إعـــــــلان

**Amany Ezzat** **Amany Ezzat** · 07-19-2014, 08:20 PM

حبيبتى هالة

تسلمى حبيبتى
الف شكر لمتابعتك موضوعاتى
غالبا اول تعليق بيكون منك
مقدرة حبك و اهتمامك الكبير
كل الحب و الود والتقدير
لأجمل هالة

**Amany Ezzat** **Amany Ezzat** · 07-20-2014, 12:57 AM

أستاذنا الغالى
أستاذ محمد ورد

جميل من الانسان
أن يكون شمعة ينير درب الاخرين
ويأخذ بأيديهم ليقودهم إلى بر الأمان
متجاوزا بهم أمواج الفشل…
هكذا انت
بتعاونك
وحرصك
وحسن خلقك
مع الجميع

1

اما عن الخال اقتربت منه كثيرا الفترة السابقة
تابعت لقائاته الصحفية وتأملت كتاباته
فى مختلف الاجواء السياسية
التى عاصرها فلم اعهده يهادن او ينافق
فلقد كان ومازال لسان حال الفقير
منذ ايام وبعد ارتفاع اسعار الوقود
كتب الخال قصيدة مرسال

الشعب عمره ما راح يعود للوهم
والرجرجة في القول والأفعال
المسألة غياب سلوك الحسم..
في حرب جبارة جهاد وقتال
المسألة دعم أو مش دعم
رايحين لفين أهو ده أهم سؤال

شكرا لك

**Amany Ezzat** **Amany Ezzat** · 07-20-2014, 01:16 AM

الغالية ناانو
تعباكِ معايا دايما
واكيد مفيش كلام يقدر
يوصف حبى لكِ

1

**Amany Ezzat** **Amany Ezzat** · 07-20-2014, 01:24 AM

حبيبتى ست الكل
منى سامى

تسلمى حبيبتى
سعيدة جدا بالرحلة فى عالم الخال
وزادت سعادتى بمتابعتك موضوعى
وكان الهوا هوانا ولكن سرعان ما عدى النهار
بين احضان الحبايب ونحن نغنى توبه
جميلة الرحلة و واقعية تسلمى
على ملاحظتك الرائعة
شكرا لكِ من كل قلبى
على كلماتك الرقيقة

**Amany Ezzat** **Amany Ezzat** · 07-20-2014, 01:29 AM

أستاذ أحمد شريف

سعيدة جدا بمتابعتك موضوعاتى
ان شاء الله القادم أفضل

1

**SaMaR_ BakR** **SaMaR_ BakR** · 07-24-2014, 06:26 AM

الله عليك
تاخذ موضوعاتك يوما بعد يوم طابع جاذب
لمحبي شخصيات عجنت بطين مصر وشمسها وهواها
فاتخذت من اللون المصري المحبب لطبقات الشعب
سبيلا الى القلب لا يردعها حاجز ...
امانى الغالية ... استمتعت بهذه الرحلة الغنية الثرية
التى تمكنتى خلالها بكل مقدرة
من الرسو بنا على شط اعذب واقرب الكلمات لقلوبنا
تعبر عنا وتواسينا وتقتحمنا احيانا
شكرا لك ... على مجهود
اثبتى لنا من خلال بذله ان اعضاء اسرتك فى ورد
هم الاقرب اليك هم الاكثر استحقاقا على مشاركتك
افضل ما تكتبين و تجمعين من سير
اثرت ولا زالت فى تاريخ مصر
افضل الامانى ... ارق التحايا

