايب في ليل الناس
لكن يضوي لناس يا ساكن العالي
يا ساكن العالي ساكن هنا في بالي
بحر المحبه ح يطعطر طول مانت في العالي
مش رح تشوف حالي ياالاسمر طول مانت في العالي

يابو صوت ملالي فوق احنا قتلنا الشوق
الضي لو سلم انا كنت اتعلم
اطلع لك اتكلم لو حتى حاتألم
وارجع وقلبي متكسر طول مانت في العالي
مش رح تشوف حالي ياالاسمر طول مانت في العالي

1

**Amany Ezzat** **Amany Ezzat** · 07-15-2014, 01:44 AM

الملك محمد منير

يونس

جاي من البلاد البعيدة لا زاد ولا مية
وغربتي صاحبتي بتحوم حواليا
وانتي تقوليلي بحبك.. تحبي ايه فيا؟
وده حب ايه ده اللي من غير اي حرية؟
***
يونس في بلاد الشوق
اه ياولد الهلالي
بتونسني دموع العين
وانا سايب اهالي
اه ياولد الهلالي لا عليا ولا بي
يا عزيزة يا بنت السلطان لو يتغير الزمان
وقابلتيني في اي مكان
كنت اعشق من غير ما تقولي
يونس.. انا يونس
***
كنت هأقول اهو ده المحبوب
ويدوب قلبي قبل ما ادوب
اه يا ولد الهلالي لا عليا ولا بي
انا يونس ونسيت مين يونس
والدنيا مالت عليا
***
قلبي ضايع مين يلاقيهلي
بايني نسيته حدا اهلي
ينفع احبك من غير قلبي
ماتردوا عليها وعليا
اه ياولد الهلالي لا عليا ولا بي
ياعزيزة يابنت السلطان لو يتغير الزمان
وقابلتيني في اي مكان
كنت اعشق من غير ماتقولي
يووونس انا يونس

شيكولاتة

ده حبيبي لون الشيكولاتة
اسمر سمارة دمه شرباتة
حبيبي حبيبي حبيبي
دمه خفيف شرباتة
***
يا ام العيون ليلتك شموع
طاهرة وشجية زي الدموع
لو يزرعوكي بس في سمايا
لسهر واغني على هوايا
حبيبي حبيبي حبيبي
دمه خفيف شرباتة
***
صوتك عجيب بيقولي عيش
وتبعتريني ماتلمنيش
يا احلى مني بكتير يا الاسمر
الشفة وردي والخد عنبر
حبيبي حبيبي حبيبي
دمه خفيف شرباتة
***
احلى الكلام بأحلى صوت
حتى سكوتك حبيته موت
السمرة نيلك والخفة من الله
يا مالية قلبي خضرة وضلة
حبيبي حبيبي حبيبي
دمه خفيف شرباتة

1

**Amany Ezzat** **Amany Ezzat** · 07-15-2014, 01:51 AM

ونكمل مع منير

اغضبي يا دنيا

اغضبي يا دنيا ويا الغاضبين
الدما ع الارض رمز العاشقين
يا زهرها يا نهرها يا نجوم مساها وفجرها
يا ريح يا زرع يا ليل يا نور
دم الشهيد راجع يهد السور
ويحرر المساجين
من البيوت ومن المزارع و الكنايس والجوامع والشراقي والسواقي
والمدارس والمصانع من الشمال ومن اليمين
صوت الشهيد مسموع قلب البلد موجوع

يا حبيبة

يا حبيبة يا طبيبة
رجعتلك اشتقتلك وندهتلك ودمعتلك
وفي بعدك القاسي.. كتير كتير سمعتلك
وبالدموع نورتلك
كانت ليالي المر
ع القلب قاسية تمر
ايامي مش بتسر وضحكتها غريبة
يا حبيبة يا طبيبة
رجعتلك قلبي هلك
ولا بمتلك الا دموع البعد والغيبة

يانورس يا ابيض

يا ابو قلب ابيض بحب البشر وبالخير بينبض
سحاب الشرور مكتف جناحك
ودمع البحور مزود جراحك
في عقل أسود مليان سموم
شتت وشرد وبكى النجوم
وحزني عليك دموعك عليا
وخوفي اللي فيك خياله في عينيا
وازي تطير ازي والكون دخان
وانت اسير سكون اللي خان