**Amany Ezzat** **Amany Ezzat** · 07-24-2014, 09:13 PM

حبيبتى الغالية سمر
تسلمى نورتى موضوعى

**Amany Ezzat** **Amany Ezzat** · 09-18-2014, 12:56 PM

ويستمر العطاء ما دام القلب ينبض
الشاعر المصري الكبير عبدالرحمن الأبنودي،
و أحدث انتاجه ديسمبر 2014
يقول شاعرنا الكبير إنه ينتظر صدور
كتابه الجديد
"ابن عروس ليس شاعراً وليس مصرياً"
خلال أيام عن هيئة الكتاب.
وأضاف أن ذلك الكتاب يكشف
كل المغالطات والكتابات الملفقة
التي دارت حول شاعر مصري
يُسمَّى أحمد بن عروس،
وفي الواقع فإن الرجل متصوف تونسي،
وأما المربعات المنسوبة إليه وأنه قائلها فهي
لسيدي عبدالرحمن المجذوب من المغرب،
وقد ردد بعضها ابن عروس في تونس
وانتقلت الأشعار مع الحجاج
والتجار إلى الصعيد الأعلى،
حيث مصروا المربع وجعلوه
حامل إحباطاتهم وشكاواهم
من الزمن والحلم بيوم أفضل.
وتابع:
"ثم إن كثيراً من هذه المربعات
لعلي النابي وهو شخصية حاكمة،
وربما هو صاحب السطوة
التي نُسبت إلى ابن عروس،
وقد أوردت كل المربعات
المغربية والجزائرية والتونسية والمصرية
لتبيان التشابه الشديد بين النهر وروافده
من سيدي عبدالرحمن المجذوب
إلى المربعين المصريين الذين كان
المربع لعبتهم التسامرية
في سوامر الرجال بالصعيد".
ليس الكتاب وحسب و لكن أيضا
هناك قصيدة رائعة
صدرت بالفعل

نتابع كلماتها معا

**Amany Ezzat** **Amany Ezzat** · 09-18-2014, 12:58 PM

أحدث قصيدة للأبنودى 17/9/2014

قصيدة باب المجلس

1

إن كان على التمويل.. بالكُوم
كان إيه ورانا الاّ نكوِّم..
بحر الفساد عَلِّمنا العوم
لو عاجز.. القرش يعوِّم
وفيه مصادر للتمويل..
تُخطرش على بالك يا جميل
يِفْرِق فى حاجة ماضينا الزِّفت؟
إحنا ملوك فنّ التحويل!!
جُهَلا.. لكِن نفهم فى الكُفْت
مطرح ما تمشى الريح.. بنميل
نِلْبِدْ فى ساعْةِ الزعبوبة
نِلْبِدْها من «بَابَه» لـ«طُوبه»
حافضينها صَمّ وبالنا طويل
ولينا أساليب موصوفة
مِتْجدّدَه ومش معروفة
ولينا فى الإِختفا والِّلفّ
إحنا المهمّ معانا.. الصنف:
بلاش أنا.. فيه ابن اختى
جوز بنتى والاّ أخو زوجتى
فَلِيه حتعمل هُلِّيلة؟
بلاش أنا.. وخُدِ العيلة
ساعات نجيلك عينى عينَك
وساعات نجيك من خلف الصفّ
وإنت جُهْدَك عارفُه قليل
تِتْعب بسرعة وتفلِّس
وادخُل أنا براحتى المجلس!!

2

نقوم ونسبق كل القوم
إحنا ملوك الصلاَ والصوم
ونجْده جاهْزَه للمحروم
حِتّة لحوم أو حَتىَّ هدوم
غاوين نأكِّل ونلبِّس
وبْنسْتَردّ دا كله فى يوم
أول ما نجلس فى المجلس!!

3

وهبنا ربّك صبر عجيب..
نِلْبِد سنة سنتين ونغيب
وتفتكرنا خلاص حنسيب
وإحنا نايمين نُومْة الديب.
وفْ فترة الزَّهْو الغايب..
إحنا مع الخلق.. حبايب:
نسبق تمَلِّى فى كل صلاة
فى الجامع اللى الناس مالياه.
تلاقينا فى كل جنازه
وكل خُطبَه.. وجوازه
والناس معانا وحاميانا
طول ما هِى عاريه وجعانه
فالحِ انت.. ماشى بتألِّس
بكره تشوفنى فى المجلس!!