يا عم يا جمالة يا ليلة

يا سايقين البر والإحسان
حبيبي أنا وياك
يا عمدة الخطارة يا عمدة
خد الجنيه الأخضر وهاتلي حبيبي
حبيبي أنا وياك
يا عمدة المنصورة يا عمدة
خد الجنيه وهاتلي الصورة
حبيبي أنا وياك

عمر الزمن

عمر الزمان ما كمل الحدوتة
اشمعنى يعني النهاردة
اللي بيحلم اقول توته توته
فوق يا بن ادم واستمع واهدى
احنا قلوب بس القلوب شايبة
متعلقة سايبة
في حبال دايبة
كله يوصل للمفيش
حياه رخيصة متساويش
اوعاك تراهن ع الزمن
عمر الزمن آه ما كمل الحدوته

قلبى ما يشبهنيش

قلبي ما يشبهنيش
فعلا ما يشبهنيش
أوقات بيعرفني
ساعات ما يعرفنيش
وأقوله يا قلبي مالك؟ يقولي مفيش

قلبي مايشبهنيش
في الحب والإحساس وفي اختيار الناس
بيمشي على كيفه
كتير وما يقوليش
أصدق كتير مني
وأجرأ كتير مني
وياما صدقته ياما
ياما كتير ما صدقنيش

1

**Amany Ezzat** **Amany Ezzat** · 07-15-2014, 01:55 AM

من اغانى الافلام

فيلم الطوق و الاسويرة

شريهان ـ فرقة وسط البلد

آه يا لاللي

آه يا لاللي يا عيني يا لاللي
ع اللي اتغرب بعيد ولا قالي
***
راكب الخيالة ولاّ مع الجمالة
أو تاه في الدلالة، مين يا ناس يقولي؟
***
راح مع الجمالة.. تاه من الدلالة
مين يقوله تعالى، ارجع ليا يا خلي؟
***
خد معاه الروح فات لقلبي النوح
ولا قادر أبوح، ولا عاد حد فاضلي
***
اللي غاب عن عيني ميتى يا ناس يجيني؟
بحنانه يغطيني ويشوف اللي حصلي
***
خد معاه الغلاي يسوي فيه الشاي
راح يوانسه هواي، ومين يا ناس يقولي؟
***
خد غلاه معاه يسوي فيه الشاي
ولاّ نساه حداي، ومين يا ناس يقولي؟
***
خد شاله الحرير وطاقيته الكشمير
راح يغيب كتير، ومين يا ناس يقولي؟
***
لما يقوم من نومه مين يناوله هدومه
راح يواسيه في همومه، مين يا ناس يقولي؟
***
لما أقوم من نومي حاله شاغل يومي
مين يشيل همومي، حد يا ناس يقولي

**Amany Ezzat** **Amany Ezzat** · 07-15-2014, 02:00 AM

من أغانى الأفلام

من فيلم آسف على الإزعاج

بنلف فى دواير

ودايماً ننتهي لمطرح ما إبتدينا
طيور الفجر تايهة في عتمة المدينة .. بتدور

مابنكتبش الرسايل مابننتظرش رد
...لا حد في يوم سمعنا ولا بنسمع حد
طيور العمر تايهة في عتمة المدينة .. بتدور

ساكنين في عالم يعشق الخطر
فيه الطيور تهرب من الشجر
وتهرب النجوم من القمر
وتهرب الوجوه من الصور

بنلف في دواير ندور ع الأمان
ونلاقينا رجعنا تاني لنفس المكان
ندور .. ندور .. ندور

نحلم ونحلم بالحياة المُفرحة
وأتاري أحلامنا بلا أجنحة
ندور ندور ندور بجناح حزين مكسور
ساعات نشوف في العتمة
وساعات نتوه في النور
ساعات عيوننا بالأسى تفرح
وساعات في ساعة الفرح ننوح

ولا حاضر ولا ماضي
تروس بتلف ع الفاضي
ولا فينا شباب زعلان
ولا فينا شباب راضي

مفيش غير إننا بندور ..
ندور .. ندور”