4

يالله بقى قوم ثُور تانى
يالله يا راجل قوم انزل
وهيِّج الشارع تانى
خلّى العمارات تتزلزل
وارحل: «لجيكا» و«الحسانى»
والعجلة ترجع م الأول
يعنى لا ثوْرة ولا بوْرة
ولا تحتاجوش مِنّا مناورة.
مادام لا تشرِيع ولا قوانين
ولا قلت مين راح يحكم مين
تبقى الحكاية خيال فى خيال
الدين محالف رأس المال
صراع وحوش مش لعب عيال
انتو بتحكمكوا سذاجة
تُقَعوا بدون ما أعمِل ولا حاجة
أنا اللى متعوِّدها أرُشّ
أموالْ وأموالى بتقُش
ما خيِّبتشى ولا مَرّه
أَدخْل أنا وتطلع بره
واسمع خِنَاقاتكو القايمه
والحِسّ بيطَرْطَش عَندى
حماس شديدْ قوى للقايمه
ووقوف شديد ضدّ الَفْردى
وقال مُصِرّ يأجِّلها
ما عاجِلْها يشبه تأجيلها!!
المشكلة مش بنت الْوقت
ولا الحكاية حكاية وقت
فإيه لزوم رفضك دلوقت
والمشكلة اللى انت عاملها؟
تحتج؟ ميت قاضى بيحبِسْ..
وأنا أتوزِن جوه المجلس!!

5

تسمح لى أقولها بالبلدى..؟
مفروض أنا وانت ضِدِّين
واللى يزعَّلنى يا ولدى
يفرَّحك فرحة واتنين.
لكن باشوفك ماشى معاىْ
زى السَّنَد وقت الحاجة
ماشى تملّى معاى إزاى..؟
تبقى لا ضدى ولا حاجة
ضد الحكومة يا بلدية..؟
أنا ضدها ميه الميه..
مش عاجبك السيسى يا ظريف!؟
والنِّت مليتوه بالتخاريف؟
أنا مشى عاجبنى لأنه شريف!!
ودا يعطلنى شوّيه
فحتبقى ضدّى إزاى ومنين
وانت اللى لوجودى مؤسِّسْ؟
أنا بَعَتَّك تِسْتَشْهِد
وانت باعتنى على المجلس!!

6

وإحنا اللى فاكريننا على الرَّفّ
ومال شجَرْنا وفرعنا جفّ
قاريين مقالاتكم بالحرف
وشُغْلانِتْنا نُغُضّ الطَّرفْ
ودولابْنا داير عمرُه ما كفّ
قدام عينيك أو خلف الصف
إحنا عناقيد: جِدّ لإبن
ساعات ناكلها مارون جلاسيه
وساعات نبات على وجبة تِيْن
موجَه.. تِعلِّى.. وتوطىِّ
نبان ساعات وساعات بنكُف.
حسب الظروف السياسيْة
هيه كدا الرأسمالية
فى بلاد شَبَه بلدك ديّه
نضحك ساعات وساعات بنئن
وحتى لو مَحْبُوس فى السجن
عارفها بُكْره تعود ليا
هيه كدا الرأسمالية
فى بلاد شَبَه بلدك ديّة
موجَك بيعلاَ وبيوْطى
حتكرَّرُوا نفس الغلطة!!
بصراحة دَوْشِتْكم بالكذب
ولا انتو جبهة ولا انتوش حِزْب
والحمد لله مش فاهمين
لكُنْتُوا خلّصتوا عليّا
وانت يا إبنى برىء واخد
تقابلها بالوش الواحد
أما احنا.. لينا مليون وش
أساتذة فى تدريس الغِش
نرطُن بوطنك وبوطنى
وإسمنا برضه الوطنى
وبالهداوة حنتلَمِّس
طريق حفظناه.. للمجلس!!