**Amany Ezzat** **Amany Ezzat** · 07-15-2014, 02:09 AM

من أغانى الافلام
من فيلم البريء

1
طير الحق

محبوس يا طير الحق
قفصك حزين ولعين
قضبانه لا بتنطق
ولا تفهم المساجين
قضبانه لا بتعرف
ولا تفهم الإنسان
ولا الحديد ينزف
لو تنزف الأوطان
بين العتمة هنا
وبين النور هناك
حابسانى ويا الغنا
قضبان على شباك
زنزانتى لو أضيق
أنا من ورا السجان
ف العتمة بتشعلق
حتى على الدخان
وأغنى بدموعى
لضحكة الأوطان

الدم

الدم اللي ف ايديا
بالليل ينده عليا
ويقولي قتلت مين؟
ويقولي يا انسان
تفرق السجان إزاي من السجين؟
قلبي اللي كان بريء
زي الطير الطليق
إزاي ضلت عيونه، لما شاف الطريق؟
آه يا عيون بريئة
مين بدل الحقيقة؟
ومين قلب المعاني؟
قدام عيني فـــ دقيقة

الاغنية المحذوفة من الفيلم

يا قبضتى

يا قبضتي، دُقِّي على الجدار، لحد ليلنا ما يتولد له نهار..
يا قبضتي، دُقّي على الحجر، لحد ما تصحّي جميع البشر..
لحد ما تتفسر الأسرار..
مش فاهم اللي حاصل، لكن بقلبي واصل..
واللي مش فاهمه عقلي، بتشرحه السلاسل..
يا قلوب بتنزف دم في العتمة
يا قلوب بتنزف دم وتغني..
سجنونكي والكلمة
والكلمة غصب عنها وعني
طلعت من القضبان ومـ الأسوار

1

**Amany Ezzat** **Amany Ezzat** · 07-15-2014, 02:22 AM

على الحجار

ما ترجعيش

ما ترجعيش
ما تيأسيش من هوانا
وما تقوليش اللي في ايدينا قليل
يمكن يكون المستحيل جوانا
وحبنا مايكونشي بالمستحيل
ماترجعيش
ماتيأسيش
علي الاقل ماتهربيش

مبسوطين

مبسوطين مبسوطين مبسوطين
مبسوطين وعيونا تقولك مبسوطين
ياللي سريرك من فضه
النور في كفك يتوضا
كل الليالي هتتقضي
وترجع علي دارك

مبسوطين مبسوطين مبسوطين
مبسوطين وعيونا تقولك مبسوطين
باغني وافتكرو اللازمه
ولا غنايا مالوش لازمه
مادام طلعنا من الازمه
مبسوطين مبسوطين مبسوطين
مبسوطين وعيونا تقولك مبسوطين

احلي مافيكي يا بنت الايه
ضحكه تساوي الف جنيه
انا اللي بس مصر عليه
ترجع علي دارك
مبسوطين مبسوطين مبسوطين
مبسوطين وعيونا تقولك مبسوطين

اتنين

اتنين اتنين
كنا زمان اتنين
ودلوقتي احنا اتنين
في احلي ساعه حب
كنا تملي اتنين
وانتي اللي كنتي القلب
وانا اللي كنت العين
احنا ابتدينا اتنين
واهو انتهينا اتنين
ابدا ماكناش واحد
مادوبناش في بدن
ولا وحدنا الزمن
برضك فضيلنا اتنين
ابدا ماكناش واحد
دا حتي الصوت صوتين
دا حتي البيت بيتين
دا ممكن شخص واحد
يبقي ساعات شخصين

ويا حبيبتى

ويا حبيبتي الشمس مش بعيدة
داحنا ايدينا قصيرين
ومفيش لا ناس تعسا ولا سعيدة
الناس في دنيتنا نوعين
عايشين ومش عايشين
واحنا النوعين
عايشين ومش عايشين
سامعين ومش شايفين
حاسين ومش فاهمين
فاهمين ومش قادرين
كأننا الحزن اتقسم نصين

لو مش هتحلم معايا

لو مش هتحلم معايا
مضطر احلم بنفسى
لكنّى فى الحلم حتى
عمرى ما هأحلم لنفسى
لو كنت راح افتش
عن منصب ولا جاه
واصاحب الحذر
ده انا ابقى مستحقش حلاوة الحياة
وضحكة البشر
يا صاحبى يا صديقى
يا للى طريقك طريقى
ده انا يوم ما اعيش لنفسى
ده يوم موتى الحقيقى

بقلبنا

بقلبنا بعقلنا
بصبرنا بجهدنا
بحلونا بمرنا
بدمعنا بضحكنا
نضمها تضمنا
نصدها تصدنا
احنا لها وهي لنا
ما هي دي الحياه
علي ايه هتسأل واسألك
كل السكك هتوصلك
وانا من طريقي هاحصلك
توصلني ولا اوصلك
وهنلتقي هناك او هنا
انت البشر وانت انا
نفس الطريق بيضمنا
نفس الدموع بتهزنا
نفس السبب
نفس العذاب
نفس الفرح
نفس الدموع
نفس الطموح
نفس المني
ودي الحياه
بفكرنا بخطونا
بحلمنا بوعيينا
بحسنا بصمتنا
لوحدنا نقول لنا
نشدها تشدنا
نقول لها تقول لنا
ماهو يوم لها ويوم لنا
و دي الحياه

يتبع

**Amany Ezzat** **Amany Ezzat** · 07-15-2014, 02:29 AM

رائعة الابنودى

قصيدة ضحكة المساجين

الجزء الاول:

تغازل العصافير.. قُضبانها

زنزانة لاجلَك كارهة سجّانها

دُوق زيّنا حلاوة الزنازين.

على بُرشَها.. بتمِدّ أطرافك

سجّانك المحتار فى أوصافك

مهما اجتهدْ ماحيعرف انت مين.

والشمس شُعْلِةْ عِنْد.. رافضه تغيب

وفكرها يودى معاك.. ويجيب

الشمس تحزن زى أى سجين.

والليل.. نديمك صبر ع الرحلة

بتغنى.. والليل فى السواد كُحْلَة

وارث غُناه معاناه من السابقين

فى العتمة عاتِب مصَْر وِدَاديها

إنت اللى روحك من زمان فيها

توأم.. فى لحظةْ عِشق مولودين.

طوبَى لكل المسجونين باطل...

فى زمن.. بيخدعنا وبيماطل

يا شموس بتبرُق فى غُرَف عِتْمين.

وخطوة الديدبان ورا الشبّاك

صوت نعل يقْضِى الليل هناك وياك

سجّانك اللى فى حاجة للمحامين.

الحرب واللى خاضوها بجسارة

كانوا مسلمين يا عم ونصارى

فازاى نناصر دين وننكر دين؟

كل اللى زرعوا ما بينّا سُور الفُرقة

وبْيقْسِمونا.. فرقة تكره فرقة

فى النية.. مصر الواحدة تبقى اتنين.

تحية لكْ.. وانا كاتبها بخطّى..

إدفع تمن حبَّك لاخوك القبطى

مع إننا فى الأصل.. قبطيِّين.

همّ اللّى ماتوا فى ميدان الثورة

كانت دماهم حمرا والاّ سمرا؟

قول للّى جاييّن يِفْرزوا الدَّمِّين.

الجزء الثاني:

الصرخة هادية.. بسّ هازّه الكون

قال الغشيم للوردة: «خبِّى اللون»

إيش يفهم التُّور فى هوا البساتين

{الشرّ فى طرْف الميدان يِسكر

والفجر يطلع.. تحجبُه العسكر

وانت بتكتب سكَّه للجايّين.}.

الثورة نور.. واللى سرقها خبيث

يرقص ما بين شُهدا وبين محابيس

والدم لسّه مغرَّق الميادين.

ما بيتوبوش.. ولا اللى فات علّمهم

ما بيسمعوش فى الدنيا إلا كلامهم

مالهمش فى حوار النبات والطين

إحنا نقول: «أيوه» يقولوا: «لأ»

وفى الحقيقة يا عمّ... ليهم حق

مانتو خلقتوا الثورة بالتدوين.

شوف الوشوش حمرا تُكبّ الدم

واحنا سَمار الوِشّ.. تِرْكةْ هَم

وِرثوا وطنّا وِرْث م الوارثين.