**Amany Ezzat** **Amany Ezzat** · 09-18-2014, 01:00 PM

7
والاّ المشايخ يا ابن الناس
على كل بيرْ حَاطِّين كبّاس
فلوس ما تعرفش الإفْلاس
متخصّصه فى إفساد الناس
واللى مِعبِّيها تَلاَلِيسْ
تدخل عليه يعمل قدّيس
وخُطْبته مَتْحَف تدليس
كُلُّه وراه ميت ترسانة
أمريكا فاتحة الدكّانه
فى اللعب تلعب ويانا
وتحطِّنا فى أضيق خانه
وأنت الشريف أبو دمّ خفيف
بتصنِّف الكدب.. خيانة.
مش محترف يا بنى وعَفَوى
ناضلْت لكن بالشَّفَوِى
ورغم عشقك للجماهير
وضدّ لعبة «إِخْطف طير»
وتموِّتك دَمعة لفقير..
لا عرفْت ريف ولا شُفْت صعيد
ولا تعرف الاّ اللّى فى مخك
ومستعد تروح فى حديد..
أو حدّ يتخفَّى يُطخَّك
أما جماهيرك يا أمير
لانت عارفهم ولا عرفوك
شافوك بتخطب يومها سابوك
وراحوا لابُو حِسّ ينَجّسْ..
وشالوه لحد باب المجلس!!
8
من غير لا دَقْن ولا قفطان
ولا كفوف ناقصة صوابع..
حيزحفوا تانى الإخوان
صُحبَه لمجلسْكم الرائع
دى خلق عايشه فى الضلمة
ولا احنا عارفين مين هُمًّ..
زلزال ما شبْعا نْش توابع!!
هل فيه قانون يمنع ذلك؟..
ويمنع التانى كذلك؟
(فتحوها لينا سداح فى مداح
وطريقنا للمجلس.. سالك)
وراح يخش الإخوانى
لكن فى بدلة عِلمانى
ويقولوا: (يحيا عَبْ فتَّاح)!!
بيشغَّلوا تانى النسوان
يدورُوا فيها بيت ورا بيت
ويُبخُّوا فى دماغ أم فلان
ويطلَّعوا فينا العفاريت..!!
لَمِّ البطايِقْ.. والحِلْفَان
كيس رُزّ والا قزازة زيت.
واللى بيحلف ع المصحف
إزاى حيسمع كيت أو كيت؟
لا هو بيقرا جرايدكو
ولا طالْش حاجة فى يوم منكو
قبَض.. وفى الشمس اتشمِّس
أهو دا اللى دَخَّلنى المجلس!!
أما إنتو بقى فَ حَاريَّكُوا
حتَّة مظاهرة تفرَّحْكوا
حتْقَعّدُوا الخيبة فى ريحكو
تتخانقوا قبل نهاية الخط
ودا بيتشال ودا يتحط
حافظين يا سيدى أموركم صَمّ
ما إنتّو اللى حَفْظتونا يا عمّ
تخطب بُحرقَةَ وتتحمِّس
وأنا اللى أدخل للمجلس!!
9
إنت سامحنى بتاع شعارات
واحنا بنسرق شِعاراتك
ونعيش عليها بالسنوات
ومنغنغانا.. وحياتك
خبير شعارات جبَّارة
ما مشيتْش أبداً فى الحارة
وإذا نويت مرّة ورايح
بتمشى وكأنك سايح
لا تعرف اللى عاش أو مات
ولا مين قفل على جوعُه وبات
ولا معاهُمْ فى مُناسْبات
وعاوز الشعب يجيلك
يسمع ويفهم أقاويلك
ويِبْقَى كِيلَكْ مِن كِيلُه
مش إنت ترحل وتجيله
تحفظ معانى مواويلُه
فطبيعى جدا يا حبيبى
فقيرك اللى يغُنى له
يزحف يروح على تمويلُه
اللى يأكَّل عَيَايِلُه!!
وإنت بعيد عنُّه يا وِلْداه
مع إنّك إنت اللى قَتيلُه
إنت اللى محبوس فى قضاياه
وفى السجون بتعيش ليلُه
إنت بعيد عنّه يا وِلْداه
غرقان فى وصفُه وتحليلُه!!
ولا المساهمة دى تِساهِم
ولا إنت م الأول فاهم
وفى عِزّ ما ف دَرْسَك تِدْرِسْ
بُصّ.. تلاقينى فى المجلس!!
10
شعبَك مالوش فى النَّظريّة
وخيبة فى الأيدُولوجّية
بتعومُوا إنتو فى بحر خيال
أما إحنا.. ديتّنا مَصَالِحْنا.
أغراب وبيوحدنا المال
ولو غلطنا يصحَّحْنَا!!
أما إنتو بقى ثروتكو كلام
ووقت فاضى خِفّ تعوُم
لا حداك وِلَدْ ولا عندك بِتِّ
عايش فى سجن الإنترنّت
واحنا بدون تعليم عارفين
فى السوق نِغرَّق ونصَوِّم
أما الجنيه عارفين إمتى
نعُوِّم عليه وامتى (نْعوَّمْ)!!
بحر الفلوس علمنا العوم
لو عاجز.. القرش يعوِّم
وإنت مثقف.. ومفلِّس
ودا اللى دخَّلنى المجلس!!