مِش مِنّا.. شوف اللون وحِسّ الَّلغوه

وشوش أجانب.. ع الأقلّ «تراكوه»

جيشهم رحل.. وفِضلوا دول لابدي

العُمده يتْقَل قد مَلْو كروشُه

بطيخُه لاقْرَع.. هاج ومَدّ عروشُه

وله غفير صوت زعقته بضميرين.

نطلع من الساقية نُقع فى طاحون

فاشهد يا وطنى ع اللى فينا يخون

ياللى انت ماسِك دفتر الخاينين.

ومصر عارفه وشايفه وبتصبُر

لكنّها ف خَطْفِةْ زمن.. تُعْبُر

وتستردّ الإسم والعناوين.

وكل ما الصوت البليد.. بلّد

لا تِبتئِس م الظلم.. واتجلّد

منِ ده اللى يطفى شعلة الصادقين؟

واللى يُقف فى وش ثوّارها

ما حيورث إلاّ ذلها وعارها

واللى حيفضل.. (ضحكة المساجين).

وياربّ جَمّلنى بقُصْر القول

المخ داير.. والفؤاد مقتول

خايف يئن ليحزِن المحازين.

سامعَه أنينى وساكته ليه يا مصر؟

الحلم.. فارشين بيه فى سوق العصر

قدّام عينين اللى ما لهشى عينين.

زنزانة واخدة دروس قُدَام فى الصمت

وعِرْفتَك من غير ما اتعرّفت

صمتك على صمت الحجر لايْقين.

الحزن طايح فى قلوبنا.. بجدّ

ما فضلْش غير الشوك فى شجر الورد

غِلِط الربيع ودخل فى أغبى كمين.

يا للى دَمَعْتى.. رجّعى الدمعه

الدِّنيا شايفه كلّها وسامعه

واللى سرق.. حيخبى شيلته فين؟

ولدِك ضياء الفجر.. بمقاسُه

ووطنّا عارف عِزوتُه وناسُه

أجيَال بترحل.. والجُداد جايين.

يا وليدى.. ميِّل قول لإخوانك

تانى رجع من خان.. واهُه خانك

والسجن مش شبعان شباب صالحين.

غزلان ووقْعت فى ضلام غابه

قضبان وليها ضحكه كدابة

والضحكة كاشفة عن سنان صُفرين.

أما اللى خان وطنَك وأوطانى

م الهيبة.. حاطّينه ف قفص تانى

يصحى وينعس والجميع واقفين.

وفى انتظار تيأس مع الأيام

غيرك فى قفصُه بيضربوله سلام

وانت الجزم قبل الكفوف جاهزين

يا دى الميزان اللى طِلعْت لفوق

بينزِّلوك بالعافية أو بالذوق

دول مش بتوع الصدق فى الموازين.

ويا مصر.. هَدِّى وانتى بتفُوتى

الصوت فى صمتُه.. أعلى من صوتى

آدى السجين اللى ما باتش حزين.

لسّه اللى حَكَمونا أهم حاكمين

بينوبوا عنْهم بس ناس تانيين

وانتو هناك فى علبة السردين.

بيحلموا يعودوا إلى ما كان

وقضاة تحرّرهم فلان وفلان

وكإن لا ثورة.. ولا حسانين.

ما هو شباب الثورة بقى مسجون

ولا عاد قصاد الخونة إلا تخون

تاه الميدان الحُرّ فى الميادين.

نطمِس معالم ثورتك يا شباب

أهو زى صفحة بتتقِطع فى كتاب

والدنيا تهدا ويرجعوا الغايبين.

ولا كانْش فيه ثورة ولا ثوار

ولا شعب مصر الغاضب الجبار

لا احداشر اكتوبر ولا عشرين.

يا عم اقعد بسّ واشرب شاى

الدنيا ماشيه وشعبنا نسّاى

والبركة فى الشاشة وفى الجرانين.

واذا هوْهوُوا.. قوم إعلن الأحكام

وكل بُق.. تلجّمه.. بلجام

ومش حتغلب تطبخ القوانين

وانت قمر سهران مع الصُّحبه

حالمين ببكره وجنّته الغايبه

ومتبّتين فى الحلم.. مش صاحيين.

ويا وردة البساتين.. يا مصرية

راية.. بترمى الضل ع الميّة

والنيل مِموِّجها رايات تانيين.

بُكراك.. لا حيثيات ولا هو نصوص

يا شاب ياللى ليك صباح مخصوص

بتفرّقُه بالحتّه.. ع الملايين.

وحتفضل العصافير على الشبابيك

والفجر.. يستنى أدان الديك

وطن.. وحلم.. وفجر.. متعانقين

**Amany Ezzat** **Amany Ezzat** · 07-15-2014, 02:45 AM

كلمات اغنية

ضحكة المساجين

الجزء الأول

1

تغازل العصافير.. قُضبانها

زنزانة لاجلَك كارهة سجّانها
دُوق زيّنا حلاوة الزنازين

على بُرشَها.. بتمِدّ أطرافك
سجّانك المحتار فى أوصافك
مهما اجتهدْ ماحيعرف انت مين

طوبَى لكل المسجونين باطل
فى زمن.. بيخدعنا وبيماطل
يا شموس بتبرُق فى غُرَف عِتْمين

أما اللى خان وطنَك وأوطانى
م الهيبة.. حاطّينه ف قفص تانى
يصحى وينعس والجميع واقفين

ومصر عارفه وشايفه وبتصبُر
لكنّها ف خَطْفِةْ زمن.. تُعْبُر
وتستردّ الإسم والعناوين

يا دى الميزان اللى طِلعْت لفوق
بينزِّلوك بالعافية أو بالذوق
دول مش بتوع الصدق فى الموازين

الثورة نور.. واللى طفاها خبيث
يرقص ما بين شُهدا وبين محابيس
والدم لسّه مغرَّق الميادين

الحزن طايح فى قلوبنا.. بجدّ
ما فضلْش غير الشوك فى شجر الورد
غِلِط الربيع ودخل فى أغبى كمين

وفى انتظار تيأس مع الأيام
غيرك فى قفصُه بيضربوله سلام
وانت الجزم قبل الكفوف جاهزين

ومصر عارفه وشايفه وبتصبُر
لكنّها ف خَطْفِةْ زمن.. تُعْبُر
وتستردّ الإسم والعناوين

يا عم اقعد بسّ واشرب شاى
الدنيا ماشيه وشعبنا نسّاى
والبركة فى الشاشة وفى الجرانين

واذا هوْهوُوا.. قوم إعلن الأحكام
وكل بُق.. تلجّمه.. بلجام
ومش حتغلب تطبخ القوانين

ويا مصر.. هَدِّى وانتى بتفُوتى
الصوت فى صمتُه.. أعلى من صوتى
آدى السجين اللى ما باتش حزين

واللى يُقف فى وش ثوّارها
ما حيورث إلاّ ذلها وعارها
واللى حيفضل.. ضحكة المساجين

ومصر عارفه وشايفه وبتصبُر
لكنّها ف خَطْفِةْ زمن.. تُعْبُر
وتستردّ الإسم والعناوين

الجزء الثانى

1

الصرخة هادية بس هازة الكون
قال الغشيم للوردة خبي اللون
إيش يفهم التور في هوى البساتين
ما بيتوبوش ولا اللي فات يعلمهم
ما يسمعوش في الدنيا إلا كلامهم
مالهمش في حوار النبات والطين
الشر في طرف الميدان يسكر
والفجر يطلع تحجبه العسكر
وانت بتكتب سكة للجايين
نطمس معالم ثورتك يا شباب
أهو زي صفحة بتتقطع في كتاب
والدنيا تهدى ويرجعوا الغايبين
ومصر شايفة وعارفة وبتصبر
لكنها في خطفة زمن بتعبر
وتسترد الاسم والعناوين
ولا كانش فيه ثورة ولا ثوار
ولا شعب مصر الغاضب الجبار
لا حداش أبصر إيه ولا عشرين
يا وليدي ميل قول لاخوانك
تاني رجع من خان وأهو خانك
والسجن مش شبعان شباب صالحين
لسة اللي حكمونا أهم حاكمين
بينوبوا عنهم بس ناس تانيين
وانتوا أسرى علبة السردين
يا ام الشهيد رجعي الدمعة
الدنيا شايفة كلها وسامعة
واللي سرق هيخبي شيلته فين؟!