**Amany Ezzat** **Amany Ezzat** · 09-18-2014, 01:01 PM

11
أحزاب دينية واقفالكوا
أُمَّال فاكرنا نسيبهالكوا؟
وبطَّل النخورة يا لئيم
الأسئلة أخرتها جحيم.
ياللّى انت مستنى قرارات
اللّجنة فوق الانتخابات!!
واوعى تفتش فى النّية
دى شُغلتى.. سيبها عليّه
بعد النتيجة مش حاجْلس
حافضل واقف طول المجلس
وأى نور يلمع حاطفيه
النَنّ سِكِن الشيْطان فيه
هيه الفنون دى أصل الداء.
والعلم والعامْلين عُلماء.
لا سيما.. لا مسرح.. لا غناء
والرقص.. مهما قُلْتُوا.. وباء
وحنمنعوها كتاب فى كتاب
كل اللى نال منكم إعجاب
ممنوع بقى التعليم لحريم
طبعاً.. وتَدْيين التعليم
حنقرطس المرأة فى قرطاس
فى معركة ضد الأنجاس
أصل البلاء فى الدنيا حريم!!
12
حجر الطاحون لو لفّ يعود
ما قُدَّامُهْش طريق مسدود
واللجنة ماشيه على يمينها
كأننا اللى جايبنها
كأننا إحنا الثورة
وإحنا اللى حَنْشَكِّل بكره
بيوسَّعوا فى الدايره يا خال
نِصْعب على أجدع خَيّال
تُظُنَّوا دى بقى خدمة لمين؟
ردوا عليَّا يا ثوريين!!
فى اللجنة إنت مالكْش وجود
وفى ذهنها إنت مِش موجود
وانبهِّك برضُه يا سيدى
العدل ده تفصيل إيدى
والحق ع الباطل مسنود
ما هو زمان.. فاكْر الإخوان؟
يومها ابتدوا المحْنَة بْلَجْنة
فيها اللى فرشوا بالأوطان
للبيع قصاد باب الجنة
حتى اللى فاكرينه كويس
خانّنا.. وْبَعَتْهُم ع المجلس!!
13
خاتمة
الدولة لو حتصوغ قوانين
تحمى العصافير م الشياطين
يمكن ساعتها نقول: فاهمين
قالّلى: أسأل الريس قولُّله
إيه انتظارنا لِدَه كُلُّه؟
ناسِينا والا عاملْها بقصْد؟
الشوك نَبَتْ فى ورق الورد
والوقت يجرى ومش حاسّين؟
هل إنت فى النِّيه تأجَّل
لِخطِةْ خرابنا المستعْجِل؟
وافرض وحتى أجّلنا
اللّجنة هيّاها اللجنة
حنتعجِن نفس العجنة
ما هو لو يقود الثورة يا بيه
نفس اللّى يومها ثُرنا عليه
نِدّيه قوى ونحن عليه
نفس الحقوق نفس الفرصة
طب يبقى ثُرنا أصلاً ليه؟
نهاية بايخة للقصة!!
ولا حد يقدر يمنعنا
نحس من تانى الغُصّة!!
فيا فُلان قُولها لفلان:
«لو تانى راح نعمل عميان
الليل حيزحف كما تِعْبان
والفجر راح يهرب مِنّا
ولا بنسمعْ له تانى أدان
والمسألة حتضيع بيننا
ونتوه ما بين لجنة ولجنة
على بال ما تِشكى للريّس
حاكون على باب المجلس!!

**Amany Ezzat** **Amany Ezzat** · 03-16-2015, 01:52 PM

" روحى شىءٌ.... والمرض شىءٌ آخر"
ببساطته وروحه العذبة
يقيم الشاعر الكبير عبدالرحمن الأبنودى
جدارًا عازلاً بينه وبين آلام جسده
الذى يقاوم المرض من وقتٍ لآخر،
فمهما تعرض هذا الجسد لآلام،
بقيت روحه كلحنٍ موسيقى
يمده بالقوة فينتصر على الألم،
فما إن كادت رئته تتخلص من الميكروب
الذى لحق بها ،حتى اكتشف الأطباء
إصابته بجلطة دموية بساقه اليمنى،
وعلى الرغم من ذلك،
تبقى روح الشاعر هى عقيدته الراسخة،
فالأمل فى الحياة رغم تقلباتها
ليس مجرد كلمات يشكل بها
قصائده التى تحفظها الأجيال.
فالخال عبد الرحمن الأبنودى،
الذى يخضع لعلاج مكثف
فى المجمع الطبى
التابع للقوات المسلحة بالجلاء،
ترك جسده للأطباء،ورافق روحه
المشعة بالبهجة يستقبل أحبابه الخائفين عليه،
فعلى الرغم من منع الزيارة،
وإصرار الأطباء على عدم استقباله لأصدقائه،
أو المسؤولين، الراغبين فى الاطمئنان عليه،
إلا أن حبه للناس أكبر من إحساسه بالألم،
جعله يعصى أوامر الأطباء،
ليفتح ذراعيه مبتسمًا فى وجه زائريه،
مستقبلاً إياهم بروحه المرحة
التى ترسم البسمة على الشفاه.
ويقول الخال عبد الرحمن الأبنودى:
"روحى شىء والمرض شىء آخر"،
و" لو كنت أعرف أن الرعاية
كده فى مصر مكنتش روحت فرنسا "
وفى الوقت الذى يدعو فيه الجميع
لشاعرنا الجميل بالشفاء العاجل،
وتسيطر عليهم مشاعر القلق،
يفاجئ شاعر الخال جمهوره
بنبأ احتفاله بعيد زواجه
من الإعلامية الكبيرة نهال كمال،
يقرران الاحتفال ويتحول المستشفى
من مكان لتقلى العلاج
إلى بيت تسرى فيه روح الأمل
من الأبنودى إلى الجميع

**Amany Ezzat** **Amany Ezzat** · 03-16-2015, 02:12 PM

" مؤتمر دعم و تنمية الاقتصاد المصري "
كعادته حرص الشاعر الكبير
عبد الرحمن الأبنودى
على أن يشارك في هذا الحدث الهام
و عبر مداخلة هاتفية على قناة فضائية
و برغم مرضه الشديد
قام الشاعر عبدالرحمن الابنودي
بالتعبير عن سعادته البالغة
بنجاح المؤتمر الاقتصادى
وأهدى لـ”مصر المستقبل"
قصيدة جديدة تحت عنوان “هنكمل”

هنكمل

اذا تفكر هنتأمل واذا اتحملت هنكمل
وانت قلب وروية ورؤية وحلم حرية

هنبنيها هنبنيها هنزرعها ونحييها
حقيقي مش هنتجمل ولا نجمل
وهيا تايهه كما هيه وانت قلب
وروية ورؤية وحلم حريه