1

**Amany Ezzat** **Amany Ezzat** · 07-15-2014, 03:37 AM

واعر جوى المشوار يا خال
لكن
ان شاء الله مكملين

مقتطفات من دوواوينه الشعرية

ساعة ما الشمس كانت خارجة
من بوابة «أبنود» الغربية
والضيّ الأصفر
أشبه بغبار
فايتاه أقدام عسكر
قطعوا الدنيا..
ونازلين ورا جبل أبنود
كانوا الناس راجعين
وهنا.. للمغرب.. ريحة.. وصوت
كله بيتتاوى
ولاد بيسوقوا
رجال ماليين باطهم برسيم
وبنات بيلموا الوز من الترعة للدار
والأكل بيجهز ع الكوانين
والدخانة النافرة
من كل سقوف الدور.. البوص
وريحة التقلية..
وأدان «الشيخ سعفان»
كله مروح
الزارع رامي فاسه ف غيطه
والتاجر قفل الدكان
الشمس بتتدحرج ع البلد اللي فيها ليل
نسمة بتخلي النخل يميل
إبتدت النجمة الأولانية تبان
ابتدا صوت الضفدع.. ورنين الطواحين
وكلاب بتهوهو لكلاب
وابتدا يتطرز ليل أبنود
بالنبح وصوت الضفدع.. ورنين الطواحين
أبنود..
بجميع سواقيها وناسها ونجومها ونسايمها
بتكوع في ساحات الليل
الأبنودي ـ أحمد سماعين
«قولوا ورايا يا ولاد الرفضي..
يا رمان أحمر وجديد»
وترد الوِلد:
«بكرة الوقفة وبعده العيد»
والوِلد وراه.. والناس تضحك
ـ «مين عنده سمين؟»
ـ «حنفي الجزار..»
ـ «تشتروا من فين؟»
ـ «حنفي الجزار..»
ـ «إبن الملاعين..»
ـ «حنفي الجزار..»
الأبنودي ـ أحمد سماعين

وآدي «أبنود»
وآدي انتو من زينة الجدعان
العقل الموزون
والعين اللي تعد الرمل
وروني واحد حب الناس زي ما حبيت
وروني واحد حب الخير للناس زي ما حبيت
حبيت الخير والناس
وديت من قلبي
من أصغر بيت لاكبر بيت
الأبنودي ـ أحمد سماعين

يا ما نفسي أعيش العمر
معاكم تحت الشمس
نشرب من ريق النيل راحتين
أتعشى معاكم تحت النجم
ببتاوتين
واسمع موال يهمس من جرحي همس
تسحبني يا ليل
وتجيبني يا عين
ياما نفسي أعيش
قَطْع ف توب أزرق
على فلاح
يا فلاحين

أبنود كلها تحت الجامع
وابتدت الأسياخ تنزل من ع الدكاكين
رجَّال عرقانة..
وغرقانة سراويلها ورقابيها طين
عَمَّال تتكلم بحماس وتظاظي
والعياييل لسه ما نامت
وولاد لسه راجعين من فوق
اللي بفاس
واللي بزنبيل
الأبنودي ـ أحمد سماعين

يا حضرات المستمعين..
من قبل ما اقص عليكم قصة هذا الأحمد سماعين
أحب أنبهكوا لبعض التفاصيل
فده راجل مش مشهور
أحمد سماعين فلاح مصري أبا عن جد
بسيط.. وأمير
غني.. وفقير
قلبه ف لحظة حجر..
وف نفس اللحظة حرير
قضى نص حياته وسط القنايات والطين
والنص التاني..
بيلعب «سيجة» أو يتفرج والا يغني في الافراح
أو ينعس تحت كافورة في الضُهر
الأبنودي ـ أحمد سماعين
أنا طبعا مش باوعظ..
أنا باتكلم عن عصفور إنسان..
يعرف ان الجرن عرق..
فيغني للأجران..
اللي حصدها الإنسان..
تنبسط الناس.. تبتسم.. تضحك ويقول الواحد:
نفسي ازرع مليون فدان
ينزل في الميه الساقعة لحد الركبة تحت شادوف..
ويغني معايا واتعلم منه أغانيه
عن زارع معروف بتخونه ظروف
وعن الطير اللي بعد ما بيلوف.. بيلوف..
وعن الجمل الحمَّال والجمَّال العلة
أتعلم منه وأغني معاه..
الأرض تفيض حب وغلة
أسلِّيه
واتسلى
الأبنودي ـ من عصفور الريف/بعد التحية والسلام
الأبنودي ـ أحمد سماعين