بلادي حلم أولادي زرعها صبر ومودة
احايل فيها وادادي عشان تطرحلنا ورده
أرويها ووريها

وأقلب في معانيها وأفرج غيرنا أراضيها
وبحورها وموانيها

برغم ظروفنا لا بهرول ولا تعجل
ولا تشقلب ولا تنحجل وانت همه بتخجل

تاريخ واقف وبيسجل اذا تفكر هنتأمل
واذا اتحملت هنكمل

ويلا يا بكره هل بقى شبعنا شقى لكن جينا
بتسبقنا غناوينا ويسبق جهدنا ايدنا

نسابق في السبق غيرنا وادي الهمة مشتاقه
واحنا معاك واشتقنا ومين يقدر يضايقها يضايقنا

واذا معانا واذا لأ هنمشي في طريق بكره بفكره
تشدنا لفكرة حفظنها وحفظانا

بلدنا جرحنا ونورنا أراضينا واجوائنا
هوائنا الحر وسمانا تمد الايد احنا نمد
بناة الأهرامات والسد

فاللي معانا يكسبنا واللي ضدنا يندم
هيتآمر لكن نآسي بإن المصري
عزمه في النضال قاسي

وإذا مناورات وتضيع وقت احنا بأمس
أو دلوقت لا بتوع شرق ولا بتوع غرب

وأما الهمة عارفنها في يوم الحرب في يوم الحرب

ومن ناحية أخرى،
أوضح الخال عبد الرحمن الأبنودى
أن الفنان الكبير محمد منير، زاره مؤخرًا
للاطمئنان على صحته،
وناقشًا سويًا أن يقوما بإهداء
حفل افتتاح قناة السويس الجديدة،
عملاً فنيًا عالميًا،
سيكون شكلاً جديدًا تماماً
عن كل الاحتفاليات السابقة

وجديرا بالذكر أنه تم نشر الجزء الأول
من الرواية النثرية "قنديلة"
فى جريدة الأهرام على أربع حلقات
أحدثت هذه الرواية الجديدة التى لم تكتمل بعد
ضجة كبيرة فى الأوساط الأدبية
قام شاعرنا الكبير بإهداء روايته الى والدته
قنديلة....إلي فاطنة قنديل،
التي أنّثوا القنديل إكراما لها...!! "عبد الرحمان"

**Amany Ezzat** **Amany Ezzat** · 03-19-2015, 06:01 AM

منذ ساعتين
و على تويتر
قراءة هذه العبارة
اللهم اجعل الجنة دار خلد لوالدي
و برغم مرضه و آلامه السابقة
إلا أن روحه المرحة فى لقاءته الاخيرة
و تطلعاته و أماله فى استكمال روايته الجديدة
كانت تكاد تؤجل و تنفى فكرة الموت
صحيح أن الموت هو نهاية رحلتنا في الحياة
ولا بد أنه ملاقينا يوماً ما إن عاجلاً أم آجلا
لايفجع الروح ويفطر الفؤاد ويحرق النفس
مثل ان تفقد عزيز توغل في القلب والروح
وذلك أن طعم مرارة الفقد يغص به الفاقد ليل نهار
ولا يستطيع التعايش معه
لأنه لا أمل في الرجوع حين الاصطدام بحقيقة الموت

**Amany Ezzat** **Amany Ezzat** · 04-03-2015, 06:34 AM

الخميس 2/4/2015
زار اللواء ياسين طاهر
محافظ الإسماعيلية،

واللواء هشام بدر الدين
نائب المستشار العسكري للمحافظة،

والمهندسة لبنى نجيب
مديرعام مديرية الطرق والنقل،

الشاعر الكبير عبدالرحمن الأبنودي،
في منزله بقرية الضبعية بالإسماعيلية،
للاطمئنان على حالته الصحية.
وخلال الزيارة أعرب "الأبنودي"
عن سعادته البالغة
بعد أن أهدى له محافظ الإسماعيلية
درع المحافظة.

1

إعـــــــلان

الابنودى فارس العاميه المصريه

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

مواضيع تهمك