**Amany Ezzat** **Amany Ezzat** · 07-15-2014, 03:47 AM

ولما تحت العشية
يجمعنا قمر العشية
جنب البيبان والسبيل..
سكوت يكون الكلام
نتكلموا بالأيادي
بالضحكة.. وان دار منادي..
ما نقولش مات الكلام!!
الأبنودي ـ ميت/الزحمة
على شط جروحي طلع الورد ومد لحد ما طال
تعريشة يومي المسقوفة بفروع الشمس
على شط جروحي شب الحب عيدان العود موال
تعريشة مواويلي الخضرة
أنا تحتك مش باحلم ولا اطير
مش واخد بالي غير من زقزقة العصافير
والنيل حواليا سواقي..
ومناديل وطواقي ومواويل
ونخيل وحفيف ودروب وديوك وولاد
بتغني بصوت شواديف
والكنكة احمر الشاي فيها.. كييف..
أنا واد كييف
الأبنودي ـ غيطان الباذنجان/الأرض والعيال

أمايَّه..
وانتِ بترحي بالرحى..
على مفارق ضحى..
ـ وحدك ـ وبتعدِّدي
على كل حاجه حلوه مفقوده
ماتنسينيش يا امَّه في عدودة
عَدودة من أقدم خيوط سودا في توب الحزن
لا تولولي فيها ولا تهللي..
وحُطي فيها اسم واحد مات
كان صاحبي يا امَّه..
واسمه
ناجي العلي
الأبنودي ـ الموت على الأسفلت

وامى.. والليل مليل
طعم الزاد القليل
بترفرف.. قبل ترحل
جناح بريشات حزانى
وسددت ديونها
وشرت كفن الدفانه
تقف للموت يوماتي:
«ما جاش ابن الجبانه»
أشد ف توبها يمي
تنهر كإني عيل
القلب اللي تحجر
قوَّال.. بطَّل يموِّل
لا الحزن عاد يبكِّي
ولا الأحلام تنوِّل
أمي ـ ست البلابل ـ
بتقول: «العمر طوِّل
يا زمن كفايه حوِّل
يا زمن برده يقرنص
وما حسبناش حسابه»
لو زارت أمي همي
بتطرد الكتابة
الأبنودي ـ الكتابة

كنا نشتغل اليوم كله
ونفر نلاقي حتة ضل
أحلى ما يعمل إنسان في حياته يا ولدي
يزرع ضل
أحلى ما تحس
لما الضل اللي زرعته
تشوفه مرمي على وشوش الناس
من شجره زارعها
من حيط مبني
الأبنودي ـ وجوه على الشط
كان يستنى أدان المغرب تحت الجامع
عند النادي بتاع الحاج «ابو طالب»
واما يحل المغرب
عم «رفاعي» يأدن
يجري مع الأولاد في دروب أبنود:
(افطر يا صايم
ع الكحك العايم..)
رمضان قريتنا من غير مدفع
الأبنودي ـ وجوه على الشط

يكفي ف قريتنا
عمرك يبقى اتناشر عام
لاجل يعاملوك على إنك راجل كامل.. وتمام
وهناك
كانوا كل الأولاد رجّال
واتعلم عمي براهيم
إزاي يرحل في الفجر بست جمال
ويعدي البحر..
ويقطعها رمال وجبال..
لاجل يجيب الطَفل
الأبنودي ـ وجوه على الشط
وادي الحتة يا عبد الرحمن..
.. هي الحتة اللي انت فيها دي..
هي المشمش ده
.. وهيه النخل وهي العنبات.. والبيت
وهيه عيالي
وهيه الشجره اللي انت قاعد في ضلتها دي
وجنب نباتها ده
الأبنودي ـ وجوه على الشط

إعـــــــلان

الابنودى فارس العاميه المصريه

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك